بلوچ نیشنل موومنٹ نا پارغن شہدائے بلوچستان نا موقعءِ بلوچستان ، برطانیہ ، جنوبی کوریا ، جرمنی و نیدرلینڈ ئٹی تقریباک اڈ تننگار۔ بلوچستان ئٹی بی این ایم نا پارغن دا تقریباک مشکے ، تربت و گوادر ئٹی اڈ تننگار ہراٹی بی این ایم نا ممبراک بشخ الکور۔
بی این ایم 13 نومبر نا حوالہءِ میڈیا کمپئنءِ یکم نومبر اَن شروع کرینءِ۔ دا حوالہ ٹی بی این ایم نا پارغن ملٹی میڈیا و پنچ زبان آتیٹی اَسے چُنکو ڈاکومنٹری اَس ہم شِنگ کننگان داڑن بیدس بلوچ شہداتا سوشل میڈیا اکاونٹ آتے بَلو کچ سَیا میڈیا مہم چلائفِنگان۔ دا مہم ئٹی بی این ایم نا میڈیا و آئی ٹی ٹیم تون ھوار سدآتا کچ ئٹی مبرآک بلوچ شہیدآتا بارسَٹ مواد شِنگ کریر امو اینو اِسکان مریساءِ۔
پیشن ملکءِ بی این ایم نا بنکی پروگرام برطانیہ نا دارالحکومت لندن ئٹی مَس ہراٹی بی این ایم نا جونیئر جوائنٹ سیکریٹری حسن دوست بلوچ ، بلوچ لکھاری ڈاکٹر نصیر دشتی ، ورلڈ سندھی آرگنائزیشن نا رہنما ڈاکٹر لکھو لوہانہ و ایلو دوست آک خطاب کریر۔ پروگرام ئٹی بَلو کچ آسیٹی بی این ایم نا کارکناک و بلوچ قومی تحریک نا عمدردآک بشخ الکور۔ دا پروگرامءِ سوشل میڈیا نا بازا پلیٹ فارم تیٹی لائیو شِنگ کننگاءَ۔
بلوچستان ئٹی بی این ایم نا پارغن پروگرام آتا بندات 11 نومبرءِ شہید سلیمان آرگنائزنگ باڈی تربت نا نیمہ اَن اڈ تروکا ریفرنس اَن کننگاءَ ھونا صدارتءِ شہید سلیمان آرگنائزنگ باڈی نا صدر کرے۔
مقررین آک خطاب کریسا پاریر کہ انگریزآک تینا پوجی مفادآتیکن بلوچستانءِ حملہ کریر و بلوچستانءِ قوضہ کریر۔ ولے بلوچ قوم ہچءُ وخت اَس قوضہ گیرآتا قوضہءِ منیتوُ و یک کَش آ مزاحمت کریسا کرے۔
12 نومبرءِ شہید انور ایڈوکیٹ کیچ گوادر ھنکین نا نیمہ اَن ھنکین نا آرگنائزر بابا جی آر نا صدارت ئٹ اَسے پروقارءُ تقریب اَس اڈ تننگاءَ ارانا مہمانءِ خاص بی این ایم نا سابقءَ سینٹرل کمیٹی ممبر یوسف بلوچ اَس۔ دا پروگرام ئٹی بی این ایم نا وائس چیرمین ڈاکٹر جلال ہم ساڑی اَس پروگرام نا نظامت نا پرض آتے ھنکین نا ڈپٹی آرگنائزر جیھند بلوچ ایسر کرے۔ دا تقریب ئٹی پاٹی نا سابق سینٹرل کمیٹی نا ممبر آک رژن بلوچ و شئے بھار ہم شہید آتے یات کریسا تینا ایت و گپ آتے درشان کریر۔
ھو پاریر بلوچ قوم نا زی آ بلوچستان نا ہر کُنڈا ظُلم و جبر مریساءِ ننے دا ظالمی تا خلاف اَسِٹ مروہیءِ و بلوچ قومی جنگ ئٹی تینا بشخءِ شاغوہیءِ ۔ بلوچ قومی تحریکءِ آجوہی نا سرسوبی اَن بیدس بلوچ قومءِ زندہ مننگ نا پین ہچُو کسر اَس اَف۔
13 نومبرءِ بی این ایم مشکے ھنکین نا نیمہ اَن بی این ایم مشکے ھنکین نا آرگنائزر استاد مھران بلوچ نا صدارت ئٹی تقریب اَس اڈ تننگاءَ اراٹی بی این ایم نا ویلفیئر سیکریٹری محمد اقبال بلوچ و مرکزی کمیٹی نا ممبر چیف اسلم بلوچ ساڑی اسورا۔انون ایلو مقررین آتیٹی ریڈیو زرمبش نا شعبہءِ بلوچی نا براڈکاسٹر و بلوچی زبان نا پنی آ لکھاری سرباز وفا ، ریڈیو زرمبش شعبہءِ براہوئی نا ڈائریکٹر ذیشان منان ، مشکے ھنکین نا ڈپٹی آرگنائزر زہرہ ، شہید ڈاکٹر منان یونٹ نا سیکریٹری ریحان بلوچ ، شہید راشد یونٹ نا سیکریٹری شاویز بلوچ ، نوکجو مشکے یونٹ نا سیکریٹری تلار بلوچ خطاب کریر۔
ھو پاریر اینو دنیا ٹی بلوچ قوم اَسے قومیءُ حیثیت اَس تخِک دا بلوچ قوم نا ہمو شہیدآتا قربانی تننگ نا وجہ اَن اے ہموکہ قومی آجوہی کِن تینا جان آتے ندر کریر۔
پیشن ملک آتیٹی پروگرام آتا بندات جرمنی چیپٹرز نا نیمہ اَن مَس۔ جرمنی ٹی بی این ایم نا پروگرام آک اِیرا جاغہ ٹی مسہور۔ پِر نا وجہ اَن پروگرام آک مچءِ باز متاثر مسہور ولے کارکناک بلو کچ سیہا شہیدآتے خراج عقیدت پیش کننگ کِن روڈ آتے بسہور شہیدآتا پوٹوتا مونا موم بتی لگیفیر۔ جرمنی ٹی دا پروگرام آک برلن و ہنوفر ٹی مسہور۔ جرمنی ٹی بلوچ شہیدآتا یات ئٹ تقریب آتا دا سلسلہ غاک داسہ ہم مننگ ئٹیءُ۔ دا سلسلہ غاتہ گڈیکو پروگرام 30 نومبرءِ مریک۔
بی این ایم جنوبی کوریا چیپٹر ہم ہر سال نا وڑئٹ تینا شاندار انگا روایت آتے برجم تخیسہ شہیدآتا یات ئٹ اَسے ریلی اَس کشار موم بتی لگیفِنگ نا تقریب اَس اڈ تسہور۔ موسم نا خرابی نا سوب ئٹ سٹی اسٹاف بوسان ئٹی بی این ایم نا ممبرآک دُوتیٹی شہیدآتا پوٹُو و بینرآتے ارفیسور اسیجاغہ مسہور۔
کورین و انگریزی زبان ئٹی خطاب کننگاءَ۔انگریزی زبان ئٹی بی این ایم نا موقف و بلوچ شہیدآتا بارِسٹ بانڑی بلوچ تینا خیالات آتے پیش کرے انون بختاور بلوچ اننا پیغامءِ مقامی انگا کورین زبان ئٹی پیش کرے۔
ھو پارے انگریزآتا بلوچستان ئٹی 13 نومبر 1839ء نا حملہ اَن پد اینو بلوچ آک بلوچ قومی آجوہی کِن تینا زندگی آتے قربان کننگ ئٹیءُ۔ بلوچ تاریخی حوالہ ئٹ اَسے آزاتءُ قوم اَسے ھو ہچُو وخت اَس غلامیءِ قبول کَتنءِ۔ اینو بلوچ ایلوتا قوضہ اَن آجو مننگ خوائیک۔
نیدرلینڈز ئٹی بی این ایم 13 نومبرءِ بلوچ شہیدآتا یات ئٹ پروگرام اَس اڈ تِس۔ دا تقریب ئٹی بی این ایم نیدرلینڈز نا صدر عبدالواحد ، نائب صدر دیدگ بلوچ، بی این ایم نا محکمہ انسانی حقوق پانک میڈیا نا کوآرڈینیٹر جمال بلوچ ، بی این ایم نا ممبرآک ڈاکٹر لطیف ، محمد بلوچ و سارہ بلوچ بخشی خطاب کریر۔
ھو پاریر بی این ایم نا وجہ اَن اینو نن تینا قومی شہیدآتے یات کننگ ئٹی اَن ہوفتا قربانیک ضائع مَتنءُ۔ نن دا تِپپنءَ کہ ننا نسل بلوچستان نا آجوہیءِ خنِک یا خَنپک ولے ننے آجوہی نا جُہدءِ سرسوب کننگ کِن تینا ادارغاتے ہروڑئٹ مضبوط کروہیءِ۔
