تربت : بلوچ نیشنل موومنٹ ( بی این ایم ) نا چیئرمین ڈاکٹر نسیم بلوچ نا صدارت ئٹی اَسے اجلاس اَس مَس اموٹی بی این ایم کیچ گوادر نا کارکن آک ساڑی اسورءَ ، شہید انور ایڈوکیٹ ھنکین کیچ گوادر ، نا پِن ئٹ ھنکین جوڑ کننگا و پنچ رکنی آرگنائزنگ باڈی اَس اڈتننگا۔
اجلاس نا مہمان خاص بی این ایم نا سیکریٹری سماجی بہبود محمد اقبال بلوچ اَس۔
اجلاس ئٹی بی این ایم نا سینئر وائس چیئرمین ڈاکٹر جلال بلوچ ممبرآتا ذمہ واری نا بارسٹ پارے و سیکریٹری ثقافت و اطلاعات قاضی داد محمد ریحان نا حوالہ ئٹ سیشن اَن پد بی این ایم نا موستی ہننگ نا بارسٹ ممبراتے آگاہی تِس۔ داڑن بیدس بی این ایم نا سنیئر ممبر محمد انور بلوچ آرگنائزنگ کیمٹی کِن اراکین آتا پِن آتے مونءَ اِیس و شہید انور ایڈوکیٹ نا پِن ئٹ ھنکینءِ جوڑ کننگ تون ھوار ھونا زندگی نا بارسٹ اِیت و گپ کرے۔
ھونا نیمغن مونی اتوکا آرگنائزنگ باڈی نا ممبرآتے و ھنکینءَ کِن تروکا سلہءُ سوج اَن پد تروکا پِن آتے مُچی ٹی ساڑی انگا مُچ ممبراک منار۔
اجلاس اَن خطاب کریسا بی این ایم نا چیئرمین پُوسکنا ممبراتے مبارکی تِس و اننا اُمیتءِ تخا کہ بی این ایم نا پوسکنا ھنکین پاٹی نا موستی اننگ کِن جوانو کرد اَس ادا کروے۔
ھو پارے پاٹی نا مُچ ادارغاک اَسے جاغہ مریر و پاٹی نا مسکد نا سرسوبی کِن کاریم کیر و تینا فکر تون تفوکا سنگت آتے پٹھِر ہوفتے بی این ایم ئٹی اسیجاگہ کیر۔ ھو پارے ننے تینا کوشست آتے عمل نا کُنڈا دننگ کِن تینا حکمت عملی و کاریم نا طریقہ غاتءَ زی آ سوچ خلویءِ۔ زلوری اَف کہ دا سفرئٹی نن مِزلءِ رسینگِن یا مدام ذمہ واری تا زی آ سلُون اننا وجہ اَن ننے ادارہ سازی نا ذریعہ ئٹ پاٹیءِ مضبوط کرویءِ۔ ننے تینا بشخ ہنہ کاریمءِ پورا ایمانداری ٹی کرویءِ تانکہ بروکا کیڈر کِن آسانی مرے۔
ھو پارے ننے تینا موست ہنہ کاریم آتے خُورتی ئٹ ھُوریءِ کہ نن گدرینگوکا دہ سالاتا تیٹی اسیجاغا سلہوک مسون اون یا مونی ہنانُن اگہ نن مونی ہنتن اون تو یقیناً دا ننا کمزوری و سُستی مسونءِ پداہم ھو بی این ایم نا بازنگا ادارغاتءَ کاریم آتا تعریف کرے ہموکہ اوست جمی ئٹ کننگانءُ۔
ھو پارے بی این ایم نا سیشن اَن پد آئین ئٹی بازنگا ادارغاتءِ ھوار کننگانءِ۔ نن اننا سمجھانُن داوڑ ہم مننگ کیک کہ نن اَسے وخت ئٹی دا ادارغاتءِ پورا چلیفنگ کین اگہ نن تینا پورا دورانیہ ئٹی اَسے ادارہ اَس کامیابی ٹی چلیفِن دا ہم نن کِن بلو کامیابی اَس پاننگیک ولے نن بازنگا ادارغاتءِ کامیابی ٹی مونی دننگ ئٹی اون دا اَسے جوانو مون روی ئسءِ۔ دا ادارغاتءِ ھواری ئٹ ترقی تننگ و مضبوطی نا کُنڈا دننگ مُچ کارکناتءَ ذمہ واریءِ۔
دا موقغءَ بی این ایم نا سنیئر انگا ممبر محمد انور بلوچ شہید انور ایڈوکیٹ نا زندگی نا زی آ چمشانگ اَس تِس۔
ھو پارے واجہ انور ایڈوکیٹ نا آبائی علاقہ ماشکیل مسونءِ۔ طالب علمی نا دور اَن سیاست ئٹی ھوار مسونءِ۔ ہشتاد نا دہائیءِ افغانستانءِ اِنا پدا اموکا سویت یونینءِ اِنا امودے ھو بی اے ایل ایل بی ( قانون ) نا ڈگریءِ اَلک و بی ایس او ( سھب ) تون ھوار مَس۔ ہراتم سویت یونین زوال نا کُنڈا اِنا ، افغانستان ئٹی مجاہدین آتا حکومت اَسکا و بلوچاتءِ افغانستان اَن پیشن مروی اَس تو ایڈوکیٹ ایلو بلوچ آتون ھوار واپس تینا وطنءِ بَس۔دادے ھو ضلع چاغی ( دالبندین ) ئٹی وکالتءِ شروع کرے۔
محمد انور نا مطابق ئٹ بلوچستان ءِ واپسی اَن پد ہم تینا سیاسی انگا سنگت آتون تعلق تینا برجم تخاسُس۔نظریاتی و فکری ہم آہنگ مننگی نا وجہ اَن نا شہید غلام محمد بلوچ تون خڑکنا تعلق اَس اسکا۔ اننا وجہ اَن واجہ غلام محمد بلوچ ہراتم ڈاکٹر مالک و ڈاکٹر عبدالحئی تون نیشنل پاٹی ٹی ہننگ اَن بیدس بلوچستان نیشنل موومنٹ ( بی این ایم ) برجم تخنگ نا فیصلہءِ کرے تو واجہ انور ایڈوکیٹ بلوچ ہم نے تون ھوار اَس۔ 2004ء نا کونسل سیشن ئٹی واجہ انور ایڈوکیٹ ڈپٹی سیکریٹری جنرل منتخب مَس۔
’’ 2006 ئٹی ہراتم شہید اکبر خان بگٹیءِ پاکستان نا پوج شہید کرے دائنا برخلاف پورا بلوچستان ئٹی احتجاج آک شروع مسور تو نی دالبندین ئٹی احتجاج آتیٹی مون مون ئٹی اسوسہ۔ بی این ایم نا ڈپٹی سیکریٹری جنرل مننگ نا وجہ اَن پاکستان نا سرکار انور ایڈوکیٹ نا خلاف بازنگا دروغ نا الزام آتے خَلک و نا وارنٹ گرفتاریءِ کشاءَ۔گڑاس وخت نی اننا دروغ نا الزام آتا مقابلہءِ کریس ولے ہراتم نیہا زمینءِ تنک کننگا تو نی ہم بازنگا سنگت آتا وڑ تینا وکالت و ایلو مراعات آتے اِلاس ولے انڈر جہُد آزادی ٹی تینا کردار اے جوانو وڑہسیٹی پیلو کریسا اناس آخیری وخت اِسکان عظیم ء جہدکار سینا وڑئٹ بی این ایم نا پلیٹ فارم ئٹی تینا جہُدءِ کریس۔‘‘
محمد انور نا وڑئٹ ، 2010 ئٹی ھو بی این ایم نا سنگت آتیان چھٹی اَلک تینا ھوراغا اِننگ ئٹی اسکا کہ کَسر ئٹی ہوست نا دورہ اللنک اَن وفات کرے۔ اَسے راہگیر اَس ہودے اسپتال سیہءَ رسیفِک۔ بلُو وخت سیہن روپوش مننگ نا وجہ اَن نا شناخت کننگ مشکل اَس ، ھونا لاش گم نام انگا بندغ سینا وڑسیٹی اسپتالءِ تخننگا انون اَسے سنگت اَس نے دروست کرے و ھونا جُونءِ ھونا آبائی آ علاقہءِ دننگاءَ و دفن کننگءَ۔
بلے نا موت ہوست نا دورہ اللنگ نا وجہ اَن مسوسس ولے بلوچ نیشنل موومنٹ نا بلُو وخت سیہن جُہد کننگ و جُہدءِ آجوہی نا کسرئٹی کہنگ نا وجہ اَن نے شہیدی نا پِنءِ اِیتِک۔
ھونا خذمت آتے مننیساءَ بی این ایم نا نیمغن کیچ گوادر ھنکینءِ شہید انور ایڈوکیٹ نا پِن ئٹ جوڑینگیک اموننے ھونا تروکا قربانی و نظریاتی انگا ھواری نا یات آتے مدام تریسا کیک۔
