جینوا : بلوچ نیشنل موومنٹ نا پارغن اقوام متحدہ نا انسانی حقوق کونسل نا 54 می اجلاس نا وختءَ مُسءِ دے نا آگاہی مہم ایسر مَس۔ دا مہم نا انتظامءِ بلوچ نیشنل موومنٹ نا شعبہ امور خارجہ نا نیمہ اَن اڈ تیننگاسس داٹی بی این ایم نا چیئرمین ڈاکٹر نسیم بلوچ ، خارجہ سیکریٹری ھمل حیدر ، سینٹرل کمیٹی نا ممبرآک حاجی نصیر بلوچ ، فہیم بلوچ ، حاتم بلوچ و نیاز بلوچ تون ھوار بلُو کَچ سِے آ کارکناک بازنگا ملک آتن جینوا ٹی اسیجاگہ مسوسور انتیکہ دا اہم انگا موقعءِ بلوچستان ئٹی مروکا انسانی حقوق نا حالیتءِ دنیا نا مونا پاش کننگءِ۔
بی این ایم نا شعبہ امور خارجہ نا ممبر نیاز بلوچ نا پاننگ اَس کہ بروکا سال مارچ نا تُوے بی این ایم بلوچستان نا انسانی حقوق نا حالیتءِ جنیوا ٹی زیات بُلون کننگ کِن اگاہی مہم چلائفنگ نا کوشست کروے تنکہ بلوچستان نا حالیت اَن دنیاءِ زیات با خبر کننگ گے۔
دا مہم نا وختءَ ڈیرہ بگٹی ٹی پاکستانی فوج نا مروکا کاروائیک ، بلوچ نسل کشی ، جبرئٹ بیگوا انگا بندغاک و بغیراس عدالت سینا حکم اَن کسِفنگ آک بلوچ لیڈرآتون ھوار ایلو بندغاتءَ بارسٹ اگاہی تننگاءَ۔
مُسءِ دے مہم نا وختءَ بروکن چیئر نا ری آ احتجاجی مظاہرہ کننگاءَ داٹی بلوچستان و سندھ نا آجوہی نا حقءِ نعرہ خلننگاءَ۔ بی این ایم نا احتجاجی مظاہرہ ٹی بی این ایم نا لیڈر آتن بیدس سندھی قوم پرست لیڈر لکو لوہانہ ، بلوچ قومی تحریک نا دوست خوا انسانی حقوق نا سرگرم انگاءَ باسک نورِ مریم کنور ہم ساڑی اَس ھو تینا اِیت و گپ آتے دا احتجاجی مظاہرہ ٹی ہم شِنگ و تالان کرے۔
دا موقعءِ مقررین آک پاریر گدرینگوکا بازنگاءَ ہفتہ غاتَن پاکستان نا پوج ڈیرہ بگٹی ئٹی بلوچ نا نسل کشیءِ کننگ ئٹیءِ اَسے جاغہ اَس تینا قوضہ ٹی الکونے۔درزن آتا کچ اَٹ بندغاتءِ بیگوا کننگانءِ و مخلوک نا ہُورا و جاغتے باز تاوان تسونءِ۔
بلوچ آتا زی آ پاکستان نا زالیمیک داسئنا افس بلکہ اموتم کہ پاکستان بلوچستان نا زی آ قوضہ کرے بلوچ آتا مُچ بندغی حقاتءِ نتءَ کیرغا کریسا اوفتون وڑ وڑاَٹ ظلم کریسا کرے۔
ھو پاریر پاکستانءِ بلوچستان نا وسائلاک پکارءُ ہودے بلوچ قوم نا مون روی و ہُوفتا مفاداتون ہچو غرض اَس اَف۔ ریاستءِ پاکستان نا اختیاداراتءِ بلوچستان نا زلورتءِ نہ کہ بلوچ آتا تنکہ ھو وسائلاتءِ آسانی اَٹ النگ کے۔بلوچستان نا آجوہی اَن بیدس اودئے انسانی حقوق نا رکین اِنگ ہچ مننگ کپپک۔ اننا وجہ اَن بین الاقوامی برادریءِ نن پانا کہ ھو بلوچ نسل کشیءِ تورِنگ کِن بلوچ قومی آجوہی نا تحریک تون مدت و کمک کے۔
ھو پاریر بلوچستان اَن بیدس سندھ و پشتونخوا ٹی ہم سندھی و پشتون آتون ریاست زالُمی کننگ ئٹیءِ۔دا خطہ ئٹی محکوم انگاءَ قوماتءَ آجوہی اَسے پُر ایمِنءُ خطہ سے نا ضمانت مننگ کیک۔ آزات بلوچستان و سندھو دیش نا جوڑ مننگ ہرتوما قوم تیکِن ترقی و وش حالی تا کسرتے مَلُوءِ ۔پاکستان نا قوضہ اَن ہرتوما قوماتءَ سماج مذہبی انتہا پسندی نا شکار مننگ ئٹیءُ امونا بنیات پنجاب ئٹیءِ ولے ھو تینا روتغ آتے محکوم انگاءَ سماج تیٹی تالان کرینءِ تنکہ دادے قومی شعور ءِ دبائفے و دافتے پستی نا کنڈا دے و پاکستان نا نام نہاد انگاءَ “دو قومی نظریہ “ اے طاقت ایتءِ۔ پاکستان نا اننا نام نہاد انگاءَ دو قومی نظریہ اَس امونا وجہ اَن دا خطہ ٹی شدت پسندا بندغاتءَ حوصلہ افزائی مَس امونا بد انگاءَ شگل اینو نن تُون مون پہ مونءِ۔ دادے رول بیک کننگ اَن بیدس نن ہچ وڑئسیٹی بچنگ کننگ کپپرون۔
