بلوچ نیشنل مووومنٹ (بی این ایم) نا بندغی حق آتیتو تفوک بشخ پانک مارچ 2025 ئٹی بلوچستان ئٹی بندغی حق آتا بھلو کچ ئسے اسکان برخلافی تیٹی ترندی ئٹ گیشتِری رپورٹ کرینے۔ ہراٹی 181 زوراکی ئٹ بیگواہ و 12 ئے وے عدالت آن کھسفنگ اوار ءِ۔
پانک ئنا توہی رپورٹ نا رد ئٹ پاکستان نا لشکر و اوفتو تفوک ڈیتھ اسکواڈ آک بھلو کچ ئسے ئٹ بندغ آتے زوراکی ئٹ دزگیر کننگ آن پد بیگواہ کرینو ہرافتا نشانہ گیشتر خوانندہ ، سماجی باسک و سول سوسائٹی نا بندغ آک اسُر۔ پانک پارے کہ 87 بندغ ئے بیگواہی آن پد یلہ کننگا ہرافتے آن بھاز آتے آ لٹ ءَ کُٹ نا نشان آک اسُر۔ رپورٹ ئٹی پاننگا کہ دا دزگیریک بیدس قانودی وارنٹ یا عدالت نا کاروائی آن کننگانو۔
شابیتی حوال آتے پاریسہ پانک پارے کہ شال و قلات ئٹی کھل آن زیات 37 بندغ نا دزگیریک رپورٹ مسونو۔ ایلو زیمی مروک علاقہ تیٹی ڈیرہ بگٹی (18)، گوادر (15)، نوشکے (13)، ڈیرہ غازی خان (10)، کیچ (9)، بارکھان (8)، آواران (7)، کراچی (6)، سیبی (2)، لسبیلہ (5)، مستونگ (4)، پنجگور (3)، و نصیر آباد آن 2 اوار ءُ۔ ہندن رپورٹ نا رد ئٹ اسلام آباد، کچی ، جعفر آباد ، جیکب آباد، و خضدار آن اسہ اسہ زوراکی نا بیگواہیک رپورٹ کننگانو۔
پانک پارینے کہ وے قانودی ئٹ کھسفنگوک آ بندغ آک مُست آن زوراکی ئٹ بیگواہی نا گواچی کننگاسُر۔ اوفتیٹی نظام بلوچ ہم اوار ءِ۔ ہرادے 11 مارچ آ گلی بلیدہ آن بیگواہ کننگاسس و ایلو دے اونا جون رسینگا۔ اونا ایلم شاہ نواز بلوچ ئے اوکا پد کیچ ئٹی سمکاری کریسہ کھسفنگا۔ اسہ پین کھسفنگوک ئس شاہ جہان کرد اسّ ہرا زوراکی ئٹ بیگواہ مروک بلوچ اسٹوڈنٹس آرگنائزیشن (BSO) نا مُھبر زاہد بلوچ نا ایلم اسّ۔ اودے خضدار نا علاقہ نال ئٹی کھسفنگا۔
پین اسہ دڑدی او تدینی ئس 21 مارچ آ اسہ پر امن او برانز ئسینا وخت آ مونا بس۔ ہرانا مسخت زوراکی ئٹ بیگواہ مروک بندغ آتا آجوئی نا خواست اسّ۔ رپورٹ ئٹی پاننگا کہ 12 سالی آ نعمت بلوچ، حبیب بلوچ و امداد بلوچ ئے برانز نا وخت آ سمکاری کریسہ کھسفنگا۔ پانک نعمت بلوچ نا شہادت ئے (ریاست نا زوراکی نا نشانی) پارے۔
23 مارچ آ احسان بلوچ ہرا بی وائی سی نا باسک و دکاندار ئس اس ، ئے خضدار ئٹی کھسفنگا۔ پانک دا کوش ئے (چم بازی ئٹ ٹارگٹ کلنگ) پارے۔ منہ دے آن پد 26 مارچ آ توصیف، ظہیر و ارشاد بلوچ نا جشوک آ جون آک مشکے آن خننگار۔ دا مُسِٹ مھالو آن بیگواہ کننگاسُر۔ پانک گیشتر پارے کہ سیف بلوچ و انس بلوچ ہرا منہ تو مُست بیگواہ کننگاسُر اوفتا لاش آتے مارچ ئنا اخیر ئٹی خسنگا۔
رپورٹ ئٹی پنی آ سیاسی باسک آتا وے قانودی ئٹ دزگیری نا رپورٹ آک ہم اوار ءُ، ہرافتیٹی ڈاکٹر ماہ رنگ بلوچ ، بیبو بلوچ، بیبگر بلوچ و شاہ جی صبغت اللہ بلوچ اوار ءُ۔ اوفتے ایم پی او ایکٹ ئنا رد ئٹ دزگیر کریسہ شال ئنا ھدا جیل ئٹی بند کننگا۔
پانک کاسی قبرستان ئٹی 13 نادرست او بندغ نا ڈھکوک کھڈ کننگ آ پریشانی نا درشانی ئے کرے ہرافتا بارِث ئٹ خُلیس ءِ کہ او ہنوکا وخت ئٹی زوراکی نا گواچی مروک آ بندغ آتا مننگ کیرہ ۔ تنظیم دا بندغ آتا کھڈ کننگ نا زوت آن زوت فورنزک پٹ ءَ پول نا خواست کرینے۔
پانک ریاست نا زوراکی ئے جہانی بندغی حق آتا قانود آتا فاش برخلافی پاریسہ اقوام متحدہ و جہانی بندغی حق آتا تنظیم آتے آن زوت اوار مننگ و پاکستان نا ریاست آن جواب خواہنگ نا خواست کرے۔
