بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ پارے کہ دنیا نا ہرا ملک مرے اگہ ننا وسائل آتے لُوٹ مار کننگ کے بریک تو نن ہوڑتون سک مزاحمت کینا ھو چین مرے یا کہ دنیا نا پین بلو طاقت ئس مرے اسِٹ دا سوچ خلپ کہ ننا مزاحمت خالی چین تون مننگءِ اگہ پگہ پین طاقت ئس ہم مرے تو بلوچ تماشائی مفروے اسِٹءِ دا خوش فہمی ٹی مروہی اَف۔
دا اِیت آتے ھو شہید انور ایڈوکیٹ کیچ گوادر ھنکین نا ھنکین کونسل نا اجلاس اَن خطاب کریسہ پارے۔
ھو پارے مننگ کیک پگہ بلوچستان ئٹی چینءِ شکست تننگ کِن پین طاقت ئس مونءِ برے ، پاکستان تون ھوار بلوچ نا وسائل نا سوداءِ خلے و اننا سوچ خلے کہ بلوچ آک چین اَتون مزاحمت کریر و نن تون مزاحمت کپرور ولے دا وڑ ہچ اَف ننا مفاد آتا مونءِ ہر اَسِٹ سلیک نن ہوڑتون مقابلہ کرون و بلوچ مفادآتا حفاظتءِ کرون۔
چیئرمین پارے ننا داپاروایپار بدلیک بننگ ئٹیءُ۔ داڑن موست ننا ہمسایہ ملک آتیٹی دنُو بدلی اچانک خننگار۔ ہمو ملک آتون ننا ہورینا خوڑکی مسہونءِ۔ نن پوُسکُنگا حالیت آتِیکن تیار اَللہون ولے داسہ ننے اچانک بدلی مروکا حالیت آتِیکن سوچ خلویءِ و تینے تیار کرویءِ ۔ ننے دنیا نا حالیت آتے پُو مرویءِ۔ اراڑے نن تُولوک اُون ، ننا زی آ اَسے قوضہ گیر سینا حکمرانیءِ و خطہ ٹی ایلو قوم آتون ہونا مفاد آک تفوکءُ ، دا کُل آتے ننے خُورتی ئٹ ہوروہیءِ و تینا باندات نا بارسٹ سوچ خلویءِ۔
ھو دا اِیتءِ زور تریسہ پارے کہ ننے سوچ خلویءِ خوُرتی ئٹ ہوروہیءِ کہ پاکستان داسہ ہرا طاقت آتے تینتون ھوار کیک و تینا مفاد آتون یکجا کیک۔ ننے ہوڑن موست ہمو طاقت آتے آگاہی تروہیءِ کہ اگہ بلوچ چینءِ داڑے استحصالی انگا منصوبہ غاتے کاریم کننگ کِن اِلیپک تو ایلو طاقت آک ہم دنُو توغ خنپس۔
چیئرمین ہمسایہ ملک نا حوالہ ئٹ پاٹی نا چہاڑدہ سال موست ایرا ہزار چہاردہ نا سیشن ئٹی جوڑ مروکا پالیسی نا کُنڈا اشارہ کریسہ پارے کہ تینا ہمسایہ ملک نا بارسٹ دہ سال موست نن ہرا پالیسیءِ جوڑ کریسون اینو نن ہونا اثرات آتے خننگ ئٹی ہون۔ دا پالیسیءِ کاریم کریسہ نن مونی اِننگ ئٹی ہون۔ ہر پالیسی نا منفیءُ اثرات آک ہم اریر ولے نن کِن و ایلو آجوہی خواہوکا تنظیم آتِیکن جوانو اثرات آک ہم اریر۔
ڈاکٹر نسیم پارے ننا جُہد نا مسخَت و بنجاءَ پاکستان اَن بلوچستان نا آجوہی النگءِ۔ ننے تینا سرزمین اَن زیات آن زیات بندغ آتے آجوہی نا کُلوے سرکرویءِ و داڑکِن کوشست کرویءِ کہ بلوچ گلزمینءِ توُلوک آک ننا پاٹی ٹی ھوار مریر و نن تون یکجا مریر۔
ھو پارے گلزمینءِ بی این ایم نا کاریم آتے مونی دننگ کِن ننے سیلز آتیٹی کاریم کرویءِ ، بندغ آتے تنظیم و جُہد نا بارسٹ آگاہی تروہیءِ و اننا کاریم آتے تینا ذمہ واری تیٹی شاغوہیءِ۔
چیئرمین کیچ ، گوادر ھنکین نا سیکریٹری رپوٹءِ بننگ اَن پد باز خوھَش مَس و پوُسکن انگا عہدیدار آتے مبارکبادی تریسہ پارے ای ہم بازنگا عہدہ غاتے بازنگا ذمہ واری تیٹی تنظیم نا ادارہ تیٹی کاریم کرین ہوٹ ، گلزمین ئٹی و گلزمین اَن پیشن ہم ، اینو دا رپوٹ پیش کننگانءِ دا بے کچ جوانءِ۔ امیت کیوا کہ مونی ہم داڑن جوان کاریم کننگءِ۔
ھو پارے تنظیم نا شیف نا ادارغاک کاریم کننگ ئٹیءُ ہوفتہ جوانگاءَ کاریم آتا وجہ اَن بنجاہی عہدیدار آتے سرسوبی رسینگیک و ہوفتہ تعریف کننگیک۔ننا بنجاہی حوالہ ئٹ بازنگا کاریم آک مننگ ئٹیءُ ، دونکہ میڈیاءِ ، تربیتی نصاب آکو و پین باز آک دا اننا خاطر اَن مونی اِننگ ئٹیءُ کہ شیف نا ادارغاک ہوفتون ھوار کاریم کننگ ئٹیءُ ہوفتون کمک کننگ ئٹیءُ۔
چیئرمین توجُو تِریفیسہ پارے پاٹی نا آئینی ادارغاتے مونی دننگ کِن ہوفتے اَسِٹ ایلو تون ھوار و انفرادی حوالہ ئٹ جوان منظم کننگ زلوریءِ۔ انون ننا فارن ڈیپارٹمنٹ پیشن کاریم کیک ہودے انسانی حقوق نا ڈیپارٹمنٹ نا کمک نا زلورت تمیک و میڈیا ڈیپارٹمنٹ نا ہم ۔ اَسِٹ ایلو تون اگہ کُل آک کمک کیر ھوار مریر تو کاریمک اَسے جوانو شگلءَ سیٹی مونءِ بریرا ۔ ننا کوشست اننا مرے کہ پدا بروکا سنگت آتِیکن کاریمک آسان مریر تنکہ ہوفتے مونی اِننگ کِن پین مشکل ئس مف۔ دُون مف کہ ننے اَن پد بروکاک زیرو( صفر ) اَن کاریم آتے شروع کیر۔ داسہ نن ھیل کننگ ئٹی ہون کہ آمر ادارغاک اَسِٹ ایلو تون تفوک مریر تو مونی اِننگ کیرا و جوان کاریم کننگ کیرا ، مون مُستی دافتہ کاریمک مونءِ بریرا تو اَسے جوانو وڑسیٹی خننگیرا۔
دا نشست ئٹ کیچ ۔ گوادر ھنکین نا آرگنائزنگ کمیٹی خلاس کننگاءَ و پوُسکنءَ عہدیدار آک گچین کننگار ۔ چیئرمین پوُسکن گچین مروکا عہدیدار صدر بابا جی آر ، نائب صدر بھار بلوچ ، سیکریٹری جیھند بلوچ ، ڈپٹی سیکریٹری بانک زینل بلوچ و خازن سید بلوچ ءِ کچین مننگ اَن پد پاٹی و تحریک تون وفاداری نا حلفءِ تِس۔
