جنیوا : دا ضلوری اے کہ جہانی برادری ریاست پاکستان ھٹی مظلوم انگا قوماتا حالیت اے پُو مرے و دادے منے و دافتا زی آ مروکا ظلم اے تورے۔ اگہ نن اَسے جاگہ کاریم کین تو کُل مظلوم قوماتا انصاف، امن و آجوہی کن اَسے مظبوطو تحریک اَس ودی کننگ کینا۔ دا ایت آتے بلوچ نیشنل موومنٹ نا چیرمین ڈاکٹر نسیم بلوچ یونائیٹڈ نیشنز ہیومین رائٹس کونسل ( یو این ایچ سی آر ) نا 52 می اجلاس اے پی ٹی ایم نا اَسے ضمنی اُو تقریب سے ھن خطاب کریسا پارے۔
ڈاکٹر نسیم بلوچ پارے 1948 نا قوضہ ھن پد بلوچستان ھٹی بندغی حقاتا باز وار خلاف ورزیک مسون او دا وڑک مقامی انگا و جہانی بندغی حقاتا تنظیم تیکِن اَسے پریشانی اَس جوڑ مسونو ۔جبرھٹ بیگواہیک ، بے وجہ کسفِنگ ، تشدد و تنگ کننگ و تینا ایت اے کننگ و مُچی نا آجوہی اے پابندیک بندغی حقاتا کُل ھن بلا و بے رحم انگا خلاف ورزیک او ۔ بلوچستان و کے پی کے ٹی جبرھٹ بیگواہی عامو ایت اَس جوڑ مسون اے۔ سیاسی انگا کارکناتے، صحافی تے و اسٹونٹ تون ھوار بازنگا بندغاتے ریاستی سیکورٹی فورساک یا اوفتا پراکسی تا دُو ھن بیگوا کننگک۔ دافتیٹی بازنگا بندغاک جبرھٹ بیگوا کننگان او، دافتا ھوراوالاک انصاف خوائنگ ٹی او۔ پاکستان نا حکومت تینا ایت کننگ و مُچی کننگ اے ہم پابندی خلکُن اے، خاص ہمو بندغاتے ہمو کہ ریاست نا پالیسی تے تنقید کیرا یا تینا قوم نا آجوہی نا وکالت اے کیرا۔
ھو محکوم انگا خطہ ٹی بندغی حقاتا تا حالیت نا زی آ ایت کریسا پارے بندغی حقاتا تا دا خلاف ورزی تن عام انگا مخلوک ھٹی خوف و تینے بچیفنگ نا کسر سلیتن اے ، خاص کر ہمو بندغاک ہمو کہ ریاست نا دا پالسی تا زی تنقید کیرا۔پاکستانی حکومت اے دا خلاف ورزی تے خلاس کننگ و متاثر مروکا بندغاک و اوفتا خاندان اے انصاف تننگ اے نا کام مننگ اے تنقید مریسا اے۔ دا حد اسکان پنی ہا سیاست دان علی وزیر ، پاکستان نا قومی اسمبلی نا رکن ، پی ٹی ایم و وزیرستان نا نمائندگی اے کننگ ٹی اے ، اودے ہم غیر قانودی وڑ ھٹ النگک و پدا بے عزت کننگک۔ داڑے اَسے عامو بلوچ۔پشتون،سندھی، کشمیری یا گلگت بلتستانی نا حالیت نا نوم تینٹ اندازہ اے خل بو اوفتا زند امر گدرینگوے۔
ھو پارے ای اقوام متحدہ نا کنڈ ھن دا ایت نا اہمیت نا زی آ اننا پاننگ خواوا کہ ھو بلوچستان و کے پی کے و ایلو مظلوم اِنگا قومتا بندغی حقاتا سنگین انگا خلاف ورزی تیکِن عملی و قدم اَس ارفے۔دا حالیت اے انصاف ھٹ مونا دننگ کن اقوام متحدہ و ایلو جہانی ادارغاک تیکِن ضلوری اے کہ ھو دا بندغاتا ایت آتے و رپوٹاتے مونا اتیر ہمو کہ بندغی حقاتن متاثر مسون او۔ جہانی برادری اے بندغی حقاتے مون اے اتنگ کن توار چست کروی اے و دادے تورنگ کِن ہر وڑو کاریم ھن چک و پد مروی اف۔
چیرمین ڈاکٹر نسیم پارے جہانی برادری نا چپی ھن پاکستان اے ظلم کننگ نا موقع اَس ملان اے، ھو پارے مظلوم انگا قوماتا خوشحالی کن کارم کروک پی ٹی ایم و ایلو تنظیماتے تینا توار اے چست کننگ و اوفتیٹی بدلی اتنگ و مونی اِننگ کن جہان نا ھواری نا ضرورت اے۔جہانی میڈیا پاکستان ھٹی بندغی حقاتا خلاف ورزی و مظلوم انگا قوماتا سیاسی جُہد نا بارسٹ رپوٹنگ کننگ باز ضلوری اے ۔ داڑن بیدس جہانی این جی اوزاک و بندغی حقاتا تنظیمات تون ھوار بندغی حقاتا خلاف ورزی تے بلو حوالہ سیٹی دستاویزات آ شگل ھٹ مون اے اتوی اے ۔
ھو دا موقعے مظلوم قوماتا نیام ھٹ اتحاد و اَسے جاگہ مننگ نا بارسٹ پارے پاکستان ھٹی نہ صرف بلوچ و پشتون داڑن بیدس سندھی، کشمیری و گلگت بلتستانیک ھم انا وڑ انگا جبر اتون مون پہ مون او اوفتے ھم تینا شناخت ، ثقافت و زبان آتن محروم کننگان اے۔ ننا سیاسی و سماجی کاریمتے بند کننگان اے ، ہمو بندغاک کہ دا ظلم نا خلاف توار خلنگ نا جراءت اَس کیرا اوفتے بیگوا کننگک یا پدا کسفنگ ھن ھم اُورے کپسہ۔
’’داوڑ نا جبر ھن بچنگ کن نن کے ضلوری اے کہ نن اَسے جاگہ مرین دشمن نا خلاف اسیجاگہی ھٹ تینا تاریخی روتغاتون سلین و اَسے جاگہ کاریم کین‘‘
ھو بلوچ و پشتون نا تاریخی انگا سیالی و پیشن نا قوضہ گیر تا خلاف اسیجاگہ جہد کننگ نا بنیاد اَس جوڑکننگ نا پیشکش اے کریسا پارے بلوچ و پشتون نا ثقافتی، سماجی و تاریخی سیالی تن اَسے بلو تاریخ اَس پوراے و سال ہا سال اسٹ ایلو تون خڑکی و اَسے جاگہی مسون اے۔ھو انگریز حملہ آوارک مریر یا ایلو قوضہ گیرک مریر جنگ و امن تا وختا اَسے جاگہ بش مسون او و ہروخت اسٹ ایلو کن تینا دروزہ تے ملان او ۔ سوویت افغان جنگ نا وختا افغانستان نا بازنگا مہاجرینک بلوچستان ھٹی بسور پناہ الکور و بازنگا بلوچ مہاجرینک افغان مخلوک نا حمایت اے الکور و افغانستان ھٹی محفوظو پناہ پٹار و زنڈار۔
