شال : بندغی حقاتا تنظیم پانک ( بی این ایم نا ادارہ انسانی حقوق ) تینا ستمبر 2023 نا رپوٹ ئٹی بندغی حقاتا حالیتءِ پاش کرینءِ و مونے ایسونءِ۔ رپوٹ ئٹی گدرینگوکا تُو نا بازنگا واقع آک پیش کننگانءُ ۔ داٹی مُچ اَن اہم انگا پاکستانی پوج نا پارغن جبرھٹ بیگواہی نا عملءِ اموکہ اِچ سلیتنءِ۔ خطہ ٹی بندغی حقاتا پین ہم لگتمالی مسونءِ ، ستمبر ئٹی پاکستان نا فورسز آک 75 بندغءِ بغیرس عدالت سینا حکم اَن بندی کرینءُ۔
ستمبر ئٹی جبرھٹ بیگوا مروکاتَن 16 بندغءِ اِلہ کننگانءِ ولے ایلو وڑآتیٹی ہچُو بدلی اَس بتنءِ۔ پاکستان نا پوج گدرینگوکا تُو اے دروغ نا مقابلہ غاتے برجا تیخانءِ و دہ بلوچءِ کھسِفِنگ اَن پد ہُوفتے دروغ نا مقابلہ تیٹی خللِنگ نا دعویءِ کرینءِ۔ راستی دادے کہ دافتیٹی ہفت بندغءِ مُست اَن پاکستان جبرھٹ بیگوا کریسُوس۔ دا دروغ گوئی نا کاریمک بندغی حقاتا زیات خلاف ورزی پاننگیرا و دا وڑ خطہ ٹی بے باوری و بے انصافیءِ باز زیات کروے۔
ستمبر ئٹی پوجی آپریشن نا وجہ اَن ضلع ڈیرہ بگٹیءِ سنگین اِنگا ذالمی نا نشانہ جوڑ کننگانءِ۔ دا یک کش آ کاروائی نا وختءَ شاری آ مخلوک نا مال مویشیک و ایلو کاریم روزگارآتے بلو تاوان اَس رسینگانءِ۔ بازا شعبہ غاتِین تعلق توروکا 32 بندغاتے جبرھٹ بیگوا کننگانءِ۔نشانہ کروکا علاقہ آتے باز تباہی کننگانءِ۔
بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ اقوام متحدہ نا 54 می اجلاس ئٹی بندغی حقاتا مروکا خلاف ورزی تا زی آ تینا اِیت و گپ آتے تخاءَ ۔ھو بلوچستان ئٹی پاکستانی پوج نا کروکا ظلم و جبر نا زی آ اِیت کریسہ پارے داباز اہمءُ مسلہ اَسے داڑے زوتس توجُو تننگ نا خواستءِ کرے۔ ھونا دا کوشست مروکا بندغی حقاتا خلاف ورزی نا توارءِ چِست کننگ بین الاقوامی سطغءَ اَسے التجا سِے۔
29 ستمبر ءِ مستونگ ئٹی اَسے مذھبی مُچی سے آ وت کش حملہ اَس کننگاءَ اراٹی بازنگا بندغاتءَ جان آک ضائع مسور۔ دا بلوچ سماج ئٹی مونی زیات مروکا مذھبی انتہا پسندی نا کُنڈا اِننگ نا اشارہ اَسے۔ رپوٹ پائیک ریاست پاکستان نا پارغن مذھبی انتہا پسندیءِ ودیفِنگ ئٹی مسونءِ۔پاکستان بلوچستان نا بازنگا علاقہ تیٹی آئی ایس آئی ایس (داعش) نا وڑو مذھبی گروپ آتے جوڑ کننگ و ہُوفتے برجا تیخنگ ئٹی ھوارءِ۔دا حالیتءِ زوتس توجُو تِننگ خوائیک۔
رپوٹ نا وڑھٹ ستمبر 2023 اے بلوچستان ئٹی بندغی حقاتا حالیت جبرھٹ بیگواہی ، دروغ نا مقابلہ تیٹی خللِنگ ، پوجی آپریشن و ودوکا مذھبی انتہا پسندی نا وجہ اَن خراب کننگانءِ۔ پانک نا ماہانہ رپوٹ دا مُچ مسلہ آتے اسیجاگہ کیک و بلوچستان ئٹی بندغی حقاتا خلاف ورزی آتے مونءِ اتِنگ و ہوفتے بین الاقوامی توجُو و کاروائی کننگ نا خواستءِ کیک۔
