بلوچ نیشنل موومنٹ یوکے چیپٹر نا جنرل باڈی نا مُچی لندن ئٹی بلوچ راجی و مزاحمتی شائر مبارک قاضی نا یات ئٹ اڈ ہلک ، اجلاس نا بھلُّنی ئے یوکے چیپٹر نا صدر ماسٹر منظور بلوچ کرے ہندُن خاص آ مہمان مرکزی کمیٹی نا باسک نیاز بلوچ اسک ۔
جنرل باڈی نا اجلاس نا بناء بلوچ شہید آتا یاد ئٹ مچٹ بے تواری آن کننگا ۔ بے تواری آن پد درستی راستی نا سیشن مس ہراٹی بی این ایم یوکے چیپٹر نا سینیئر کارکن آک و پوسکُن بروک آتے اسٹ ایلو تون درستی راستی کننگا اوکان پد جتا آ یونٹ آک تینا رپورٹ آتے مونی ہیسُر ، ہَراٹی یونٹ آتا نیمہ غان مروکا کُل کاریم تا بارَو ئٹ جنرل باڈی ئے آگاہ کننگا ۔
یونٹ آتا رپورٹ آن پد یوکے چیپٹر فنانس سیکریٹری نسیم عباس بلوچ یوکے چیپٹر نا مالی امور نا ردئٹ جنرل باڈی نا رپورٹ ئے پیش کرے ۔ فنانس آن پد تنقیدی نشست مس ، ہَراٹی کُل ممبر آک بشخ ہلکُر تنظیمی امور تون یوکے چیپٹر نا مھالو نا کارکردگی آ تنقیدی سوال کننگا ، تنقید آتا جواب ئے سی سی ممبر نیاز بلوچ فہیم بلوچ و بی این ایم عہدہ دار آک تسُر ، اوکان پد لائحہ عمل اڈ تننگا و سلاح ہم مَسّ۔
جنرل باڈی نا ایسر ئٹی ماسٹر منظور بلوچ راجی و مزاحمتی شاعر مبارک قاضی نا زندگی آ مختصر او روشنائی ئس شاغا ، و اودے دروت ندر کرے ، پارے کہ تاریخ ئٹی ہمو بندغ آک ہروخت زندہ ءُ ہراکہ عمل و فکر ئٹ تینا چاگڑد نا رہنمائی ئے کیرہ ، مبارک قاضی ہم ہمو بندغ آتے ٹی اوار ءِ ہراکہ تینا زبان و راج ئنا خزمت ئے شاعری ئٹ کرینو۔
