بلوچ نیشنل موومنٹ نا مرکزی کمیٹی نا مسٹمی مجلس چیئرمین ڈاکٹر نسیم بلوچ نا بھلُنی ٹی مَس ہَراٹی سی سی ممبر و ایلو کُھل ممبر آک اوار مسُّر ۔ ایجنڈا ٹی پارٹی چیئرمین نا تران ، ڈسپلن نا خلاف ورزی تے آ تادیبی کاروائی،خطہ و بین الاقوامی سیاسی صورت حال آ بحث ، سوشل میڈیا نا اہمیت و ننا پالیسی ،تنقید ،پارٹی کاریمک و آئندہ لائحہ عمل اوار اسُر۔ ہَرافتے آ ممبر آک تفصیلی بحث کریر و اہم ءُ فیصلہ ہرفیر ۔
مرکزی کمیٹی نا اجلاس آن تران کریسہ چیئرمین پارے کہ مرکزی کمیٹی قومی کونسل سیشن آن پد پارٹی نا کُھل آن با اختیار و پالیسی ساز آ ادارہ ئے۔ دا ادارہ ٹی نن ہمو موضوع تے آ ہیت کینہ ہرافتا لس سرکل تیٹی ہیت کننگ ممکن اف ۔ داڑے بحث آن پد ہراکہ فیصلہ آک مریرہ او پارٹی نا اجتماعی فیصلہ آکو و کُھل کارکن آتے آ اوفتا پاسداری فرض ئے۔ داڑے ممبر آک تبادلہ خیال ، و بحث مباحثہ آن تحریک نا تقاضہ و پارٹی پروگرام نا فعالیت کے وخت ئتون ہم آہنگ و پوسکن ءُ پالیسی تیار کیرہ ۔ داسہ نا دا فیصلہ آک ننکے مستقبل ئٹی کاریم کننگ ئٹی بھاز آسانی ودی کیرہ۔
او پارے کہ خَدو مروکا سیشن ئٹی پوسکُنو طریقہ کار وضع کرین۔ پارٹی نا جتا آ شعبہ تے آ ادارہ تشکیل تننگا ، ہرافک جوان کاریم ئٹی ءُ ۔ ہَراوخت کہ نن کُھل تینا تینا فرض آتے آ توجہ تین تو دا غیر ضروری آ بحث آک مباحثہ نا حصہ مفسہ ۔ ہراوخت کہ کاریم تے آن توجہ مُر مریک تو ننا توانائی ضائع مریک و آزاد خیالی ودی مریک ۔ و ہندا پارٹی نا نسخان نا سوب مریرہ ۔ لہٰذا کُھل کارکن ، کیڈر و لیڈرشپ تینا کاریم تے آ توجہ ایتر ۔
بلوچستان نا صورتحال نا زی آ گپ کریسہ پارے کہ بلوچستان ئٹی زوراکی گیشتِر مننگے ۔ ہندا حد اسکان کہ پنجاب نا تعلیمی ادارہ آتیٹی نودربر آک رکھوک افّس ۔ بلوچ تینا تاریخ نا بدترین آ نسل کشی و اجتماعی سزا تون مون تننگے ۔ دا ظلم و جبر ئے مخلوق نا مون آ ہتنگ ئٹی پانک و زرمبش اہم ءُ کڑدار ئس ادا کننگ ئٹی ءُ و سفارت کاری نا میدان ئٹی سنگت آک بھاز جوان ئنگا کارکردگی نا مظاہرہ کرینو ۔
او پارے کہ ، دشمن اینو بلوچ نا تحریک ئے نسخان تننگ کن بھلا حکمت عملی تے آ عمل کننگ ئٹی ئے ۔ دشمن ہندا کوشست ءِ کننگ ئٹی ءِ کہ نیشنلزم نا واضع آ نظریہ و بلوچ قومی اقدار ئے مسلسل پروپگنڈہ و تینا درآمدی نظریات آن آلودہ کے ۔ اینو پاکستان ہر وڑ ئنا چم کارمرز کننگے ، داٹی اسٹ مذہب نا کارمرزے ہم کننگے ۔ اینو بلوچ قومی تحریک ئے کاؤنٹر کننگ کن پاکستان جامع منصوبہ ئٹ بلوچستان ئٹی اسلام نا ورژن ئے ہتنگ ہرانا اسلام تون ہچو سیالی ئس اف ولے مذہب نا پن آ مخلوق نا جوزہ آتون گوازی کننگے ۔
چیئرمین پارے کہ نیشنلزم تینا تاغت و توانائی ئٹ دا نظریہ آن پاکستانی نا کُل درآمدی نظریہ آتے و پاکستانی ورژن نا مذہب ئے رد کرینے ۔ و بلوچ دادے نفرت نا نگاہ ئٹ ہُرک ہراکہ پاکستان نا مسخت آتے کے کارمرز مننگے ۔ دانا مثال دادے کہ او ننا مونا ٹے کہ پنجاب ئٹی سریلنکن ئسے آ دروغ او توہین نا الزام خلیسہ اودے زندہ ہُشار ۔ و بلوچستان ئٹی رؤف نا زی آ ہندا الزام آتے خلنگا ۔ و الس دانا برخلاف احتجاج کرے ۔ و ہندا گوائی تس کہ پاکستان نا مسلط کروکا نظریات آتے کن ہچو جاگہ ئس اف و بلوچ اسل اسلام نا روح آ عمل پیرا ئے و قومی تاریخ ئسے نا خواجہ ئے ۔ داڑا مطمئن مروئی افک انتے کہ پاکستان مسلسل کوشش کننگے و دادے نیشنلزم و آزادی نا تقاضہ کن انقلابی تعلیم سر کننگ نا زی آ کاریم کننگ نا ضرورت ئے۔
او سیاسی حالیت نا زی آ ہیت کرسا پارے کہ بلوچ تحریک مُدامی شیفی و بُڑزی تیان گدرینگے ولے بیست سال آن تحریک ئٹی اسہ نظم ءُ ضبط ئس ارے کہ اینو پاکستان بے باوری نا گواچی ئے۔ پاکستان نا تہہ ئنا جیڑہ آک صاف پاش مننگ ءُ ۔ پاکستان سیاسی، معاشی، عدالتی و آئینی بحران نا گواچی ئے۔ ہندُن فوج تہ ہم تہٹی ونڈ ئے ہرانا جتا آ بشخ آک جتا انگا پارٹی تا ذریعہ حکومت کننگ نا تجربہ کیرہ۔ داڑان دا چاننگ مریک کہ پاکستان تینا ریاستی حیثیت ئے گوہانے۔ دا حالیت بلوچ آتون اوار کُل اکن موقع ودی کننگ ئے۔ داسا ننا زی آٹے کہ نن داڑان اخس فائدہ ہرفنگ کینہ۔
او پارے کہ پاکستان بلوچ تحریک ئے چھٹفنگ آن بے سہُب مسُنے ۔ ہندا سوب آن ہنوکا بیست سال آن دشمن جتا جتا ءُ طریقہ کار تینا کننگے۔ داڑان چاننگِک کہ ریاست بلوچ راج ئے آجوئی نا خواست آن مُر کننگ ئٹی بے سُہب مسُنے و وار وار تینا طریقہ کار ئے بدل کننگ آن چاننگک کہ دشمن نا ہچو حکمت عملی ئس چاننگ مفک و بلوچ جوان او پوزیشن ئسیٹی ئے۔ دا جوان اِنگا پوزیشن ئے ننے تاریخ، تحریک ئٹی پارٹی و تنظیم آتا کڑدار بلوچ راج ئنا بے مول آ قربانیک تیرہ۔
چیئرمین ڈاکٹر نسیم بلوچ پارے کہ بلوچ نا رہا سوشل میڈیا آن بیدس تینا ہیت ئے سر کننگ نا پین ذریعہ اف۔ ہراڑے سوشل میڈیا نا کیہی فائدہ آک اریر نن دا میڈیم نا ذریعہ ئٹ تینا ہیت ئے تینا بندغ آتے و جہان ئے سر کننگ کینہ۔ ایلو نیمہ آ دانا غلط کارمرز کننگ نا کیہی نسخان آک اریر دانا تجربہ ننے مسنے ولے داسا ای خننگ اُٹ کہ سوشل میڈیا ئےغلط کارمرز کننگ آن پوسکُنو گڑاس مونی بسُنے۔ ہراڑسکان ذمہ واری، تنظیم و اسٹیک ہولڈرز آتا ہیت ئے ، نن اوفتے پرہیز کننگ نا پارینُن ۔ و نن ایلو تنظیم آتیان اُمیت کینہ کہ اوفک سوشل میڈیا ئےجوان کارمرز کیر ہندن ننا زی آ ذمہ واری مریک نن سوشل میڈیا نا جوان انگا کارمرز ئے مونی ہتین۔اسہ ذمہ وار ءُ پارٹی سینا حیثیت ئٹ نن تینا زور ئنا زوال کننگ ئے برداشت کننگ کپنہ۔ نن اسہ بھلو دشمن ئسے تون مون تننگ اُن و اسہ بھلو مقصد ئسے کن کاریم کننگ اُن ۔ بھلا مسخت ئے ہلنگ سیاسی پختگی، شعوری بالیدگی و جوان اِنگا خیال آتیئٹ سختی تون کاریم کننگ المی ئے۔ دا عظیم انگا مسخت کن ہزار آتا کچ ئٹ ننا بندغ آک قربان مننگ ءُ، زندان تیٹی اذیت سگنگ ءُ ننے دا قربانی تا ترجمانی ئے سطحی و غیر سنجیدہی نہ بلکہ سیاسی شعور و مہذب طریقہ ئٹ کننگ خوائک۔ تحریک تون تفوک کُھل فریق آتے چاننگ خواہک تینا سیاسی پختگی،شعوری بالیدگی و مہذب طریقہ بیان ئٹ نن جہان نا مونا تینا راجی مقدمہ ئے مونی ہتنگ کینہ۔
مرکزی کیمٹی نا اجلاس ئٹی اہم ءُ فیصلہ کننگا ہرافتے سرکولر آتا ذریعہ ئٹ باسک آتے اسکان سر کننگ مرو۔
