اقوام متحدہ نا بندغی حق آتا کونسل نا 59 امیکو مُچی نا وخت آ بی این ایم نا اسہ وفد ئس ڈاکٹر نسیم بلوچ نا بھلنی ٹی جنیوا ٹی بندغی حق آتا ادارہ و جنگ زدہ آ علاقہ تیٹی کاریم کروک آ بین الاقوامی تنظیم تا بھلا تیتو ملاقات کریر۔
بی این ایم نا وفد ئٹی پارٹی نا ڈنی سیکریٹری فہیم بلوچ و رابطہ کار نیاز بلوچ اوار اسُر۔ وفد تبتین آفس، انٹرنیشنل کمیٹی آف ریڈ کراس( آئی سی آر سی) و ایلو ادارہ تا بھلا تیتو ملاقات کریر۔
قوام متحدہ نا ذیلی اجلاس ئٹی اوار مسر و بلوچستان نا مقدمہ ئے پیش کریر
بی این ایم نا وفد اقوام متحدہ نا کیہی مُچی تیٹی اوار مس، ہرافتیٹی انٹرنیشنل کریمنل کورٹ (آئی سی سی) و یو این ایچ سی آر نا ہجرت کننگ و زوراکی ئٹ ہمپفنگ نا وڑ انگا سرحال آتیا اڈ ہلوک سائیڈ ایونٹس آک ہم اوار اسُر۔ دا وخت آ وفد بلوچستان ئٹی آزاتی نا جُنز، پاکستان نا کوزہ نا بھرم ٹی ودی مروک بندغی بحران، و دا کوزہ نا علاقائی زیم آتیا سوگو او سفارتی حال و حوال کریر۔
جہانی وکیل آتا ٹیم ئتو ملاقات، پاکستان نا برخلاف مننگ کروک مقدمہ آ گپ و تران
وفد جہانی وکیل آتا اسہ ٹیم ئسیتو ملاقات کرے، ہراٹی جہانی قانود و بندغی حق آتا تناظر ئٹی پاکستان و اونا کالخواہ نا برخلاف انٹرنیشنل کریمنل کورٹ ئٹی مننگ کروک مقدمہ آ شابیتی ئٹ گپ و تران مسک، وکیل آتے بلوچستان نا ساڑی آ وخت ئنا پیچیدہ انگا بندغی صورتحال آن سوھو کننگا۔
دلائی لامہ نا نمائندہ تو ملاقات و گپ و تران
داکان بیدس وفد سوئزرلینڈ ئٹی تبتی روحانی پیشوا دلائی لامہ نا نمائندہ و تبتین آفس نا سربر تھن لے چوکی تون ملاقات کرے۔ دا ملاقات ئٹی بلوچستان نا حالیت آتا زی آ تران مس و تومکا اقوام متحدہ نا نمائندہ غاک بروکا وخت ئٹی اواری ئٹ جہد و سفارتی کمک کننگ آ آمادہ مننگ نا درشانی ئے کریر۔
بی این ایم نا دا کھل رابطہ و ملاقات آتا مسخت پارٹی نا مستقل سفارتی پالیسی ئے مونا دننگ ءِ، ہرانا رد ئٹ تیبہ دنیا ٹی بلوچستان نا آزاتی نا جنز ئکن حمایت دوئی کننگ و بندغی حق آتا لتاڑ ئے دنیا نا مونا ہتنگ اوار ءُ۔
