شال : بلوچ نیشنل موومنٹ نا بندغاتا حقاتا ادارہ پانک نا رپوٹ نا وڑٹ فروری 2023 اے بلوچستان ھٹی 39 بندغ جبرھٹ بیگوا کننگان اے و اَسِٹ پاکستان نا پوجیک شدد ھن پد کسفین ھو۔
جبرھٹ بیگوا مروکاتیٹی اِرا زالبول ماھل بلوچ و رشیدہ بلوچ ھم ھوار اُو دافتیٹی رشیدہ زھری اے حلہ کننگان اے ولے ماھل بلوچ اے دروغ نا کیس تیٹی پولیس نا کاؤنٹرٹیررازم ڈیپارٹمنٹ تون بندی اے۔
پوجی اہلکاراتا دُو ھن تشدد کننگ ھن پد کہوکا بندغ داد بخش ولد مسکان اے پاکستان نا پوج ھودے آرمی نا کیمپ اے خوائک ہوڑے شدد کیک داڑن ھو باز ٹپی مریک پدا اننا درداتے سگننگ کپپک و کہک۔ ھو گیشکور ضلع اے آواران نا بندغ اَس مریک۔
فروری ٹی 13 بندغ جبرھٹ بیگوا کننگ ھن پد سخت ذہنی و بدنی شدد کننگ ھن پد حلہ کننگیرا۔
پانک نا رپوٹ ھٹی سرورق اے پاکستانی فورسس آتا دُو ھن جبرھٹ بیگوا مروکا زالبولاک ماھل بلوچ و رشیدہ بلوچ نا فوٹوتن بیدس امیراں بی بی نا فوٹو ھم تخوک اے۔امودے کہ پاکستانی حکومت نا وزیر عبدالرحمان کیھتران کسفنگ ھن پد تیزاب چٹ تس و خساء کہ ہچ مونتا ھم درست مف۔امیراں بی بی تون ھوار پین پنچ بندغاتا جوناک خسنگار داڑن بلوچستان ھٹی سختو رد عمل اَس مونا بس اموڑن عبدالرحمان گرفتار کننگا۔
پانک نا نیمغن رپوٹ تون ھوار بیان سیٹی پاننگان اے کہ فروری ٹی پاکستان نا پوج بلوچستان ھٹی جبرھٹ بیگواہی تیٹی زیاتی ایسونے زالبولتے ھم جبرھٹ بیگوا کریسائے۔جبرھٹ بیگوا مروکا ماھل بلوچ اے پاش کرین اے و ھوڑے سنگینو الزام خلکونے۔
رپوٹ ھٹی پاننگان اے کہ گدرینگوکا اِرا دہائی ھن ایمن اننگا بندغاتے النگ ھن پد بیگوا کننگ نا کاریم ھم شروع کننگان اے اوفتے ارا کیس یا قانود ھٹ بندی و جبرھٹ بیگوا کننگک داڑے حکومت پاکستان و صاحب اے اختیاراک چُپ اُو ۔ایمن اننگا شاریتے جبرھٹ بیگوا کننگ و بغیرس عدالت سے آ پیشی ھن اوفتے تشدد کننگک دا کُل بندغی حقاتا سنگینو خلاف ورزیکو۔
پانک نا وڑٹ بلوچستان ھٹی بندغی بحران اَس ودی مسون اے اموفتے تنظیماک پاش کننگ ٹی اُو ولے داڑن بیدس ہچکس خف تورنگ ٹی اَف انناوجہ ھن پاکستان نا پوج زیات دیدہ دلیری ھٹ ایمن اننگا بلوچاتا حق اے خلنگ ٹی اے و نتا کیرنگا کننگا ٹی اے ۔اگہ جہانی ادارغاک و بندغی حق آتے کاریم کروکا تنظیماک پاکستان اے جوابدہ کتؤر تو بلوچستان ھٹی بندغی حقاق باز پین وڑو شکل اَس اختیار کرور۔
پانک دا درخواست اے کرین اے کہ بلوچستان ھٹی پاکستان نا دا جرم اے تورنگ کِن اقوام متحدہ تون ھوار ایلو ادارغاک عملی و قدم اَس ارفنگ کِن مون اے بریر۔
