جنیوا ، سوئٹزرلینڈ ۔ بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ بی این ایم نا پنچمیکو بلوچستان بین الاقوامی کانفرنس اَن خطاب کریسہ پارے کہ اراتم نُم بلوچستان نا پِنءِ بِنرءِ تو نم نقشہ ٹی اَسے جاگہ سینا سوچءِ لازم خلیرءِ۔ ولے بلوچستان خالی امو جغرافیہ اَن ہم بلونءِ۔ دا امیت آتا و زند نا قبرستان ئس جوڑ مسہونءِ ، اراڑے یک کش ئٹ انسانیت نا خلاف ورزیک مننگ ئٹیءِ۔
بلوچ نیشنل موومنٹ ( بی این ایم ) نا پنچمیکو بلوچستان انٹرنیشنل کانفرنس سرسوبی ئٹ اڈ تننگاءَ ، دا اَسے اہمءُ تقریب ئسءِ ہرا نا مسخت بلوچ قوم نا زی آ مروکا ظلم و زوراکیءِ عالمی سطغءِ پاش کننگءِ ۔جنیوا ٹی مروکا کانفرنس ئٹی بین الاقوامی باسک آک ، اسکالر آک و بی این ایم نا بازنگا ممبر آک بشخ الکُر ، ارا آجوہی و انسانی حق آتِیکن بلوچ جُہد تون ھوارءُ و یکجاءُ۔
“مہاجر : جوڑ کننگان ہون حقیقت ئٹی نن دُون مننگ خوہاتونءَ”
تینا جندئنا ترجوبہ نا حوالہ ئٹ ڈاکٹر نسیم بلوچ بلوچستان نا پہوالی خلک و علاقہ ٹی اَسے ڈاکٹری نا زند اَن الیس فرانس اِسکان مہاجر نا زند و تینا جنجال آتے مونءِ تِخاءَ۔ ھو دا اِیتءِ زور تِرسہ پارے کہ لڈوبار بندغ تینا رضا ئٹ کپ پک بلکِن پاکستانی ریاست نا درندگی اَن بچنگ کِن داوڑ کننگ زلوری ئس۔
ھو پارے ای داڑے اَسِٹ اَن ہمدردی الِنگ یا تینا زندہ ئنا جنجال آتے اِیت کننگ خوہاپرہ ۔ ای تینا مخلوک نا و بلوچ قوم نا داستانءِ نومے بنفِنگ کِن داڑے سلہوک ہوٹ ، ارافتہ دردءِ بلوچستان اَن پیشن پشتون ، سندھی ، گلگت بلتستان و کشمیر نا مخلوک جوآن پُو مریرا۔
“بلوچستان : تینا جغرافیہ اَن زیات امیت آتا قبرستان ئسءِ “
تینا خطاب ئٹی ڈاکٹر نسیم بلوچ بلوچستان نا حالیت نا زی آ اِیت و گپ کریسہ پارے بلوچستان امیت آتَن زیات زندئنا قبرستان ئس جوڑ مسہونءِ ، اراڑے یک کش ئٹ انسانیت نا خلاف ورزی مننگ ئٹیءِ ۔ ھو خطہ ٹی پاکستان نا پوج نا ظلم وزوراکی تے پاش کرے ، اراڑے جبرئٹ بیگواہی ، بغیرس عدالت نا حکم اَن کسِفنگ و چیروکا جون آتا خَسِنگ دردناکءُ حقیقت ئس جوڑ مسہونءِ۔
ھو پارے مستونگ ئٹی بدنامءِ زمانہ نا معلوم انگا بندغ آتا قبرستان ئس جوڑ کننگانءِ ، اراڑے ریاست تشدد کروکا نا معلوم انگا بندغ آتے بغیرس ہوفتہ خاندانءِ پاننگ یا انصاف تننگ اَن بیدس دفن کننگانءِ “ انسانی حقوق نا احترام کروکا ریاست دون کننگ کیک؟ ھو پارے پاکستان نا دا وڑک اَسے دہشت گردءُ ریاست سینا وڑئٹیءُ۔
’’ پاک چین نا کمک و دنیاءِ دافتہ اثرات آک ‘‘
ڈاکٹر بلوچ پارے خطہ ٹی چین نا پےاِنگ دا کُنڈا اشارہ کیک ، خاص کر اسٹریٹجک منصوبہ غاک ارا بلوچ قوم نا حق آتا ہر وڑئٹ خلاف ورزی کننگ ئٹیءِ۔ ھو خبردار کریسہ پارے چین نا کمک کننگ دونءُ مسلئہ ئس اَف بلکِن دائنا عالمی اثرات آک ہم اریر خاص کر علاقع نا طاقت آک و آبنائے ہرمزءِ رسینگ اِنگ ہونا منصوبہ تیٹی ھوارءِ۔
ھو پارے ای امودے چیلنج کیوا کہ ھو بلوچستان نا حوالہ ئٹ پاکستان و چین نا نیامءِ معاہدہ غاتے پاش کے ۔ “بلوچ قومءِ ہونا زمین و وسائل آتا حوالہ ئٹ ہر وڑنا فیصلہ غاتَن مُر تِخنگانءِ۔
’’ ننا جُہد آجوہی کِنءِ خالی انسانی حقوق کِن اَف ‘‘
بلوچ رہنما دا اِیتءِ زور تریسہ پارے کہ بلوچ نا جُہد خالی انسانی حقوق نا خلاف ورزی تیکِن آف بلکن تینا قومی آجوہیءِ الِنگ نا جُہدءِ۔ انسانی حقوق نا خلاف ورزیک ہموتم ختم مریرا اراتم نن تینا جائز انگا قومی آجوہیءِ الین۔
ھو عالمی برادری اَن خواست کرے کہ ھو بلوچ قوم نا جُہدءِ آجوہی کِن توار چِست کیر انتیکہ بلوچستان اَسے آزات و خودمختیارءُ ریاست ئس مسہونءِ۔
ڈاکٹر نسیم دا اِیتءِ زور تریسہ پارے کہ بلوچستان نا آجوہی نا جنگ خالی اَسے علاقائیءُ مسلئہ ئس اف بلکِن بین الاقوامی انصاف نا سوال اَسے ، ارا پشتون ، سندھی و کشمیری تون ھوار ایلو مظلوم انگا قوم آتا جُہد ہتون تفوکءِ۔
’’ نن تینا آجوہی نا الِنگ اِسکان آرام ئٹی تُولپرون ‘‘
تقریر نا ایسر مظلوم انگا قوم آتاءَ و بین الاقوامی اتحادی تا نیام ئٹی اتحاد نا دعوت اَن مَس۔ ڈاکٹر بلوچ پارے بلوچ نا مزاحمت اِیرا دہائی اَن مننگ ئٹیءِ ، اینو اِسکان مننگ ئٹیءِ امو وخت اِسکان بلوچستان آجو مَتنءِ۔ ھو اعلان کرے کہ نن ہمو وخت اِسکان آرام کپپنءَ ارا وخت اِسکان بلوچستان آزاد متَنءِ آزاد بلوچستان نا جُہد مدام زندگ بات۔
پنچمیکو بلوچستان انٹرنیشنل کانفرنس نہ کہ خالی بلوچ قوم نا حالیتءِ پاش کیک بلکِن بازنگا مظلوم انگا قوم آتا نیامءِ یکجہتیءِ مونءِ دننگ و ہمو خاص انگا مسلئہ غاتے عالمی برادریءِ رسیفِنگ و ہوفتے اَسے پلیٹ فارم ئس تننگءِ ۔
