لیورکوزن_ بلوچ نیشنل موومنٹ (بی این ایم) جرمنی چیپٹر نا نائب صدر صفیہ منظور جرمنی نا شار لیورکوزن ئٹی اڈ ہلوک 19 می زلان ویمن فیسٹیول ئٹی بشخ ہلِسہ بلوچ زالبول تیا مروک ریاستی زوراکی و بلوچستان ئٹی بندغی حق آتا لتاڑنگ ئے مونا ہیس۔ فیسٹیول ئٹی او تینا تران ئٹی ڈاکٹر ماہ رنگ بلوچ، ماہ جبین بلوچ، بیبو بلوچ، و گلزادی نا وڑ انگا بھلا کیس آتے پیش کرسہ پارے کہ زالبول آتے چپ کرفنگ کن ریاست زوراکی نا سوگو آ چم ئے کارمرز کننگ ئٹی ءِ۔
سال 2025 نا اولیکو شش تو ئٹی بلوچستان آن 306 بندغ زوراکی ئٹ بیگواہ کننگانو و 205 زوراکی ئٹ کھسفنگ مسنو۔ پانک رپورٹ
صفیہ منظور فیسٹیول ئٹی تران کرسہ پارے کہ بیرہ 2025 نا اولی شش تو ئٹی بی این ایم نا بندغی حق آتا ادارہ پانک نا رد ئٹ 306 زوراکی ئٹ بیگواہی و 205 بندغ ئے وے قانودی ئٹ کھسفنگ نا تدینیک بلوچستان ئٹی رپورٹ مسنو۔ او پارے کہ 2011 آن دا وخت اسکان 5000 آن زیات بلوچ شاری تے زوراکی ئٹ بیگواہ کننگانے، ہرافتیٹی طالب، سیاسی باسک و زالبول آک اوار ءُ۔
کرد زالبول تا جنز تو یکجہتی نا درشانی، یورپی تنظیم نا نمائندہ تیتو ملاقات
صفیہ منظور دا وخت آ نیاڑی تا جد و جہد و قربانی تے یاد کرسہ کرد زالبول تا جنز و ایلو مظلوم آ قوم آتیتو یکجہتی نا درشانی ئے کرے۔
بی این ایم نا نمائندہ تیبہ یورپ آن بروک فیمینسٹ باسک آتیتو ملاقات کرے و بروکا وخت ئٹی اواری ئٹ کاریم کننگ نا زی آ گپ کرے، کیہی کرد و یورپی تنظیم آک بلوچ زالبول تا جنز نا کمک کننگ کن اسخواہی نا درشانی ئے کریر۔
صفیہ منظور زور شاغا کہ بلوچ قومی جنز ئے جہانی پڑ آ متحرک تخنگ کن زالبول تے گیشتر توار ہرفوئی تمو و یورپ ئٹی بندغی حق و زالبول تا جہانی پلیٹ فارم آتے آ بی این ایم نا مدام اوار مننگ المی ءِ۔ اونا پاننگ اسک کہ بلوچ زالبول تے آ مروک زوراکی نا دستاویز تے جوانو وڑ ئسے ئٹ اسہ جاگہ آ کرسہ یورپی نیٹورک تا ذریعت ئٹ جہانی رائے عامہ ئے بیدارو کننگ خواہِک۔
