نیدرلینڈز نا شار زیپتن ٹی اسہ سرکاری مُچی سینا وخت آ بلوچ نیشنل موومنٹ نا باسک باسط ظہیر بلوچ یورپی یونین آن خواست کرینے کہ پاکستان نا جی ایس پی حیثیت ئے زوت معطل کننگ مرے۔
زیپتن میونسپلٹی نا کنڈ آن اڈ ہلوک مُچی ٹی باسط ظہیر بلوچ بلوچستان ئٹی بندغی حق آتا لتاڑنگ، بھازیکا زوراکی ئٹ بیگواہی، وے قانودی ئٹ دزگیری و وے عدالت آن کھسفنگ نا تدینی تے آ گپ کرے۔ او پارے کہ پاکستانی ادارہ غاک تاغت ئے ناجائز کارمرز کرسہ ہزار آ بلوچ سیاسی باسک، چنا و زالبول بیگواہ، لٹ ئہ کٹ و وے بندغی آ روشت نا گواچی کننگ ءُ۔
او گیشتر پارے کہ پاکستان ئے یورپی یونین نا کنڈ آن رسینگوک جی ایس پی کاروباری مراعت بندغی حق آتا احترام و دیمروی نا شڑط آ منحصر ءِ۔ ولہ پاکستان چرجوئی ئٹ دا شڑط آتا برخلافی ئے کننگ ئٹی ءِ۔ ہندا سوب آن دا کاروباری مراعت آتے دہن او ملک ئسے تننگ اصولی وڑ ئٹ غلط ءِ، ہرا جہانی بندغی حق آتا معاہدہ تا برخلافی ئے کننگ ئٹی ءِ۔
باسط بلوچ زور شاغا کہ یورپی یونین ئے زوت آن زوت پاکستان نا جی ایس پی پلس حیثیت ئے معطل کروئی ءِ۔ انتئے کہ بندغی حق، مزور آتا حق، ماحولیات و جوان انگا حکمرانی نا بنداوی اصول آتا برخلافی ٹی اوار ءِ۔ و تیبہ جہانی معاہدہ تا برخلافی ئے کننگ ئٹی ءِ۔
مُچی نا وخت آ بی این ایم نا باسک بلوچستان نا حالیت آتا بارو ئٹ معلومداری بروشر ہم ونڈ کرے۔
