بلوچ نیشنل موومنٹ (بی این ایم) نا کنڈ آن لندن ئٹی وزیر اعظم ہاوس (10 ڈاوننگ اسٹریٹ) نا مون آ برانز کننگا۔ دا برانز تشدد نا گواچی بندغ تا جہانی دے آ و بی این ایم نا مہبر ڈاکٹر دین محمد بلوچ نا زوراکی ئٹ بیگواہی نا 16 سال پورو مننگ آ اڈ تننگا۔
برانز ئٹی تیبہ برطانیہ آن بی این ایم نا باسک، بلوچ کمیونٹی و بندغی حق آتا باسک آک اوار مسر۔ اوار مروک آک بینر و پلے کارڈ آتا ذریعت ئٹ بلوچستان ئٹی برجاء ریاستی زوراکی و زوراکی ئٹ بیگواہی تے شیف خلکُر۔
تران کروک آک پاریر کہ بلوچستان ئٹی زوراکی ئٹ بیگواہی اسہ بھاز گندہ او بندغی بحران ئسینا دروشم ئٹ مونا بننگ ءِ، ہراڑے پاکستانی ریاست نا ادارہ آک سال آتیان بلوچ آتے زوراکی ئٹ بیگواہ و اوفتا خاہوت آتے ذہنی فریشانی نا گواچی کننگ ءُ۔ ولہ بلوچ قوم تینا سرزمین و آزاتی کن پرعزم ءِ و جہد ئے برجاء تخو۔
بی این ایم نا مہبر آک ڈاکٹر دین محمد بلوچ نا زوراکی ئٹ بیگواہی نا ذکر ئے کرسہ پاریر کہ اونا مسڑ دنیا نا مُرغن انگا لانگ مارچ ئے کرے، ہزار آ لمہ و ایڑک بلوچستان ئٹی برانز کننگ ءُ۔ سینیئر سیاستدان واحد کمبر بلوچ ہم بیگواہی آن پد زوراکی ئٹ بیگواہی نا حالیت ئٹی ٹارچر سیل ئٹی بند ءِ۔ ہندن ڈاکٹر ماہ رنگ بلوچ تون اوار کیہی بندغی حق آتا باسک، صحافی، سیاسی مہبر و وکیل آک پاکستان نا آزار جہہ تیٹی بند ءُ۔
تران کروک آک جہانی برادری و بندغی حق آتا ادارہ آتیا زور شاغار کہ او بلوچستان ئٹی برجاء زوراکی آ بے توار مفس و پاکستان نا ریاستی دہشتگردی و زوراکی ئٹ بیگواہی تے توننگ کن گامگیج ہرفِر۔
بی این ایم نا مہبر آک پاریر کہ بلوچ قوم ریاستی زوراکی، زوراکی ئٹ بیگواہی و قتل و کوش نا باوجود تینا جد و جہد آجوئی و بندغی حق آتیکن سلوک ءِ۔
