رابطہ کاری کننگ ہر جماعت نا مون روی کِن جوانو کِرد ئس اَتیک۔ دا اِیت و گپ آتے بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ رابطہ کاری نا موضوع نا زی آ پاٹی نا اِیرا دے ای تربیتی ورکشاپ اَن ساڑی مروکا باسک آتَن خطاب کریسہ پارے۔
ھو پارے رابطہ کاری اَن پاٹی زیات مونی کائیک، اننا وجہ اَن باسک آتا تربیت کننگ زلوریءِ۔
چیئرمین ورکشاپءِ اڈ تروکا سنگت آتا تعریفءِ کرے و پین انونءُ پروگرام اڈ تننگ نا امیتءِ تِخاءَ۔
دا ورکشاپءِ پاٹی نا ادارہ تعلیم و تربیت ( کیپسٹی بلڈنگ کونسل ) اڈ تسوسُس۔ اِیرا دے نا ورکشاپ بی این ایم نا سینئر وائس چیئرمین ڈاکٹر جلال بلوچ نا نگرانی ئٹ مننگ ئٹی ئس۔ تعلیم و تربیت ادارہ نا نمائندہ حفیظ بلوچ و بی این ایم برطانیہ چیپٹر نا جنرل سیکریٹری کمبر بخشی پروگرام نا میزبان اسُور۔ دا پروگرام ئٹی جرمنی ، برطانیہ ، امریکہ ، نیدرلینڈ ، مشکے و آواران ھنکین و کیچ و گوادر نا ممبرآک بشخ الکُور۔
ورکشاپ نا بابت ئٹ اِیت کریسہ ڈاکٹر جلال بلوچ پارے ورکشاپ نا اڈ تننگ نا مسخت رابطہ کاری نا فائدہ و اہمیت ، ترتیب و طریقہ کار و داڑن چاگرد ادارہ و زانت کار انگا بندغ آتا زی آ تموکاءَ اثرات آتے سرجمی ئٹ چمشانک تننگاءَ۔ پروگرام ئٹی رابطہ کاری نا بازنگاءَ تکُ پانات آتے بحث کننگاءَ۔ورکشاپ نا کُل سیشن آتیٹی ممبرآک بشخ الکور۔ھو تینا تجربہ و خیال آتَن سیشنءِ زیات معلوم داری و فائدہ تِسور۔اراڑن پروگرام ئٹی ساڑی انگاءَ بندغ آتے پُو مننگ نا بَلو موقع ئس رسینگاءَ۔
پاٹی نا جونیئر جوائنٹ سیکرٹری حسن دوست بلوچ وار وار پروگرام نا جائزہءِ الیسہ ئس ھو پارے دا وڑئنا پروگرام آتَن سیاسی کارکن آک زیات مونءِ کارا و پاٹی تعمیرو ترقی نا کُنڈءِ اِنیسہ کیک۔دا ایرا دے نا ورکشاپ زیات سرسوب مسونءِ، اراڑن بشخ الوک آک رابطہ کاری تون ھوار دائنا بنجاہی کانودتے ہم سرپند مسُر ۔ دا بی این ایم نا سنگت آتِیکن سیاسی عمل ئٹی مون مُستی اِننگ کِن باز زیات کاریم بروے۔
