بلوچ نیشنل موومنٹ (بی این ایم) نا بندغی حق آتا بشخ پانک جولائی 2025 نا توہی آ رپورٹ ئے شنگ کرینے، ہراٹی بلوچستان ئٹی زوراکی ئٹ بیگواہی ، وے قانودی ئٹ کھسفنگ، لٹ ئہ کُٹ و شاری تیا جلہو تا کیہی تدینی تے تفصیل و شاہدی تیتون اوار درج کننگانے۔ رپورٹ نا رد ئٹ پاکستانی فوج و اوفتیتو تفوک ادارہ آک کم آن کم 96 بندغ ئے زوراکی ئٹ بیگواہ و 19 بندغ ئے وے قانودی ئٹ کھسفیر۔
کچ ئنا رد ئٹ جولائی ٹی ضلع کیچ کھل آن زیات زیمی مسک ہراڑے 29 بندغ زوراکی ئٹ بیگواہ کننگار۔ اوکان پد شال ئٹی 17 و گوادر ئٹی 9 کیس رپورٹ مسُرک۔ ہندن آواران ئٹی 8، واشک ئٹی 7، کراچی و پنجگور ئٹی 5،5، نوشکی و ڈیرہ غازی خان ئٹی 3،3، ڈیرہ بگٹی مستونگ و لسبیلہ ٹی 2، 2 ئے زوراکی ئٹ بیگواہ کننگا۔ داڑان بیدس اسلام آباد آن اسہ کیس ئس رپورٹ مسک۔
رپورٹ ئٹی تربت نا ہندی 8 سالی آ چنا شعیب خالد نا دزگیری نا ذکر ہم ارے۔ ہرادے بندغی حق آتا باسک گلزار دوست نا تقریر نا ویڈیو ئے سوشل میڈیا غا شیئر کننگ نا سوب آن دزگیر کننگا۔
رپورٹ ئٹی 10 جولائی آ فرنٹیئر کور (ایف سی) نا راکٹ جلہو نا ذکر ہم اوار ءِ، ہرا کیچ ئنا علاقہ گورکوپ ئٹی گوازی کروک او جاگہ ئسے آ کننگا۔ دا جلہو ئٹی 7 شاری ٹپی مسُرک۔ ہرافتیان غلام علی بھاز ٹپی مننگ نا سوب آن کذیت کرے۔ ہندن شہاب دوست دل کومہ ٹی ءِ و ایلوفتے تا درمان کننگ ئٹی ءُ۔ ہندی آ آبادی ایف سی آ وے سوب آن لس شاری تیا جلہو نا دوبہ خلک و آزات و صاف پٹ ئہ پول نا خواست کریر۔
پانک نا رپورٹ نا رد ئٹ وے قانودی ئٹ کھسفنگ اسہ بھلو بحران ئس جوڑ مسُنے۔ جولائی ٹی کم آن کم 19 بندغ ئے زوراکی ئٹ کھسفنگا ہرافتیٹی کریم جان (مشکے، کندڑی)، ھمل بلوچ (تمپ گومازی)، غلام جان (آواران پہو)، عظمت رند (ڈیرہ مراد جمالی)، مجاہد بلوچ (خاران)، شاہ در مینگل (چاغی نوکنڈی)، حمید بلوچ (آواران کوٹو جاھو)، نذیر احمد (جاھو آواران)، نور خان (جاھو آواران)، قمبر اسلم (خضدار)، مزار بلوچ (مشکے کندڑی)، ڈاکٹر عبدالمجید مینگل، عطاء الرحیم مینگل و ممتاز مینگل(وڈھ خضدار) غلام علی ( کیچ گورکوپ راکٹ جلہو) و شاہ جہان (پنجگور چتکان)۔ داڑان بیدس قلات نا علاقہ کوہک آن مسہ جشوک او جون ہم دو تما ہرافتا چائنداری تیزاب شاغنگ نا سوب آن منکن مننگ کتو۔
