بلوچ نیشنل موومنٹ ( بی این ایم ) نا انسانی حقوق نا ادارہ پانک 2024 نا انسانی حقوق نا سرجم ھا رپوٹءِ شنگ کرینءِ اراٹی بلوچستان ئٹی جبرئٹ بیگواہی و بغیرس عدالت اَن کسِفنگ نا واقعہ غاتَن بیدس وت کُشی کننگ ہم زیات مسونءِ۔
پانک نا رپوٹ نا وڑئٹ بلوچستان نا 12 ضلع و سرگودھا پنجاب اَن پاکستانی پوج 54 بندغ آتے الِنگ اَن پد جبرئٹ بیگوا کننگانءِ۔ نوید لعل پنی آ جوان ئس پاکستانی پوج نا آلہ کارآک ھوشاپ اَن جبرئٹ بیگوا کننگ اَن پد کسِفینءِ ھونا گولی تَن کڑک انگا جون پنجگور اَن دُو تمانءِ۔13 جون 2024 اے پوج و ڈیتھ اسکواڈز نا بندغ آک پنجگور ئٹی عبدالباسط نا ہوراءِ بیڑ ایتِک ہودے کسِفِنگ اَن پد ہونا ہوراہی ذکیہءِ ٹپی کیک۔
پانک پاکستانی پوج نا دُو تیہن الِنگ اَن پد جبرئٹ بیگوا مروکا کُل 54 بندغاتہ پُورا رپوٹءِ شنگ کرینءِ۔ رپوٹ نا مطابق ئٹ کیچ اَن 17 , آواران اَن 5 ، خضدار اَن 2 , ڈیرہ بگٹی اَن 9 , بارکھان اَن 2 , سرگودھا پنجاب اَن 2 , سبی اَن 1 , ڈیرہ غازی خان اَن 2 , چاغی اَن 1 , گوادر اَن 4 , خاران اَن 2 , مستونگ اَن 6 بندغ آتے پاکستانی پوج بغیرس عدالت سینا پاننگ اَن اَلنگ اَن پد بیگوا کرینءِ۔
پانک نا پیش کروکا رپوٹ ئٹی 20 سالہ عقیل احمد سکنہ ملائی بازار تربت اَن وت کُشی کروک انگا واقعہءِ توجُو تریسہ پاننگانءِ کہ پاکستانی پوج نا کاروائی تَن بندغاتہ نفسیاتءِ منفیءُ اثر شاغانءِ۔ پانک نا رپوٹ ئٹی اَسے ماہرءُ نفسیات زانت سینا رائے ہم شاغنگانءِ۔ ہمو نا مطابق ئٹ بلوچستان ئٹی پاکستانی پوج نا آپریشن نا وجہ اَن بندغ آک بازنگا نفسیاتی مسلہ غاتہ شکار مسونءُ۔
پانک نا رپوٹ نا مطابق ئٹ ، عقیل احمد اے پاکستان نا پوج اِیرا وار جبرئٹ بیگوا کرینءِ ، اذیت نا وجہ اَن ہونا ذہنی صحت ہم با متاثر مسوسس اننا وجہ اَن ھو وت کُشی کرینءِ۔ بلوچستان ئٹی داڑن بیدس ہم بازنگا بندغ آتے پاکستانی پوج تنگ کننگ ، تشدد کننگ و جبرئٹ بیگواہی اَن خود کُشی کرینءُ۔
رپوٹ ئٹی جبرئٹ بیگوا مروکاتہ بندغ آتا اہل خانہ نا پارغ اَن احتجاجی مظاہرہ نا ہم اِیت کننگانءِ ، پُورا بلوچستان ئٹی بازنگا خاندان آک تینا بندغ آتِکِن ہروخت احتجاج کننگ ئٹیءُ۔ داڑن بیدس جبرئٹ بیگواہی یک کَش ئٹ مننگ ئٹیءُ داسہ جبرئٹ بیگوا مروکا بندغ آتے ریاستی فورسز آک ہر وڑئٹ تنگ کننگ ئٹیءِ۔
