شال: مبارک قاضی نا پنجاہ سال ئنا شاعری نا سفر بلوچ نا رنگ تون خُلوک مسہونءِ اننا وجہ ئن اینو ہونا کہنگ اَن بلوچ قوم سوگ ھٹی مسہونءِ ۔
دا اِیت آتاءِ بلوچ نیشنل موومنٹ نا پارغن اڈ تِروکا ، ایکٹیوسٹ اسمبلی ،( جھدکارانی پتر ) نا نشست سین خطاب کریسہ پارٹی نا چیرمین ڈاکٹر نسیم بلوچ پارے۔
پارٹی نا سینئر جوائنٹ سیکریٹری جنرل چیرمین کمال بلوچ نا پارغن اڈ تروکا دا پروگرام نا بندات مبارک قاضی نا احترام ئٹی اِیرا منٹ چپی اَن شروع مَس۔بی این ایم نا ممبراک و کابینہ نا ذمہ داراک مبارک قاضی نا کِرد و ہونا ادبی خزمت کِن خراجءِ تحسین و خراجءِ عقیدت پیش کننگا۔
ڈاکٹر نسیم پارے ھشتاد نا دہائی اَن الیس اینو نا دے اِسکان ، مبارک قاضی نا پنجاہ سال نا شاعری نا سفر ئٹی ہونا شاعری انقلاب ، مزاحمت و بلوچ نا رنگ ئٹی خُلوک مسئونءِ۔ قاضی امو بندغاتن مسہونءِ کہ ھو تینٹ ھم قومی سیاست ھٹی ھوار مسہونءِ ،زندان ئٹی ، تشدد آتے برداشت کرینءِ۔ ہونا جہد تون ھواری نا اَسے نشانی ئس ہونا بے مثل انگا مار ڈاکٹر کمبر قاضیءِ کہ ھو ھم مزاحمت نا کسرءِ الک و شاعری ئٹی ھم تینا اہلیت نا تجربہءِ کرے۔ہودے مبارک قاضی نا نیمغ اَن تعلیم و تربیت و حوصلہ افزائی رسیگاسَس۔دا ھم قاضی نا مزاحمت تون ہواری نا اَسے مثال اَسے۔
ھو پارے اینو سوشل میڈیا نا زمانہءِ ، نن خننگ ئٹی اُن کہ بلوچ قاضی نا مرک اَن اخس پریشانءُ۔ امو قاضی کہ بازا کردار تا مالک اَس ، اموکہ تینا اِیتءِ مون پہ مون پاروک اَس اَسکا۔ھو ہر وخت تینا اِیتءِ بغیرس خلیسن پورا جوزہ اَٹ تخاکءَ۔ اَسِٹ نا پروا کننگ ، دروغ تڑنگ و غیبت کننگ قاضی اَن باز مُر اَس۔ھونا اننا جوانی تا وجہ ئن بلوچ مخلوک ھودے دوست تخاسوس۔ ھونا ایلو کاریمتءِ بندغاک پاریرا کہ ھونا دُوٹی ہر وخت شراب نا بوتلءِ چرینگک ، امو اِیت آتے اینو مخلوک گیرام کرینءِ۔ انتکہ ھوٹی پین ہزارہاتءَ کچ ہٹی جوانی مسہونءِ امو دا وڑنا گڑاتءِ ڈکاسُر۔
بی این ایم نا چیرمین مبارک قاضی تون محبت نا مثالءِ تریسہ پارے اینو نُم خنارے پسنی ٹی انجمن تاجران ھونا احترام کِن تینا دکانتے بند کرے ، دا کارم پورا بلوچستان ٹی مروی اَس۔ زندگی نا ہر پِڑ اَن تفوکا بندغاک ھونا مرک اَن غمگین مسہونءُ۔ھونا عظیمءُ کردار اَس مسہونءِ کہ اینو ھودے دون یاد کننگک۔
