ڈاؤن لوڈ ۔ رپورٹ :
https://thebnm.org/wp-content/uploads/2025/03/Paank-HR-Report-Feb-2025.pdf
بلوچ نیشنل موومنٹ( بی این ایم ) نا بندغی حق آتا ادارہ ‘پانک’ تینا فروری 2025 نا توئی رپورٹ ءِ شنگ کرینے ہراٹی بلوچستان ئٹی بندغی حق آتا گیشتر لتاڑنگ ئے مونا ہتِنگ مسونے۔
رپورٹ نا رد ئٹ فروری نا تو ئٹی پاکستان نا فوج بلوچستان ئٹی 18 بندغ ئے وے قانودی ئٹ کھسفے، ہندن 134 بندغ ئے زوراکی ئٹ بیگواہ کرے۔ آواران و کیچ ئٹی کھل آن زیات کیس آک رپورٹ مسونو۔ ہندا وڑ 50 بندغ ہرا بھاز ذہنی و بدنی بیدادی نا گواچی مسوسُر ہچو قادنودی کاروائی و بیدادی نا سوب ئے پاننگ آن بیدس یلہ کننگار۔
پانک نا فروری نا رپورٹ ئٹی پاش کننگانے کہ فروری ٹی زوراکی ئٹ بیگواہی ، لٹ ءَ کُٹ و وے قانودی ئٹ کھسفنگ نا تدینی تیٹی بھلو کچ اسے اسکان ترندی بسونے و دا بیدادی تیٹی پاکستان نا فوج فاش اوار ئے۔
رپورٹ ئٹی بلوچستان نا 14 ضلع تون اوار پنجاب و سندھ ئٹی زوراکی ئٹ بیگواہی نا تدینی تے دستاویزی دروشم تننگانے۔ آواران ئٹی 26، گوادر ئٹی 25 و کیچ ئٹی 21 بندغ ئے بیگواہ کننگا، زیمی مروکاتیٹی خوانندہ، سماجی باسک و مزور آک اوار اسُر ہرافتا بارو ئٹ اوفتا خاہوت آتے معلوم داری اف و او بھاز پریشانی تون مون تننگ ءُ۔
زوراکی ئٹ بیگواہی تا برخلاف زیمی مروک خاہوت آک شال۔کراچی و تفتان۔شال ئنا بھلا کسر آ دھرنا تریسہ برانز کریر۔ ہراٹی او تینا بیگواہ مروک دوستخواہ تا یلہ مننگ نا خواست ئے کریر۔
رپورٹ ئٹی وے قانودی ئٹ بیم تِروک کھسفنگ نا تدینیک ہم رپورٹ کننگانو ۔ مومن بلوچ ، کامران بلوچ و معراج نیاز ئے بیگواہ کریسہ منہ دے آن پد بیدادی کریسہ کھسفنگا۔ کیچ ئٹی ایم فل نا خوانندہ اللہ داد و گوادر نا مزور عبدالواحد ہم دا بیدادی تا گواچی مسور ہراڑان دا ظاہر مریک کہ ہاکستان نا فوج ئنا بیدادی آن خوانندہ آک رکھوک ءُ نئے کہ مزور آک۔
پانک تینا رپورٹ ئٹی ریاست نا توروکا ڈیتھ اسکواڈ آتا دو آن بلوچ اُلس ئنا کھسفنگ آ ہم تشویش نا درشانی کننگا۔
دا سخت انگا بندغی حق آتا خلاف ورزی تا برخلاف زیمی مروک خاہوت و سیاسی باسک آک تینا برانز ئے برجاء تخانو۔ ‘وی بی ایم پی ‘ نا برانزی کیمپ 5751 دے آن برجاء ئے ہرا زوراکی ئٹ بیگواہ مروک آتا خاہوت آتا توار جوڑ مسونے۔
پانک اقوام متحدہ، یورپی یونین و ایلو جہانی بندغی حق آتا ادارہ آتیان خواست کرینے کہ او پاکستان آ زور شاغِر تانکہ او بلوچستان ئٹی تینا ظلم و زوراکی نا گام تے تورے۔ رپورٹ ئٹی جہانی ادارہ آتیان خواست کننگانے کہ او بلوچستان ئٹی آزات پٹ ءَ پولی مشِن مون تریسہ زوراکی ئٹ بیگواہی، بیدادی و وے قانودی ئٹ کھسفنگ نا تدینی تا غیر جانبدارانہ آ پٹ ءَ پول ئے یقینی جوڑ کے۔
پانک دا گِڑا آ زور شاغا کہ بلوچستان ئٹی بندغی حق آتا لتاڑنگ آ پاکستان ئے جوابدہ کننگ کن جہانی ملک آتا توجہ ناگزیر ئے۔
