بلوچ راجی زْرمبشت ( بی این ایم) ءِ سرکماش ڈاکٹر نسیم ءَ گْوشتگ چین مئے مزنیں دشمنے کہ مئے سرڈگار ءِ سر ءَ روچ پہ روچ وتی زور ءَ گیش کنگ ءُ بن ءَ بز کنگ لوٹ ایت۔ پہ ایشی ءَ پاکستان آئی ءَ کمک کنگ ءَ اِنت ءُ آ پہ وت ءَ دگہ ھم سنت شوھاز کنگ لوٹ اَنت۔ چین بلاکے ءِ جوڑ کنگ ءَ دلمانگ اِنت بلے ناں پہ ایشی ءَ سوگہ اِنت ءُ ناں کہ آئی ءِ راہ ءُ رندانی پد ءَ جھان گوں آئی ءَ ھم سنت بیت کنت۔
اے گپ آئی ءَ ماں نیادے ءَ گوں بی این ایم زروان ھنکین ءِ اگدہ داراں جتگ اَنت۔
ڈاکٹر نسیم ءَ گْوشتگ دمگ ءَ مٹیانی شبینگ اِنت بلے مٹی مدام کشانکی (منفی) نہ بہ اَنت۔ پاکستان ءِ تھی جاور روچ پہ روچ ھراب بیان اَنت۔آئی ءِ گزرانکی ءُ سیاسی جاور پدوکائی روگ ءَ اَنت۔سیاسی داشت نگواہ ایت پمیشکا آئی ءِ درسیں تْرامگیج شکیندیم اَنت۔چہ مھترھند (ریاست) ءِ نزوریاں مارا موہ رس ایت کہ ما وتی کارکردگی ءَ گھتر بہ کن ایں۔
آئی ءَ گْوشتگ وھدے اوگانستان ءِ جاور مٹ بوت اَنت گڑا ھمے ریس ءُ پریس بوت کہ وھدے اوگانستان ءَ تالبان ءِ سرکار نند ایت گڑا پہ بلوچاں جاور ھراب بہ اَنت بلے پاکستان ءِ پریس کار (تجزیہ نگار) ءُ واکدار بلوچ ءُ بلوچ زْرمبشت ءَ پوہ بیگ ءَ نہ اَنت۔ بلوچ زْرمبشت ڈنی واکے ءِ برپشت ءَ نہ اِنت بلکیں اے بلوچ راج ءِ مادنیں واھگانی بنیاد ءَ اِنت کہ آ آجو ءُ پرمڑاھیں راجے ءِ بستار ءَ زند گوازینگ لوٹ اَنت۔پاکستان ءِ واکدارانی ناسرپدی اِنت کہ گْوستگیں ھپتاد ءُ پنچ سال اِنت کہ آئی ءِ شونداتانی تہ ءَ سھرائیں رنگے ءَ جھل برزی گندگ بیت۔آیانی شونداتانی تہ ءَ پہ بلوچ ءَ مٹی اے شبین ءَ پرین اَنت کہ بلوچ ھما جاہ ءَ سر اِنت کہ پاکستان ءِ دانشور ءُ زانوگر وتی سرکار ءَ داشتی ءُ یک دْرچیں شونداتے دات کنگ ءَ نہ اَنت۔اے دیمونی ءُ تْرامگیجی سیاست ءِ برورد اِنت کہ ما وتی شوندات ءِ تہ ءَ دْرچ برجاہ داشتگ ءُ دیم ءَ جزگ ءَ ایں۔
سرکماش ءَ گْوشتگ بلوچ راج ءَ وتی جھد ءِ دْرچ برجاہ دارگی اِنت، آجوئی ءِ زْرمبشت ءِ باسکاں کوشست کنگی اِنت کہ آیانی ھم سسایانی کچ گیش بہ بیت داں جھد ءِ تہ ءَ داشت بئیت۔ءُ مارا وتی جھد ءِ تہ ءَ داشت ءِ درانگازی کنگی اِنت ، چہ مئے داشت ءَ دژمن مئے آجوئی ءِ منگ ءَ لاچار بیت۔
آئی ءَ گْوشتگ تْرامگیجی سیاست مئے داشت ءِ مانزمان اِنت۔ بی ایس او آزات ، بی این ایم یا آجوئی لوٹوکیں دگہ گلاں وت ءَ تْرامگیجی بنیاد ءَ مگیم کنگ ءِ سر ءَ کار کرتگ ، پمیشکا مروچی اے جاہ ءَ سر اَنت۔
آئی ءَ زروان ھنکین ءِ باسکانی کاردگرگی ساڑاتگ ءُ گْوشتگ زروان ھنکین ءِ ھمبلانی کارگردگی دلجم اِنت ءُ اے ہم وشیں مستاگے کہ آ وتی سرگرمیانی بارہ ءَ بنجاہ ءَ سھی کن اَنت۔ ھرچ کار ءِ تہ ءَ گھتری ءِ گنجائش ھر وھد ءَ بیت ءُ مارا گھتری ءِ نیمگ ءَ روگی اِنت۔
آئی ءَ گْوشتگ اے گپ ءَ شکے نیست کہ بی این ایم وتی بنیادانی اوشتاتگ بلے اے اگبال ئِے ھست کہ راہ ءُ راھبندانی سر ءَ بلوچ زْرمبشت ءِ دگہ بھرمندانی دیم ءَ وتی گپ ءَ ایر بہ کنت۔ اگاں ما سما کرت کہ کارے زْرمبشت ءِ سیت ءَ نہ اِنت گڑا اے مئے اگبال جوڑ بیت کہ ما اے بارہ ءَ گوں دگہ گلاں گپ بہ جن ایں بلے ما ماں رسانکدر ءَ دْراش ءِ بھر نہ بہ ایں۔اگاں چہ ما ردی یے بیت یا چہ دگہ گلے ءَ گڑا ما ھمے شوندات جوڑ کرتگ کہ مئے گوں دگہ گلاں رھوت مگیم بہ بہ اَنت۔ما دلجم ایں کہ مروچی بی این ایم ھما جاہ ءَ اِنت کہ مئے گوں دگہ گلاں رھوت ھست اَنت۔
ڈاکٹرنسیم ءَ گْوشتگ درسیں باسک یک وڑ ءَ پابند اَنت کہ گل ءِ راہ ءُ راھبندانی تہ ءَ کار بہ کن اَنت۔ اے راھبندانی بگیری ءِ سر ءَ ھکل ءُ ھژدار پہ ھمبلانی تْرامینگ ءُ راہ ءُ رندانی دلگوش کنگ ءَ المی بیت ، اے مئے سیاسی ھیلکاری ءِ ھم بھر بیگ لوٹ ایت۔
آئی ءَ ماں اے نیاد ءَ اگدہ دارانی جستانی پسو ءَ گْوشتگ مئے جھد ھمک جھتی اِنت مردمی اگبال پانکانی دیم ءَ ما مردمی اگبالانی گب ءَ جن ایں بلے مئے مول وتی راجی آجوئی ءِ گرگ اِنت ءُ ھمے مئے لوٹ اِنت کہ بلوچستان آجوئیں ڈیھے ءِ بستار ءَ منگ بہ بیت۔ھم سنتیں راج ءِ راھبنداں ھم وتواھگی اگبال (حق خود ارادیت) ءِ گپ ھست کہ آئی ءِ بزانت ھم آجوئی اِنت بلے ما نوکیں ڈیھے ءِ جوڑ کنگ ءِ گپ ءَ نہ ایں بلکیں بلوچستان یک آجوئیں ڈیھے اَت کہ پاکستان ءَ زور گیپتگ ءُ ما اے زورگری ءِ بگیر ایں۔
ڈاکٹرنسیم ءَ گْوشتگ چہ راجمان پتر ءَ پیش ھمبلاں پہ دیم ءِ کاراں کشکے گیشینتگ ءُ ھمے بارہ ءَ راہ ءُ رند نبیس اتگ اَنت۔ایشی ءِ تہ ءَ گل ءِ گیشتریں کلانھیں باسکانی شور ھوار اَت اَنت ءُ چہ وش بھتی ءَ وھدے ھمے راہ ءُ راھبند راجمان پتر ءِ باسکاں پیش کرت اَنت گڑا گیشتریں باسکاں من اِت اَنت۔ھمیشی ءِ پد ءَ گل ءَ بازیں تْرامگیجانی بنیاد ایر کنگ بوت۔نی مئے کوشست ایش اِنت کہ وھدے ما اے زمہ واریاں آیوکیں اگدہ دارانی دست ءَ دئے ایں گڑا پہ آیاں ھم گیش اتگیں کشکے بہ بیت ، آیاں چہ بندات ءَ بنا کنگ ءِ جاہ ءَ چہ ما دیم ءَ روگ ءَ کمک بہ رس ایت۔
آئی ءَ گْوشت وھدے ما بی این ایم ءِ داشت ءُ گھتری ءِ گپ ءَ جن ایں گڑا ایشی ءِ بزانت بلوچ راجی زْرمبشت ءِ مگیم کنگ اِنت پرچا کہ بی این ایم چہ بلوچ زْرمبشت ءَ جتائیں چیزے نہ اِنت چہ بی این ایم ءِ مگیمی ءَ بلوچ راجی زْرمبشت مگیم بیت۔پہ بی این ایم ءِ مگیمے ءَ کوشست ءُ کار ٹکی سنچ ءِ جلشک نہ اِنت بلکیں تْرامگیجی ءُ گلی سنچ ءِ درانگاز اِنت کہ ایشی ءِ سر ءَ ما زور دئے ایں۔ما داں انیگ ءَ جتائیں تکاں دلگوش کرزیں رنگے ءَ دیمروی کرتگ ءُ آئی ءِ سان درسیں تکاں سما کنگ بہ اَنت بلے مارا دیم ءَ چارگی اِنت ءُ ھمک جھتاں دیمروی کنگی اِنت۔پہ ایشی ءَ درسیں باسکاں کرد پیلو کنگی اِنت ءُ اے دیمروی پدترینگ ءِ جاہ ءَ دیم ءَ برگی اِنت۔ مروچی ھما پیشنھاد کہ پیش کنگ بیتگ اَنت مارا درساں پجیگ ءَ ایشانی سر ءَ کار کنگی اِنت۔