بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ راجانی سنت ءِ مردمی اگبالانی پتر ءِ 54 می مدامی ئیں نیاد ءَ تْران کنان ماں بلوچستان ءَ پاکستانی لشکر ءِ مردمی اگبالانی بگیری ءِ کارپدانی نیمگ ءَ زیت دلگوش گْور کنگ ءِ لوٹ کرتگ۔
دیمروی ءِ اگبال ءِ پجیگ ءَ درسیں مردمی اگبال ، شھرمنندی ، سیاسی ، گزرانکی ، چاگردی ءُ ربیدگی اگبالانی گیش کنگ ءُ پھریزگ ءِ سر ءَ پچیں تْران ءِ میان ءَ ڈاکٹرنسیم ءَ ناگیگیں جاور ءِ سر ءَ گپ جتگ کہ بلوچ راج ئِے دیمپان اِنت۔آئی ءَ پاکستانی لشکر ءِ دست ءَ بلوچ ءِ چکچینی ءِ بارہ ءَ سھی کرتگ ، کہ ایشی ءِ تہ ءَ زوربیگواھی، کوش ، آزار دھی ، بیھار دیگ ءُ لوگانی تباہ کنگ ھوار اَنت ، بلوچ راج ھم روچ اے ویلانی آماچ اِنت۔
بی این ایم ءِ مردمی اگبالانی تک پانک ءِ بنشون ءَ ڈاکٹر نسیم ءَ بلوچستان ءِ ناگیگیں مردمی جاورانی سر ءَ دلگوش گْور کنائینگ ءَ کچ ءُ شمار گْوشتگ اَنت ، آئی ءَ درائینتگ ایوک ءَ اگست ءَ بلوچستان ءَ 64 زور بیگواھی ءُ سئے کوش ءِ ویل پیتبند کنگ بیتگ۔
ھمے وڑ ءَ ھمے سال ءِ 15 مئی ءَ استاد نجمہ ءَ چہ پاکستانی لشکر ءِ دست ءَ جنسی آزار دھی ءِ بیھار ءَ وتکشی کرتگ۔اپریل 2021 ءَ دگہ ویلے ءَ ھوشاپ ءَ مراد امیر نامیں 13 سالی نودربرے پاکستانی لشکر ءَ جنسی زوراکی ءِ نشانگ کرتگ، آواران ءِ جاھمنند نورجان 20 مئی 2021 ءَ پاکستانی لشکر ءَ زور داتگ کہ آ وتی جنک ءَ لشکری بنجل ءَ بہ یار ایت ، چہ ایشی ءَ آ پہ وتکشی کنگ ءَ لاچار بیتگ۔
ڈاکٹر نسیم ءَ ھمے سال ءَ 28 اگست ءَ بیتگیں ویلے ءِ نیمگ ءَ ھم دلگوش پرینتگ کہ اے روچ ءَ نورھاتون نامیں جنینے چہ بلوچستان ءِ بنجاھی شھر شال ءَ چہ آمیدگس ءِ پرمان ءَ ڈن دزگیر ، بیگواہ ءُ گوں دو چکاں آزار ءِ آماچ کنگ بیتگ۔
وتی گْوشتانک ءِ گڈ سر ءَ آئی ءَ بلوچستان ءَ مردمی اگبالانی یکشل ءُ مزنیں بگیریانی رد ءَ زیت دلگوش ءُ گامگیج زیرگ ءِ سر ءَ زور داتگ ءُ گْوشتگ کہ اے سکا ھژدری اِنت کہ زیت گامگیج زیرگ بہ بیت۔
راجانی سنت ءِ مردمی اگبالانی پتر ءِ نیاد ءَ بی این ایم ءِ سرکماش ڈاکٹر نسیم ءِ گْوشتانک ءِ نکان :
من اے پتر ءِ دلگوش ءَ پاکستانی لشکر ءِ دست ءَ بلوچستان ءِ ناگیگیں جاورانی نیمگ ءَ پرینگ لوٹ آں۔بلوچ راج چکچینی ءِ دیمپان اِنت، ایشی ءِ تہ ءَ زوربیگواھی، کوش ، آزار دھی ، بیھار ءُ لوگانی تباھی ھوار اَنت۔مردمی اگبالانی گل پانک ءَ ایوک ءَ وتی اگست ءِ گزارش ءَ 64 زوربیگواھی ءُ سئے کوش ءِ بارہ ءَ سھی کرتگ۔پاکستانی لشکر ءَ انچوش کہ پیش ءَ بنگلہ دیش ءَ کرتگ اَت ، بلوچستان ءَ ھم جنسی زوراکی کرتگ۔
استاد نجہ ءَ 15 مئی ءَ پاکستانی لشکر ءِ دست ءَ جنسی آزار دھی ءِ بیھار ءَ پد وت کشی کرتگ۔
اپریل 2021 ءَ ، پاکستانی لشکر ءَ ماں ھوشاپ ءَ گوں 13 سالی ئیں نودربر مراد امیر ءَ جنسی زوراکی کرتگ۔
آواران ءِ نندوکیں نورجان ءَ 20 مئی 2021 ءَ پاکستان لشکر ءِ زور ءَ وت کشی کرتگ، پاکستانی لشکر ءَ آ زور داتگ اَت کہ آوتی جنک ءَ لشکری بنجل ءَ بہ بارت۔
ھمے سال ءَ 28 اگست ءَ شال ءَ نورھاتون نامیں جنینے گوں وتی دو چکاں دزگیر کنگ ءَ پد بیگواہ کنگ ءُ داں شش روچاں آزار دیگ بیتگ۔
اے زوراکی انگت برجاہ اَنت ، اے نیمگ ءَ زیت دلگوش دیگ ءُ ایشی ءِ گر ءُ دار ءَ کارروائی لوٹ ایت۔
منتوار
