قوضہ گیر انگا ریاست نا راسکوہ ٹی ایٹمی دھماکہ کننگ بلوچ قومءِ دا کلوُ تننگ اَس کہ بلوچ آتا ہچُو حیثیت اَس اَف، بلوچ قوم نا سر زمینءِ پاکستان ہر وڑنا تجربہ کننگ کیک۔ دا اِیت آتے بی این ایم شہید بانک کریمہ سیل ( کوہءِ سلیمان ) نا اَسے تقریب سیٹی مقررین آک خطاب کریسہ پاریر۔
دا تقریب بلوچستان ئٹی 28 مئی 1998ء ٹی چاغی نا علاقہءِ ایٹم بم نا تجربہ و داڑن بلوچستان نا ماحولءِ تموکا اثرات آتا موضوع نا زیءِ اَس۔
ھو پاریر پاکستان بلوچ گلزمینءِ ایٹمی دھماکہ کرے و دا دےءِ یومءِ تکبیر نا پِن تِس ، دا دھماکہ غاتَن راسکوہ ، چاغی و داپارو ایپار نا علاقہ غاتیٹی بازنگا بیماریک ودی مسور۔ دا بیماری تَن بندغاتے بچاہفِنگ تینا جاغہ ٹی قوضہ گیر انگا ریاست نا پارغ اَن علاج کننگ نا سہولیت ھم تننگ تہو انتیکہ بلوچستان قوضہ گیر نا خالی تجربہ کننگ نا جاغہءِ پین ہچس اَف۔
ھو پاریر پاکستان ایٹم بم نا جوڑکننگ کِن امُو یورینیمءِ استعمال کیک ، ھو ھم کوہءِ سلیمان نا علاقہ بغلچر اَن کشِنگیک و داڑن کوہءِ سلیمان نا پُورا علاقہ کینسر نا گڑھ جوڑ مسونءِ۔ کوہءِ سلیمان ئٹی دونُو جاغہ اَس اَف کہ ہوڑے کینسر نا بیماری مَف۔اَسے پٹ و پول سینا وڑئٹ کوہءِ سلیمان نا کُل کڈوکابیل آتے یکجا مروکا دِیر تیٹی انُو گڑا ارے اموڑن کینسر نا بیماری الیک ، اننا وجہ اَن کوہءِ سلیمان نا بندغاک کینسر نا بیماری اَن دُچار مسونءُ۔ اینو کوہءِ سلیمان ئٹی دنُو ہورا اَس اَف کہ ہوڑءِ کینسر نا مریض اَس مَف۔
مقررین آک پاریر کہ دا کُل مسلئہ غاتہ وجہ ننا غلامیءِ ننے تینا قوم نا بندغ آتے غلامی نا بارسٹ علم و آگاہی تروہیءِ و ہوفتے پُوہ کروہیءِ کہ ھو آجوہی کِن جُہد کروکا تنظیم آتیٹی ھوار مریر و غلامی نا برخلاف بَش مریر۔
ھو دا اِیت نا وعدہ کریسہ پاریر تینا پاٹی بی این ایمءِ ننے داسہ الم مظبوط کروہیءِ ، ننے تینا بندغاتے تینا پاٹی نا دا کُلوے رسیفوہیءِ کہ نن دا حالیت اَن اموتم پیشن مننگ کینا اراتم نن دا غلامی نا برخلاف بلوچ قومی آجوہی نا جُہد ئٹی ھوار مرین۔
