بلوچ نیشنل موومنٹ (بی این ایم)نا چیئرمین ڈاکٹر نسیم بلوچ شال ئٹی عہد ئنا پوسکُنی و بلوچستان نا برطانیہ آن آزاتی نا دے نا رد ئٹ اڈ ہلوک دیوان آن تران کرسہ پارے کہ پاکستانی نا غیر قانودی آ کوزہ آن مھالو ہم نن اسہ آزات او ریاست ئسینا خواجہ اسُن۔ 27 مارچ 1948 آ پاکستان زوراکی ئٹ ننا لمہ ڈغار آ کوزہ کرے، و اینو اسکان ہزار آتا کچ نیاڑی و نرینہ غاک تینا ڈغار نا آزاتی کن شہید مسنو، ہندن ہزار آ بلوچ آک پاکستان نا زندان تیٹی قید و بند و وے بندغی آ اذیت آتے سھنگ ءُ۔
او پارے کہ سخت ریاستی زوراکی آن پد ہم ننا قوم سوگوی ئٹ تینا مزل نا کنڈ آ ہِننگ ءِ۔ آزاتی خواہوک آک بلوچستان آ پاکستان نا کوزہ ئے ایسر کرور، و اسہ رژنا او سوب ئس بلوچ قوم ئکن ہروک ءِ۔
بلوچستان نا برطانیہ آن آزاتی نا 78 امیکو سال دے آ بی این ایم شال زون نا ڈپٹی آرگنائزر ماسٹر بلوچ نا بھلنی ٹی دا تنظیمی دیوان اڈ تننگا۔ دیوان نا بناء بلوچ راجی سوط و شہید آتا یات ئٹ اِرا منٹ بے تواری ئٹ مسک۔
شال زون نا ڈپٹی آرگنائزر پارے کہ اینو آن 78 سال مست بلوچستان برطانیہ نا نوآبادیاتی نظام آن آزات مسک، ولہ منہ تو آن پد ننا آزاتی ئے اسہ پوسکن جوڑ مروکو ریاست ئس پُھلا۔
او پارے کہ زندہ انگا قوم آک تینا آزاتی دود و ربید تے زندہ تخرہ، و اگہ اوفتا آزاتی پھلنگِہ تو اودے دوئی کننگ ئے تینا زندگی تا مسخت جوڑ کیرہ۔
