پاکستان نا ساڑی آ حالیت نا بارت ئٹ بلوچ نیشنل موؤمنٹ نا چیئرمین ڈاکٹر نسیم بلوچ تینا شنگ کروک بیان ئٹی پارے کہ پاکستان نا ساڑی آ حالیت آک ناگمان آ ودی مروکو افس، بلکہ دا حالیت قوم آتیا کوزہ، قوم و قومی وسائل آتا لُٹ، مذہب نا استحصال و نوآبادیاتی مسخت آتا کارمرز کون آ کاریم تا بھرم ءِ۔ پاکستان مزل و سمت آن پد تموکو اسہ اندنو بے مہار ءُ ریاست ئسے ہرانا نہ تاریخ اس ارے و نئے تہذیبی پد ندارہ۔ دا ریاست تینا جوڑ مننگ نا دے آن عیلاقہ نا ایلو قوم آتا ڈغار تیا کوزہ کریسہ تینا نوآبادیاتی منصوبہ و مسخت آتے مذہب نا چادر ئٹی ڈھکیسہ منیفنگ کن دو تے لانچانے۔
چیئرمین ڈاکٹر نسیم بلوچ پارے کہ پاکستان دا وخت آ جتا ویل آتا ولر ئسے و بلوچ پنجابی کوزہ گیریت غٹ آن بھلا ویل ءِ ہرا تینا سوگو دروشم ئٹی سر مریسہ ہیت و گپ ئنا ہند آن پیشتمانے۔ دا نا حل بیرہ تومکا تیان اسٹ نا ایسری نا دروشم ئٹ منکن ءِ۔ پاکستان پُہہ مریک کہ بلوچ و پاکستان نا ویل ءِ توفک نا زور آ نسل کشی و استحصال نا زریعت ئٹ ایسر کننگ کیک۔ دا بارت ئٹ پاکستان نا تیبہ زور عسکری تاغت نا بےکچ کارمرز آٹے۔
او تاریخ نا حوالہ ہم تس و پارے کہ بنگالی نا تضاد نا ایسری آن گڈ ہم پاکستان نا ویل آک ایسر مننگ افس بلکہ دادے جاندم وختی وڑا پلمندہ تس تانکہ داڑان تینا مسخت آتے پورو کننگ کن کارمرز کننگ مرے۔ جاندم تینا ضرورت آتا بدل ئٹی پاکستان ءِ معاشی و عسکری ٹیکنالوجی نا پڑ آ بے کچ کمک کرے۔ پاکستان ہمو کمک ءِ بلوچ نا برخلاف کاریم ئٹ ہیس ولے اوڑان بیدس او بلوچ تحریک نا ترندی ءِ کم کننگ ئٹ سر سہب متو۔ داڑان پاش مریک کہ بلوچ قومی تحریک بےسہب مفروکو دروشم اس ہلکنے۔
ڈاکٹر نسیم بلوچ پارے کہ اگہ کس دا پُہہ مریک کہ پاکستان نا ساڑی حالیت وختی چک ءُ تاڑ ئسے تو دا حالیت و تدینی تا رد ءُ تجزیہ ئسے انتئے کہ بلوچ، پختون، سندھی و ایلو کوزہ مروک قوم آتا ویل آک سوگو دروشم ہلکنو و داسا ایسر مننگ کپسہ، ہرافتا زہم آک پاکستان نا ادارہ و فوج ءِ ہم تہہ آن ونڈ کرینو و فوج ئنا تہہ ئنا ونڈ مننگ، سیاسی چک ءُ تاڑ مالیاتی کاختی نا دروشم ئٹ مونا بسنے۔ ریاست دیوالیہ مننگ نا ہند آ سلوک ءِ ولے پاکستان دا پُہہ مریک کہ تاغت نا زریعت ئٹ کوزہ مروک قوم آتے تورو۔ پاکستان نا دا سوچ تاریخ آن نابلدی ءِ انتئے کہ ہرا وخت ویل آک تینا بنداوی مرحلہ آن مُستی بریرہ تو اوفتے عسکری تاغت ئٹ ایسر کننگ مفک۔
