شال: مبارک کازی ءِ پنجاہ سال ءِ شائری ءِ سپر بلوچ ءِ رنگاں رج اتگ پمیشکا مروچی آئی ءِ بیرانی ءَ سرجمیں بلوچ راج پرسیگ اِنت۔
اے گپ بلوچ راجی زْرمبشت ( بی این ایم ) ءِ نیمگ ءَ برجم دارگ بیتگیں ’جھدکارانی پتر‘ ( ایکٹیوسٹ اسمبلی ) ءِ نیاد ءَ تْران کنان ءَ گل ءِ سرکماش ڈاکٹرنسیم ءَ شکساتگ اَنت۔
گل ءِ کمک سرکارگشاد چیئرمین کمال ءِ چیردستی ءَ بیتگیں اے مراگش مبارک کازی ءِ منگہ دیگ ءَ دو دم ءِ بے تواری ءَ بنا بیتگ۔مراگش ءَ بی این ایم ءُ باسک ءُ اگدہ داراں مبارک کازی ءِ کرد ءُ ندانکی ( ادبی) کارانی سر ءَ آ ستک ءُ ستا نْدر کرتگ۔
ڈاکٹر نسیم ءَ گْوشتگ ھشتاد ءِ دھک ءَ بہ گر داں مروچی ، مبارک کازی ءِ نزیک ء پنجاہ سال ءِ شائری ءِ سپر ءَ آئی ءِ شائری گوں آشوب ، گھگیری ءُ بلوچ ءِ رنگاں بندوکیں شائری یے اَت۔کازی چہ ھما مردمان اَت کہ وت ھم راجی سیاست ءَ گون بیتگ ، جیل ءَ بند بیتگ ، آزار سگ اتگ ئِے ۔ آئی ءِ گوں جھد ءَ ھمگرنچ بیگ ءِ نشانی یے آئی ءِ تنگوئیں بچ ڈاکٹرکمبر کازی اَت کہ آئی ءِ ھم گھگیری ءِ راہ زرتگ اَت ءُ شائری ءِ پڑ ءَ ھم وتی توان چکاس اتگ۔آئی ءَ چہ مبارک کازی ءِ نیمگ ءَ سکین ءُ دلبڈی ءُ ھیلکاری بیتگ۔اے ھم کازی ءِ گھیگیری ءِ تہ ءَ ھوار بیگ ءِ درور اِنت۔
آئی ءَ گْوشتگ مروچی کہ چاگردی رسانک ءِ زمانگ اِنت کہ ما گندگ ءَ ایں بلوچ پہ کازی ءِ بیرانی ءَ پریشان اَنت۔ھما کازی کہ جتا جتائیں کرد ءِ واھند بیتگ ، آ کہ دیم گْوشیں کردے ءِ واھند اَت۔آئی ءَ مدام وتی گپ گوں دل ءَ ءُ دپ ءِ پر ءَ جتگ۔ریا رو کنگ ، دروگ بندگ ءُ پشت گْوشی کنگ چہ کازی ءَ سک سک دور بیتگ اَنت۔آئی ءِ ھمے شری بیتگ اَنت کہ مردماں دوست داشتگ ءُ آ دگہ کار کہ مردماں گْوشتگ کہ ایشی ءَ مدام شراب ءِ بوتلے دست ءَ اِنت ءُ گرد ایت،مروچی اے درسیں چیزاں مردم بے ھیال کنگ ءَ اَنت۔پرچا کہ آئی ءِ تہ ءَ دگہ ھزاراں شری بیتگ کہ اے وڑیں چیز اش اندیم کرتگ اَنت۔
بی این ایم ءِ سرکماش ءَ گوں مبارک کازی ءَ بلوچ راج ءِ مھر ءِ درور ءَ درشانتگ مروچی شما دیستگ کہ پسنی ءِ انجمن تاجران ءَ ، آئی ءِ پہ منگہ ءَ وتی دکان بند کرتگ اَنت ، باید سجھیں بلوچستان ءَ ھمے کار بوتیں۔ درسیں تک ءُ پھنات ءِ مردماں پہ آئی ءِ بیرانی ءَ وتی دلپدردی درشان کرتگ۔آئی ءِ مزن شانیں کرد اَت کہ مروچی آ چوش یات کنگ بیت۔
