بلوچ نیشنل موومنٹ نا بنجاہی کابینہ نا ارٹمی مُچی چیئرمین نسیم بلوچ نا بھلُّنی ٹی اڈ تِننگا ہرافتیٹی پارٹی نا کاریمک، خطہ و عالمی و جہانی سْیاسی صورت حال و جہانی طاغت آتا چِٹ چِکھنگ آ مُچی ٹی ساڑی آ باسک آک تفصیل ئٹ گپ و تران کریر۔
کابینہ نا مُچی ٹی پارٹی نا مونی دننگ کن ہم اہم ءُ فیصلہ کننگا۔
کابینہ نا مُچی آن تران کریسہ چیئرمین نسیم بلوچ پارے کہ آزاتی نا جہد ئٹی بی این ایم اسہ اہم ءُ کڑد ئس ادا کننگ ءِ بلوچستان و بلوچستان آن پیشن اسہ مُرغن ءُ ڈائسپورہ ئسے نا دروشم ئٹ پارٹی باسک و کیڈر آک بلوچ قومی مقدمہ کن بھاز خواری ئٹ جہد کننگ ءُ و بلوچ راج ئنا توار ءِ دنیا نا کُنڈ کُنڈ آ سر کننگ ءُ بی این ایم نا مُستی دننگ و بلوچ راجی آجوئی نا پروگرام ئے مزل آ سر کننگ کن ننا لیڈرشپ کیڈر و باسک آک تینا جان آتے قربان کرینو و وقربانی تا دا سفر اینو اسکان ہم برجاء ءِ ۔
چیئرمین نسیم بلوچ پارے کہ اسہ کنڈ آ آجوئی نا جہد برجاء ءِ ہرادے بلوچ راج ئنا گیشتِری نا حمایت دوئی ءِ تو ارٹمی کنڈ آ پِن ئنا قوم پرست آک مَنہ سطحی مراعات و مفاد آتیکن بلوچ نا دتر و بلوچ راجی وسائل آتا سودا ءِ خلیسہ مون ئنا مونی کھٹنگ ءُ اوفتے یات کروئی ءِ کہ وخت مدام اسہ وڑ مفک اگہ اینو ننا دشمن طاغتور ءِ دشمن تو وسائل نا گیشتِری ءِ دشمن نا فوج و کھل ادارہ آتیتو اوار بلوچ راج ئنا برخلاف حرکت ئٹی ءُ و بلوچ نا چُک چینی ٹی گھٹ ءُ ولہ دشمن نا دا طاغت نا ماڑی دروغ دھوکہ تننگ و غیر ئنا بیساکھی تا سلوک ءِ پن ئنا قوم پرست آک ہندا اومیت آ دشمن تو سلوک ءُ کہ دشمن نا طاغت مدام سلو و او دشمن نا مراعات و مفاد آتا سمَنْدر یٹی مدام ٹُبی خلور ولہ اوفتے دا سما اف کہ او وخت مُر اف کہ دشمن نا طاغت نا دا ماڑی سَلا بَلا شیف مرو و بلوچ راج سہبمَنْد مرو انتئے کہ بلوچ نا تحریک تاریخی راست آتے آ سلوک ءِ بلوچ ہچو توسیع پسندی یا انتہا پسندی نا بجائے جہانی اصول و تینا راجی اقدار آتا عین مطابق جنگ کننگ ئٹی ءِ ۔
او پارے کہ بی این ایم نا کھل بشخ آک فعالیت ئٹ تینا کاریم تے کننگ ئٹی ءُ دا ٹی ہیومن رائٹس بشخ، انفارمیشن بشخ، ویلفیئر بشخ، و تربیئتی بشخ یات کننگ نا قابل ءُ دا بشخ آتا بدولت بی این ایم نا خذمت آتا دائرہ بھاز شابیت یکجہہ و برم تِروک ءِ ولہ دا نا مننگ نا باوجود ننے وخت ئنا خواست آتے ہُریسہ جْوان انگا پالیسی و حکمت عملی تا ضرورت ءِ انتئے کہ خطہ و جہانی صورت حال بھاز ترندی ئٹ بدل مننگ ءُ ننے دا تبدیلی تان فائدہ ہرفنگ کِن تینا پالیسی و حکمت عملی تا وخت ئتو ہمگرنچ مننگ بھاز ضروری ءِ ۔
چیئرمین نسیم بلوچ پارے کہ بی این ایم نا مدام دا خواست و کوشست مسُنے کہ بلوچ راجی تحریک اواری یکجہی و اشتراک عمل مرے ہرا تحریک نا اہم انگا ضرورت ءِ دا بشخ ئٹی ننا سربر آک مدام کوشست کرینو بلکہ مسکوہی سیکٹری جنرل ڈاکٹر منان نا شہادت ہندا سلسلہ ٹی سفر نا وخت آ مس نن خواہنہ کہ اواری ئے جْوانو بُن داو ئس تِننگ مرے انتئے کہ سطحی آ اتحاد نا برم پین پننگ و مات کُننگ نا دروشم ئٹ مونا بریک ہراڑان قوم ئٹی گیشتر مایوسی ودی مریک و مُستی اتحاد و اشتراک نا ہچو کسر ئس سلیپک نن راجی تحریک نا کھل اسٹیک ہولڈر آتیتو اتحاد کن حال وحوال کننگ اُن دا سلسلہ ٹی اسہ تفصیلی ءُ ڈرافٹ ئس کھل آ مون تننگانے ہرانا ورندی بننگ آن پد عملی رابطہ نا بِنا مرو۔
کابینہ نا میٹنگ ئٹی جتا جتا آ معاملہ آتا فیصلہ کننگا ہرافتے سرکولر نا ذریعہ ئٹ پارٹی نا ذیلی بشخ آتے اسکان سر کننگو۔
