سیاسی کارکن و اسکالر آتَن ایِت و گپ کریسہ او بلوچ و ایغور مخلوکءِ جدوجُہد کننگ ءِ زور تِس ، چین نا کُنڈ اَن ایغور آتا مروکا نسل کُشی و چین پاکستان اقتصادی رہداری ( سی پیک ) نا وڑئٹ بلوچستان نا لُٹ و پُلءِ جتا جتا بیان کرے۔
ای تینا وطنءِ 1997 اَن پد 2000 ئٹی اِلاہاٹ و اینو اِسکان جلاوطن ہوٹ۔2017 اَن ، ای واپس ایننگ کتَن ہوٹ و کنءِ تینا خاندان تون اِیت کننگءِ ہم پابندی خلنگانءِ۔ نُوم سوچ خلِنگ کیرءِ کہ ای تینا بندغ آتون اغس درد و تکلیف سہانُٹ۔
ایغور انسانی حقوق نا کارکن ، محموت نا تقریر نا بنجاہی موضوع سی پیک ئس ، دا اَسے انو منصوبہ ئسے ارہادے ہر وخت چین و پاکستان نا نیام ئٹ اقتصادی ترقی پاننگ گیک ۔ ھو خف توروکا بندغ آتے دائنا ڈھکوکا خطرہ غاتَن خبردار کرے، خاص وڑئٹ بلوچستان ئٹی لُٹ و پُل ، لڈوبار و ماحول نا تباہیءِ مونی دننگ ئٹ دائنا کِرد ، دا کُل چین نا فائدہ کِن مننگ ئٹیءُ۔
ھو پارے سی پیک بنیاتی حوالہ ئٹ چین نا فائدہ کِن مننگ ئٹیءِ ارا پاکستانءِ بلُو معاشی لالچ سے نا کُنڈا دننگ ئٹیءِ، بلوچستان اراڑے قدرتی دولت اَن پُرءِ انگہ پدءِ شاغنگانءِ۔
تاریخءِ ہوریسہ ھو پارے دے ٹکی ترکستان ( ارہادے چین سنگیانگ پائیک ) نا زی آ چین نا قوضہ و بیست می صدی نا نیام ئٹ بلوچستان نا زی آ پاکستانی نوآبادیات نا قوضہ اَسے وڑءُ۔
ارتوما خطہ غاک وسائل اَن پُرءُ ولے داڑن جہی آ مخلوکءِ ہچُو فائدہ ئس رسینگپک، انتیکہ ہوفتہ زمینءِ ہوفتہ بنجاہی حکومت لُوٹ ماری کننگ ئٹیءُ۔ دے ٹکی ترکستان ئٹی ایغور آتا نسل کشُی مننگ ئٹیءِ و ہوفتے بلو کچ سیہا بندی آ کیمپ آتیٹی تخنگانءِ۔2014 اَن الیس اینو اِسکان دہ لکھ اَن زیات اویغور بندی کننگانءُ ، چین نا بیلٹ اینڈ روڈ انیشیٹو ( بی آر آئی ) نا زی آ قوضہ بلو ایجنڈا سے ارانا سی پیک اَسے اہمو جز ئسے۔
نسل کشی خالی اویغور آتا کُنڈ اَن تینا زمین نا خواجہ مننگ نا دعوی کننگ نا بارسِٹ اَف ، بلکِن چین نا بلا منصوبہ غاتہ بارِسٹءِ۔ محموت پارے ، بی آر آئی نا ذریعہ ئٹ عالمی قوضہ گیری کننگ چینی کمیونسٹ پاٹی ( سی سی پی ) نا وژن ایغور مخلوک و بلوچ آتیئے براہ راست اثر شاغانءِ ، دا ارتومنگا ءَ خطہ ٹی مخلوک نا جُہدءِ اَسِٹ ایلو تون ملائِیفک۔
ھو دے ٹکی ترکستان ئٹی خننگوکءَ تباہی نا بارسٹ اِیت کرے انون سی پیک اَن بلوچستان ئٹی مروکا ماحول و سماجی تاوان آتا بارِسٹ اِیت و گپ کرے ۔ ھو پارے جہی آ مخلوک ترقی نا پِن ئٹ چینی کمپنیءِ تینا ڈغار آتے ایتِک و تینا معاشءِ ہم گوئفِنگ ئٹیءِ۔ھو پارے اقتصادی راہداری بلو کچ سیہا لڈوبار و بلوچ مخلوکءِ زیات پدمنتگی نا کُنڈءِ دئیک ، انون دونکہ چینی لٹ و پُل کروکاک ایغور آتا زمینءِ پُلنگ ئٹیءُ۔
محموت بلوچ ، ایغور و تبتی مظلوم انگا قوم آتا نیام ئٹ یکجہتی کننگ کِن زور تریسہ پارے ننا دشمن اسِٹءِ۔ ھو ظالم انگا حکومت آتون جنگ کننگ کِن اَسِٹ ایلو تون یکجا مرویءِ ہرافتہ زمین و وسائل آتا لُٹ و پُل مننگ ئٹیءِ ، ھو پارے بین الاقوامی برادری دا اَسِٹ ایلو تون تفوکا جُہدءِ بائیدءِ لگتمال کپ۔
ایسرئٹ ھو چین نا انسانی حقوق نا خلاف ورزی و دا خلاف ورزی تیٹی ھوار پاکستان اَن ہم حساب الِنگ نا خواستءِ کرے ۔ ھو پارے تنیا جُہد کننگ ئٹ ننا توار بننگپک ، ولے کنے پُورا یقینءِ اگہ نن یکجا مسہون تو زیات مضبوط مرینءَ۔
رحیمہ محموت ایغور انسانی حقوق نا کارکن ، مترجم و گلوکار اَسے۔ ھو ایغور آتا خلاف مروکا نسل کُشی نا بارسٹ آگاہی تننگ نا جُہد کننگ ئٹیءِ و متاثر مروکاتون ھوار کاریم کننگ ئٹیءِ ، ایغور ٹریبونل ئٹی مونءِ بروکا شہادت آتا ترجمہ ئٹی رحیمہ سٹاپ ایغور جینوسائیڈ نا ایگزیکٹو ڈائریکٹر ، ورلڈ کانگریس یوکے نا ڈائریکٹر و بین الپارلیمانی اتحاد آن چائنا ( آئی پی اے سی ) نا مشیر نا حیثیت ئٹ کاریم کننگ ئٹیءِ۔
