تاریخ دان و دانشور ڈاکٹر نصیر دشتی جنیوا ٹی بلوچ نیشنل موومنٹ (بی این ایم ) نا پنچمیکو بلوچستان انٹرنیشنل کانفرنسءِ تینا خطاب ئٹی ریاست پاکستانءِ بلوچ قوم تون مون پہ مون مروکا ظلم وزوراکی و ہوفتا جُہد نا بارسٹ اِیت و گپ کرے۔ ھو دشمن ریاست نا عجیب و غریب انگا وڑک و ہونا تینا جوڑ کروکا نظریات آتا زی آ تینا اِیت آتا بنداتءِ کرے ، دشمن ریاست پاکستان : اموڑتون کہ بلوچ آک مُون پہ مُون ءُ۔
ھو پارے پاکستان قومی آزادی نا جُہد ئٹ تاریخ ئٹی جتاؤ ملک اَسے ، دا ہمو اَسِٹ انگا ملکءِ کہ تینٹ استعماریءَ طاقت آتَن آزاد مسہونءِ ولے ہونا نظریہ ہونا سرزمین تون متَنءِ بلکِن دائنا بنیات آک لندنءِ مسہونءُ۔ پاکستان ہرا زبان نا بارسٹ دعوی کیک کہ دا ننا زبانءِ ھو پاکستان ئٹی تُولوکُ نہ اَسے بندغ سینا زبانءِ نہ کہ اَسے قوم سینا زبانءِ۔
ڈاکٹر نصیر دشتی پاکستان نا تینٹ جوڑ کروکا مذہب نا زی آ تنقید کریسہ راستی نا کُنڈا توجُو تِس پارے کہ پاکستان نا دانشور و اسکول آتا نصاب نا اننا دعویءِ کہ ریاستءِ پاکستان اللہ نا نیمہ اَن ٹیکی اَسے ، انو عقیدہ ئسے ہرا دنیا نا ہچُو ریاست سیتون اَف۔ دا انو ریاست اَسے دادے خدا آزاد کرینءِ دونکہ دا سوچ خلیرا ، ھو پارہ داسہ ہم ہونا علاقہ تیٹی پنجاب ، سندھ ، پختونخوا یا بلوچستان ئٹی دا وختءِ آجوہی نا ہچُو تحریک ئس اَف۔ دا اللہ نا تِروکُو ریاست اَسے۔ دادے انگریزآک جوڑ کرینءُ ، داسہ ننا زی آ قوضہ کرینءِ اراڑن نہ خالی بلوچ آک بلکِن جنوبی ایشیا نا ہر بندغءِ تکلیف مننگ ئٹیءِ۔
تینا اِیت آتیٹی ھو چنگیز خان نا بخاراءِ فتح کننگ نا قصہ کرے ، مذھبی رہنما آک رحم کننگ نا خواست کریر ، اللہ نا غضبءِ توار کریر اگہ چنگیز خان دیتر وہفنگءِ بند کتہو تو ہوڑے اللہ نا غضب نازل مریک۔ ولے چنگیز خان ہوفتہ خواست آتے منیتو ، و دا دعویءِ کرے کہ دا وختءِ ھو اللہ نا مرضیءِ داڑے رسینگانءِ۔ ڈاکٹر دشتی تاریخ نا دا حوالہءِ پاکستان نا حکمران آتے تِس ھو بلوچ قوم نا زی آ دا ظلم و زوراکیءِ امو تباہی کروکا قوم آتون تشبیہ اِیتک۔بخارا ٹی منگول آتا وڑ پاکستان نن تون کننگ ئٹیءِ ، پشتون ، سندھی و پُورا جنوبی ایشیاء نا خطہ تیکِن اَسے لعنت ئسے۔ خطہ نا بندغ آتیکِن دونو مصیبت جوڑ کرینءِ ارافتہ مثال ئس ہم تننگپک۔
دا تاریخی انگا واقع غاتَن بیدس ، ڈاکٹر نصیر دشتی بلوچستان ئٹی مروکا ظلم و زوراکی نا خطرغاتَن خبردار کرے ۔ ھو ایرا اہمءُ مسلئہ آتا بارسٹ پارے : پرایمن انگا باسک آتے تشدد کننگ و گوادرءِ چار مکُنڈ بند کننگ یا باڑ خلِنگ۔
کُل اَن موست ، ھو پارے ریاست پاکستان امر پرایمن انگا کارکن آتے فورتھ شیڈول ئٹی شاغنگ و ہوفتے دہشت گرد نا لیبلءِ خلِنگءِ شروع کرینءِ ۔ ننا نوجوان آک وسائل آتا دننگ و بیگواہی تا خلاف پرایمنءُ احتجاج مدام کیرا ، داسہ دافتے دہشت گرد پاننگ ئٹیءِ۔ دا لیبل خلِنگ نا وجہ اَن ریاست دافتہ دانگ اینگ اننگ نا زی آ ہم پابندی خلکونے ، اراتم پوج نا مرضی مرے تو بغیرس عدالت سینا پاننگ اَن ہوفتے آسانی ٹی کَسِفِک۔
دا وڑک بلوچ نوجوان آتا زندگیءِ زیات خطرہ غاتیٹی شاغِک۔ ریاست الِنگ کیک ، بغیرس عدالت سینا حکم اَن کسِفنگ کیک و پدا دعوی ہم کننگ کیک کہ ھو خفیہ اطلاع سینا بنیاتءَ دہشت گرد آتے خلکُنءِ ختم کرینءِ۔ ھو خبردار کرے کہ دا وڑک لامحالہ خطہ ٹی جبر و تشدد کننگءِ زیات کیرا۔
ارٹمیکو اہم انگا مسلئہ ہموڑہیے ھو توجُو تِس ھو گوادرءِ چارمکُنڈ باڑ خلِنگ ناءِ ، دا منصوبہ کِن چین تینا بیلٹ اینڈ روڈ انیشیٹیو نا فنڈءِ تِسہونءِ۔ پاکستان نا ریاست ، چین نا کمک تون ، بین الاقوامی بالی پٹ و ہوڑتون ھوار گوادر ناپُورا علاقہءِ باڑ خلِنگ ئٹیءِ۔ دا باڑ خلِنگ عامءُ اِیت ئس اَف بلکِن دا بلوچستان ئٹی چین نا انکلیو جوڑ کننگ نا علامتءِ۔( چین نا قوضہ ٹی الوکا علاقہ )۔ دا اَسے نو آبادیاتیءُ منصوبہ ئسے۔ اَسے انو علاقہ ئس جوڑ کننگ خواہیک ہرا پُورا چینی پیپلز لبریشن آرمی نا دُوٹی مرے۔
ھو خبردار کرے کہ دا ترقی بلوچ قومءِ معاشی ، سیاسی و سماجی تاوان ایتِک۔ دا انکلیو دنیا ٹی ننا بشخ ئٹی اولیکو سوشلسٹ کالونی نا نمائندگیءِ کیک ، ارا بلوچستان اَن پُورا جِتا مروے و پیشن نا ملک آتا کنٹرول ئٹ مروے۔ دائنا اثرات آک ننا مخلوک کِن تباہ کروکُ مرور۔
تینا خطاب نا ایسر ئٹی ھو کُل بلوچ سیاسی تنظیم و کارکُن آتے زور تریسہ پارے کہ ھو دا سک انگا خطرہ غاتَن آگاہ مریر۔ ننے باز کاریم کرویءِ۔ دا واقع غاک ننا مونے مننگ ئٹیءُ۔ دا ننا سماجی ، اقتصادی و سیاسی زندءِ باز منفیءُ اثرات آتے بِٹک۔ داسہ وخت بسہونءِ کہ نن دا بے انصافی تا خلاف بش مرین داڑن موست کہ پدا باز ہُورے تموے۔
ڈاکٹر نصیر دشتی ، بلوچ مسائل نا زی آ بازنگا کتاب آتے لکھانءِ ، اراٹی ایران و پاکستان کے ساتھ بلوچ تنازعہ : قومی آزادی کی جدوجہد کے پہلو (2017)، دی بلوچ اینڈ بلوچستان : اے ہسٹاریکل اکاؤنٹ آف دی بیگننگ ٹو دی فال ھوارءُ۔ بلوچ اسٹیٹ (2012) ، دی وائس آف ریزن (2008)، و بلوچ تناظر میں (2008)۔ ہونا کاریم آتا زیات مضمون آک بلوچستان ،سندھ و خاص کر جنوب وسطی ایشیا و جغرافیائی سیاست نا بَلو کچ سیہا تجزیہ کننگان ءِ۔
