شال : بلوچ نیشنل موومنٹ نا ہیومین رائٹس ڈیپارٹمنٹ ’پانک‘ ئنا تدوکا تو ئنا رپورٹ نا رد ئٹ نومبر ئٹی پاکستانی کشلر 36 بندغ ءِ زوراکی ئٹ بیگواہی نا گواچی کرینے و 23 بندغ ءِ پاکستانی لشکر نا جتا کارروائی تیٹ خون کننگانے۔
رپورٹ نا رد ئٹ نومبر نا تو بلوچستان ئٹ لشکری آپریشن، زوراکی نا بیگواہی و ریاستی بےدادی تا کی ندر مس، دا تو ئٹی پاکستان نا آرمی، ایف سی و پن ئنا سی ٹی ڈی بلوچستان و سندھ(جیکب آباد) ئٹی بلوچ رکھ ہلوک آتون اوار 36 بندغ ءِ زوراکی نا بیگواہی تا گواچی کرینو۔دا تو یا داکان مُست زوراکی نا بیگواہی تا گواچی 14 بندغ ءِ باز ذہنی و جسمانی بےدادی آن گڈ یلہ کننگانے۔
تدوکا تو ئنا اخیرکو دے تیٹ کوہلو نا علاقہ ٹی ڈرون طیارہ و گن شپ ہیلی کاپٹر آتا کمک ئٹ لشکر کشی کننگا ہرا ٹی آجوئی نا 8 جہدکار شہید مسر و اندا تو ئٹی کولواہ ٹی ڈرون طیارہ و ہیلی کاپٹر آتا شیلنگ آن پین یانزدہ آجوئی دوست باسک شہید کننگا و لس مخلوق ءِ جانی و مالی نسخان تننگا۔
رپورٹ نا رد ئٹ ضلع آواران نا تحصیل جھاؤ نا خلق کوھڑو ٹی ڈیہہ ئنا تہٹی باہوٹ مروکا بندغ آتا دوارہ بننگ آن گڈ پاکستانی لشکر اوفتیان ہیلی پیڈ و لشکری کیمپ تفنگ کن زور ئٹ کاریم ہلنگ ءِ۔ ہرا نا ویڈیو ثبوت ادارہ پانک دوئی مریسہ چاگڑدی حوالکاری میڈیا آ شنگ کریسس۔
رپورٹ ئٹی پاننگا کہ بلوچ الس نا اسہ بھلو کچ اس لشکر کشی تیان بیزار مریسہ ایران و اوغانستان آ ہنانو ہراڑے او بدحال زند گدریفنگ ءُ۔
پانک ئنا رد ئٹ پاکستانی لشکر تینا مسخت آتے دوئی مننگ کن بلوچستان ئٹ بندغی اسپر کاریم ئٹ ہتنگ ءِ۔ نومبر ئٹی چاکر مجید ءِ لشکری کوالخواک مخبری کن بےوس کریسر ہراڑان جغر چٹ مریسہ او خودکشی کرے و داکان مُست ہم پاکستانی لشکر نا زوراکی تیان کیہی بندغ آک خودکشی کرینو۔
پانک بندغی حق آتا ادارہ و مہذب جہان آن بلوچستان ئٹی بندغی حق آتا سخت لتاڑ ءِ توننگ و جنگ آن زیمی مروکا بندغ آتا بندغی بنداو آ کمک نا خواست کرینے۔
