نن تینا آزاتی ئے گوہانُن شرف ئے آخہ۔ 11 اگست آزاتی نا خوئشی کننگ نا دے آخہ بلکن دا ہیت ئنا یاتگیری ءِ کہ نن آزات اسُن و ننے آزات مروئی ءِ۔ دا خیال آتا درشانی ئے تران کروک آک بی این ایم کیچ گوادر ہنکین نا تنظیمی دیوان ئٹی کریر۔
11 اگست عہد ئے پوسکن کننگ نا رد ئٹ بی این ایم کیچ گوادر ہنکین نا کنڈ آن ارا جتاء او دیوان اڈ تننگا، ہرافتیٹی بی این ایم نا سیکریٹری اطلاعات و ثقافت قاضی داد محمد ریحان، فنانس سیکریٹری ناصر بلوچ، ہنکین نا صدر بابا جی و ہنکین نا جنرل سیکریٹری بھار بلوچ تران کریر۔
او دا وخت آ پاریر ‘آزاتی انت ئسے’ نا جواب ننا غلامی و اینو نا حالیت ئٹی ڈھکوک ءِ۔ غلامی نا سوب آن اینو بلوچ تینا ڈغار آ دُز و ڈوھدار آتا وڑ ئٹ زندگی کننگ آ مجبور ءِ۔ نن تینا اُرا نا دروازہ غا سلینگ آ خُلینہ کہ دن مفک کہ ننے کوزہ گیر آ لشکر نا کارندہ غاک دزگیر کپس۔ ہندا کچ اسکان کہ نن تینا اُرا تیٹی رکھوک افن ہراکان ننے ہرفِسہ بیگواہ کننگ مننگ ءِ۔ ننکن آزاتی پاکستان نا غلامی آن آجوئی نا پِن ءِ۔
او پاریر کہ 11 اگست نا دے شہید واجہ غلام محمد نا پاننگ آ ہر سال عہد ئے پوسکن کننگ نا رد ئٹ یاد کننگِک۔ دا دے آ نن آزاتی نا جنز ئتو تفوک مننگ نا عہد ئے پوسکن کینہ۔ انتئے کہ نن تینا آزاتی ئے گوہانُن شرف و قومی آ جوزہ ئے آخہ و نئے کہ نن تینا آزاتی آن دو کشانُن۔ ہراڑان دا تاثر رسینگک کہ نن داسکان ہم آزات اُن۔ دا دے نا تاریخی و سیاسی حیثیت نا تناظر ٹی ننے جنز نا سربر شہید غلام محمد بلوچ نا پیروی ٹی دادے عہد نا پوسکنی نا وڑ ئٹ یات کروئی ءِ جشن نا وڑ ئٹ آخہ۔
تران کروک آک پاریر کہ غلامی نا داغ ئے مُر کننگ کن بلوچ نا آزاتی نا جنگ ئنا دا پنچمیکو بشخ ءِ ہراٹی وطن نا چناک تینا جان تے ندر کننگو۔ ننے آزاتی نا جنز ئٹی ہر وڑ نا خواری تے خوئشی ئٹ سہوئی مرو۔ پاکستان بے شرف او دشمن ئسے ہرا ننے آ ہر وڑ او ظلم کننگ ءِ۔ ننا نرینہ تیتو اوار داسہ نیاڑی تے ہم زوراکی ئٹ بیگواہ کننگ ءِ۔ بلوچ تینا جدوجہد ئے چرجوئی ئٹ برجاء تخانے ہرانا سوب آن اینو نن ہرا ہند آ سلوک اُن کہ تیبہ قوم آزاتی نا حمایت ئٹی سلوک ءِ۔
