مبارک کازی ءِ بیرانی ءَ سرجمیں راج دلپدرد اِنت۔ مبارک کازی راجی لچہ کارے اَت ، آئی ءَ گوں وتی لچہ کارے ءَ بلوچ راج ءِ مارشتانی جھگیری کرتگ۔پہ زبان ءُ ندانک ( ادب) آئی ءِ کرد ءُ کارانی سر ءَ بی این ایم پہ آئی ءَ ستک شانی نْدر کنت۔
اے گپ بی این ایم ءِ جارکش ءَ بلوچی زبان ءِ نامی ئیں لچہ کار مبارک کازی ءِ بیرانی ءَ شنگ کرتگیں درشانے ءَ جتگ اَنت۔
آئی ءَ گْوشتگ مبارک کازی ءَ گوں وتی لچہ کاری ءَ راج ءِ راھشونی کرتگ۔آئی ءِ ند دو زھیں زھمے ءِ پیم ءَ اَت ۔ نیمگے آئی ءَ گوں وتی لچہ کاری ءَ زورگریں پاکستان ایر جتگ ءُ راجی زْرمبشت ءِ پلہ مرزی کرتگ ، دومی نیمگ ءَ چاگردی ھرابی ءُ چاگرد ءِ کلپیں سیاسی ءُ دگہ تک ءِ مردمانی بگیری ءَ تچکے ءَ نبشتہ کرتگ۔
’ آئی ءِ لچہ کاری ءِ سر ءَ آئی ءِ سر ءَ پہ کوش ءَ ارش کنگ بیتگ۔ آزار دیگ ءُ زندان ءَ بند کنگ بیتگ بلے آ چہ وتی لیکھاں بوگے ھم پد نہ کنز اتگ ءُ ناں کہ آئی ءِ ھاٹیگ ءِ تہ ءَ کمی اتکگ۔‘
بی این ایم ءِ جارکش ءَ گْوشتگ مبارک کازی ءَ موہ رس اتگ کہ آ پہ وت زر ءُ مڈی مچ بہ کنت بلے آئٛی ءَ پکیری زند دوست کرتگ۔ سادھیں زند گوازینوک ءُ گوں وتی گلزمین ءَ ھمگرنچیں مردمے اَت۔آ وتی چاگرد ءِ آشوبی ارواہ اَت کہ آئی ءَ دگہ لچہ کارانی پیم ءَ ایوک ءَ براھداریں دانک ، گالبند ءُ شبین ساچی نہ کرتگ بلکیں چہ ایشی ءَ آئی ءَ وتی مردمانی مارشتانی جھگیری دوست تر کرتگ ءُ مردمانی زبان ءَ لچہ کاری کرتگ۔وتی لچہ کاری ءُ آشوبی میلانی پد ءَ آ وتی زند ءَ بلوچستان ءِ چہ درساں نامداریں مردم اَت۔ پمیشکا آئی ءِ بیرانی ءَ چک، ورنا ءُ کماش درس دلپدر اَنت۔
بی این ایم ءِ جارکش ءَ گْوشتگ مارا سما اِنت کہ ما باریگے آسر بیگ ءَ دیستگ ، بلے مبارک کازی وتی کرد ، ازم، لیکہ ءُ درشان ءِ دْروشم ءَ داں آیوکیں پدریچاں مئے راھشونی کنت۔
جارکش ءَ گڈسر ءَ گْوشتگ آئی ءِ راجدوستیں لیکھانی پد ءَ آئی ءِ چک کمبر کازی بلوچ آجوئی ءِ جھد ءَ سرمچارانی ھمراہ بوت ءُ پندلے ءِ پد ءَ دژمن ءِ چیریں کارداراں شھید کرت۔پہ واجہ مبارک کازی ءَ اے جھلیں ٹپے اَت بلے آئی ءَ پہ راجی آجوئی ءَ وتی چک ءِ دیمونی سگ ات ءُ وتی چک ءِ شھیدی ءَ مدام پھر بستگ اَت۔
