بلوچ نیشنل موومنٹ (بی این ایم) نا جونیئر جوائنٹ سیکریٹری حسن دوست بلوچ برطانیہ ٹی جیئے سندھ فریڈم موومنٹ نا کنڈ آن اڈ تروک سائیں جی ایم سید نا برسی نا مُچی آن تران کرسہ پارے کہ سائیں جی ایم سید نہ بیرہ سندھ بلکن توبہ برصغیر ئٹی سیاست، فکر و قوم دوستی نا اسہ عظیم او استعارہ ئسے۔ اونا برسی ننے تینا تاریخی ورثہ آن تعلقداری آ دوارہ نگاہ کننگ نا موقع ایتِک۔
او پارے کہ سائیں جی ایم سید نا زندگی نا بناء تدینی ئسے آن مس ہراتم او چُنکی ٹی چھوری مسک۔ اونا باوہ نا کوش و برطانیہ نا سامراج نا (ونڈ کننگ و حکومت کننگ) پالیسی اونا خاہوت ئے بھاز زیمی کرے۔ انگریزی آتا دو ئنا شیف آن بھلن مننگ آن ہد ہم سائیں جی ایم سید اسہ آزات و انقلابی فکر تخوکو سوچ ئسے نا مالک مسک۔ بھاز آ بولی تے ہیل کرے و سیاسی شعور ودی کرے۔
حسن دوست بلوچ پارے کہ بیرہ 15 سال ئنا عمر ئٹی سائیں جی ایم سید خلافت نا تحریک آن عملی سیاست نا بناء ئے کرے۔ کانگریس و مسلم لیگ ئٹی اوار مننگ آن پد او زوت دا پوہ مس کہ سندھ ئنا قومی چائند کن جتا او جہد ئس المی ءِ۔ ہرانا سوب او سندھو دیش تحریک نا بنیات ءِ تخا تانکہ سندھ ئنا مڈی و بروکا دے تے آ ہندی بندغ آتا اختیار ئے یقینی جوڑ کننگ مرے۔
تران نا ایسر ئٹ حسن دوست بلوچ پارے کہ اینو نا نازرک آ وخت ئٹی ننے سائیں جی ایم سید نا نظریات آتے آن رہنمائی ہلنگ نا زرولت ءِ۔ سندھ و بلوچستان نا تاریخی و ثقافتی و سیاسی سیالی ننے آن اوار مرسہ جہد کننگ نا خواست ئے کیک۔ سائیں جی ایم سید نا زندگی ننے دا سبخ ئے ایتک شعور تعلیم و وے مات کنوک آ عزم غلامی نا برخلاف کھل آن بھلا سلاہ کو۔
