ماہ جبین نا زوراکی ئٹ بیگواہی ، بی وائی سی نا مہبر تا دزگیری و بلوچستان ئٹی بندغی حق آتا چرجوئی ئٹ لتاڑنگ نا برخلاف بلوچ نیشنل موومنٹ (بی این ایم) ائید ئنا دے آ جرمنی نا شار ہینوور ئٹی ایرنسٹ اسکوائر نا ہند آ برانز کرے۔
دا وخت آ تران کروک آک بلوچستان نا پیچیدہ انگا حالیت آتا پام ترفِنگ نا کوشست کرسہ پاریر کہ دنیا نا ایلو خطہ آتیٹی خوئشی کننگ مننگ ئٹی ءِ ، ولہ کوزہ مروک بلوچستان ئٹی ائید نا دے آ ہم بندغ آک برانز کننگ ئٹی ءُ۔
او جہانی ایلمکو نا بے تواری آ تنقید کرسہ پارے کہ بلوچ نسل کشی و بندغی حق آتا لتاڑنگ آ بے تواری مجرمانہ بے پامی ءِ۔ اقوام متحدہ و بندغی حق آتا گَل آتے خواہک کہ او پاکستان ئے بندغی حق آتا بارو ئٹ سوج کیر، و بندغی حق آتا لتاڑنگ نا بنیات آ اوڑا پابندی خلنگ مرے۔
تران کروک آک پاریر کہ پاکستان ریاست دھک آتیان بلوچ الس ئنا توار و آزاتی ئے پُھلانے، و داسہ بلوچ یکجہتی کمیٹی ئے ٹک کرسہ پر امن باسک آتے بیگواہ و خُلیفنگ مننگ ئٹی ءِ۔ ڈاکٹر ماہ رنگ بلوچ ہرا پر امن مزاحمت نا نشانی ءِ ، کیہی وار خُلیفنگانے و دزگیر کننگانے۔
او بی وائی سی نا مہبر ڈاکٹر ماہ رنگ بلوچ، صبغت اللہ، بیبو، بیبگر و گلزادی نا بے سوب آن دزگیری ئے پر امن مزاحمت نا برخلاف زوراکی ئے ریاست نا زوراکی پاریر ، و اوفتا دزگیری ئے شیف خلسہ پاریر کہ دزگیر کننگوک بی وائی سی نا مہبر آتا ڈوھ بیرہ ہندادے کہ او بیرہ انصاف نا خواست ئے کیرہ، دا بیرہ منہ بندغ نا برخلاف کاروائی افک بلکن تیبہ بلوچ چائند نا برخلاف جنگ ءِ۔ بلوچستان ئٹی زوراکی ئٹ بیگواہی، کوش، مڈی تا لُٹ و پل و بلوچ نا دود و ربیدہ آتے پد بٹنگ نا ریاستی مہم برجاء ءِ، دا بیرہ زوراکی افک بلکن چرجوئی ئٹ نسل کشی ءِ۔
دا وخت آ جرمنی چیپٹر نا صدر شر حسن بلوچ، مسکوہی صدر اصغر بلوچ، نوروز ظفر بلوچ، سلمی بلوچ، ندیم سلیم بلوچ، شیراز بلوچ و شھرک بلوچ تران کریر۔
