بلوچ نیشنل موومنٹ ( بی این ایم ) نا بنجاہی جونیئر جوائنٹ سیکریٹری حسن دوست بلوچ شہید راشد آواران ، مشکے ھنکین نا اَسے نشست سیہن خطاب کریسہ پارے کہ اراتم 11 اگستءِ نن برطانیہ اَن بلوچستان نا آجوہی نا اِیتءِ کینا تو ننے دا خبر مریک کہ آجوہی قربانی تننگ اَن پد الکونُن۔ ہمو قربانی تِننگ نا وجہ اَن اینو پاکستان نا قوضہ نا خلاف ہم جُہد کننگ ئٹی ہون ۔ برطانیہ تون بلوچ نا جنگ دا اسکاءَ کہ انگریز بلوچ گلزمین گدرینگیسہ افغانستانءِ حملہ کننگ خوائسکہ و بلوچ تینا ہمسایہ نا رکیفِنگ کِن ہوڑتون مقابلہ کرے و انگریزءِ راہداری تِتَہو۔ اننا وجہ اَن کالونیلءَ طاقت برطانیہ بلوچستان تُون ھوار ایلو ملک آتے تینا پوجی طاقت نا زور ئٹ قوضہ کرے۔
دا اِیت آتے ھو 11 اگست نا دے آ اَسے نشست سیہن خطاب کریسہ کرے۔ دا نشست ئٹی ھنکین نا ممبرآک بلُو کچ سیہا ساڑی اسُور ۔ بی این ایم نا جونیئر جوائنٹ سیکریٹری حسن دوست بلوچ اَن بیدس بنجاہی کمیٹی نا باسک چیف اسلم بلوچ ، زون نا صدر مھران بلوچ ، نائب صدر تلار ناز ھم خطاب کریر انون اسٹیج سیکریٹری نا ذم داریءِ زون نا ڈپٹی سیکریٹری سگار بلوچ ارفیسوس۔
ھو پارے برطانیہ نا قوضہ اَن خلاسی اَن پد یانزدہ اگستءِ بلوچستان نا آجوہی نا اعلان کننگا ہوڑن پد برطانیہءِ خطہ ٹی تینا مفادات آ حفاظت کننگ کِن اَسے چوکیدار سینا زلورت ئس اننا وجہ اَن ھو ہندوستانءِ پرغا۔ ہندوستان نا پِننگ اَن پد پاکستان جوڑ مَس و ھو تینا طاقت نا زورئٹ بلوچستانءِ قوضہ کرے۔ 27 مارچ 1948 اَن پاکستان نا قوضہ اَن الیس اینو اِسکان پاکستان نا خلاف بلوچ قوم نا مزاحمت برجاءِ۔
ھو خطاب کریسہ پارے پاکستان نا قوضہ اَن پد بلوچ سیاسی کارکن آک و لیڈرآک بلوچستان نا آجوہی کِن تینا جان آتے ندر کریر۔ دا شہیدآتا توارءِ کہ بلوچستان اَسے آزادءُ ریاست ئس مرے۔ نن دا دے نا حوالہ ئٹ دا سوگندءِ ارفِنءَ کہ نن تینا لمہ وطن کِن ہر وڑنا قربانی تننگ اَن چکءُ پد مفرون۔
ھو پارے دا جُہدءِ مون مُستی دننگ کِن ننا کُل سگت آتا ذمہ واریءِ۔ بلوچستان نا آجوہی کِن ننا پاٹی تینا کُل کاریم آتے پاش کرینءِ ننے دافتے مونی دننگ کِن سلہوہیءِ۔ دا خبر مرے کہ ریاست ننے ننا آجوہی نا جُہد اَن مُر تخنگ کِن ہر وڑنا پندل جوڑ کننگ ئٹیءِ۔
ھو پارے بلوچ آک بلو کچ سیہا شہید کننگانءُ ھو تینا جانءِ بلوچستان نا آجوہی و پاٹی نا پروگرامءِ مونی دننگ کِن قربان کرینو۔ نن ہمو شہیدآتا نظریاتی انگا سنگت ہون و ننے تینا شہیدآتا ہمو آجوہی نا توغءِ الم ایسر کروہیءِ۔
