پانک جولائی 2023 نا رپوٹ – اردو
پانک جولائی 2023 نا رپوٹ – انگریزی
شال : بی این ایم نا بندغی حق آتا ڈیپارٹمنٹ ، پانک ، بلوچستان ھٹی بندغی حق آتا لگتمالی نا حوالہ ھٹ تینا جولائی 2023 نا رپوٹءِ تفصیل ھٹ درشان کریسا پارے دا سالءِ بندغی حق آتا حوالہ ھٹ بدترینءُ سال اَس پارینءِ۔
’57 بندغاتءِ جبرھٹ بیگواء ، ہفتءِ کسفنگ اَن پد جوناتءَ خسنگانءِ‘
رپوٹ نا وڑھٹ جولائی 2023 جبرھٹ بیگواہی نا حوالہءِ سال نا بدترین انگا تُو مسونءِ دا تُو ھٹی 57 بندغ پاکستان نا پوج جبرھٹ بیگواء کرینءِ ولے 22 بندغ جبرھٹ بیگواہی اَن پد تشدد کننگانءِ و پدا اِلہ کننِگانُ ، دا اِیت پاننگ تَنءِ کہ دافتے ہرا جرم ھٹ اَلنگاسوس و بندی کننگاسوس۔
پانک نا وڑھٹ پاکستانی پوج تینا بدنامءِ زمانہ کسِفنگ و خسِنگ والا پالیسیءِ برجم تِخیسہ بلوچستان ٹی ہفت بندغ نا جون خننگانءُ۔ دافتیٹی اِرٹ دالبندین اَن، اسِٹ نوشکے اَن، اسِٹ بارکھان اَن، اسِٹ کیچ اَن، و اسِٹ نادُروستءُ جون اَس گوادر اَن دُو تمانءِ۔
رپوٹ ھٹی ڈیرہ بگٹی ٹی بندغی حق آتا لگتمالی نا تازہءُ لہر مونءِ بسونءِ بلُو افسوز ھٹ اننا پاننگا کہ ضلع ڈیرہ بگٹی ٹی گدرینگوکا تُوءِ پاکستان نا ظلم وزواکی نا جاگہ جوڑکننگانءِ۔ اودے کُل اَن زیات 15 بندغءِ جبرھٹ بیگواء کننگا انون بازنگا علاقہ تیٹی اَسے ہفتہ اَس پورا پوجی آپریشن کننگا و ھوراتیٹی دُزی کننگا و آبادی تیٹی مارٹر گولا فائر کننگا انا وجہ اَن ھوراک و شارھٹی بندغاتءَ مالتے بلوُ تاوان اَس رسینگانءِ۔
پانک نا رپوٹ ھٹی وڈ ضلعءِ خضدار ٹی شفیق مینگل نا پشت پناہیءُ دہشت گردی نا ذریعہءِ تینا اثرورسوخءِ ودفنگ نا کوشست ، سی پیک پروجیکٹ نا دہ سالہ جشن ئنا وختءَ بندغی حق آتا لگتمالیءِ تیز کننگ ، بلوچستانءِ ووٹ تیٹی بندغاتءِ اتِنگ کِن جبرھٹ بیگواغا بندغتءِ استعمال کننگ کِن ریاست نا چال آکو و ہزارہ ٹاؤن شال ٹی چُناتءِ ایف سی والا نا بد فعلی نا کوشست نا زی آ تفصیل ھٹ اِیت کریسا پاریر دا کُل عمل آتے بندغی حقاتءَ سختءُ خلاف ورزی پاننگِیک۔
’پاکستان نا پوج نا خیرءِ الیسءَ دادے مقامی آبادی تَن مُر و دائنا چیک پوسٹ آتے داکَن مُر کرویءِ‘
پانک تینا رپوٹ ھٹی ہزارہ برادری نا نیمغ اَن ایف سی نا شاری آبادی تیٹی چیک پوسٹ آتے ختم کننگ نا حمایتءِ کرینءِ ھو پارے بنگلہ دیش ، ھیٹی و بلوچستان ٹی پاکستان نا پوجیتءَ بدفعلی نا واقعاتیٹی ھوار مروکاتے سافءُ ثبوت رسینگنِگ اَن پد ھم بندغی حقاتءَ جہانی تنظیم آک دافتءَ تورنگ و شاری تا حفاظت کننگ کِن ہچو توجیل اَس کتنءُ۔
پانک پائیک میڈیا ٹی اننا خاص انگا واقعاک رپوٹ مسونءُ اننا کہ بلوچ سماج نا زی آ بلوءُ اثر اَس شاغانءُ ولے بین الاقوامی سطحءِ بندغی حق آتا ادارغاتءَ چُپی دا معاملہ آتے پین مونی درینءُ۔دا زلوریءِ پاکستانی پوج اَن دا اِیت آتءَ سوج النگءِ و اوفتے مقامی آبادی تَن مُر کننگءِ و ہونا چیک پوسٹ آتے خلاس کننگءِ۔
’شفیق مینگل تون خوشہی نا عمل اَن بندغی حق آتا وڑ آک جوہان مننگ اَن بیدس زیات خرابی نا نیمغءَ اِنور‘
ادارہ پانک وڈ ضلع خضدار نا تفصیل ھٹ جائزہءِ مونءِ ایسونءِ بلوچستان نا سیاسی و قبائلی کماش آتے دا اِیتءِ پارینءِ کہ ھو فرسودہءَ قبائلی نظام نا خِیر ھٹ مننگ اَن بیدس بلوچ سماجءِ قومی بنیات ھٹ یکجاکیر و بندغی حق آتا لگتمالی نا تورِنگ کِن تینا کوشست آتے تیز کیر و شفیق مینگل نا وڑاِنگا مجرم آتے قبائل نا بغلءِ ڈکِنگ اَن بیدس ہودے سزا تننگ نا کوشستءِ تیزکیر۔شفیق مینگل تون خوشہی نا کوشست ریاستءِ مضبوط کننگءِ داڑن بلوچستان ٹی عوام دوستءَ طاقت آتے زمین تنگ مریک و بندغی حق آتا حالیت امو وڑ سلیک امو وڑکہ موست مسونءِ۔
پانک نا رپوٹ ھٹی دا اِیتءِ ھم خاص توجہ تننگانءِ کہ چائنا و پاکستان نا اکنامک کوریڈور پروجیکٹ نا وجہ اَن مقامی آبادیءِ تینا علاقہ تَن جبری پیشن مننگ کِن پوج کشی کننگ ھٹیءِ و جبرھٹ بیگواہی تیٹ زیاتی مننگ ھٹیءِ۔پانک پائیک دا معاملہءِ بین الاقوامی برادری خاص کر بلوچستان نا بازنگا پروجیکٹ آتیٹی کاریم کروکِنگا کمپنی دا اِیتءِ توجہ اِیتِر کہ اوفتا شراکت اَن داڑے بندغی حق آتا باز خلاف ورزی مننگ ھٹیءِ۔پاکستان تون کمک کروکا ملک آک و سرمایہ دارآک دا بابتءِ سنجیدگی ھٹ سوچ خلیر کہ اوفتا شراکتداری اَن بلوچستان نا لگوکا خاخرءِ تیل شاغنگ نا وڑءِ۔اوفتءِ بلوچستان نا مخلوق نا خودمختاری و وسائل نا زیءَ پُورا اختیار و بنیاتی انگا حق آتے منائفنگ کِن تینا کردارءِ ادا کرویءِ نہ تو بلوچستان ٹی سرمایہ کاری کننگ اَن خُون خرابہ زیات مروءِ۔
’ہمسایہ ملک آک بلوچ مہاجرین آتے بین الاقوامی مہاجرین نا درجہءِ ایتِر‘
پانک دا اِیتءِ ھم توجو تسونءِ کہ ہمسایہ ملک آک خاص کر ایران ہجرت کروکا مہاجرین آتے بین الاقوامی سطحءِ مہاجرین نا درجہءِ تننگ کِن حکومتءِ ایران مناسبءُ پالیسی اَس اڈ ایتءِ انتیکہ ہودے ہزار آتا بندغاک خاص کر چُنا تا مستقبلءِ جوہان کننگ کِن سوچ خلویءِ دونکہ داسہ ھو تعلیم اَن محرومءُ۔
پانک تینا رپوٹ ھٹی بلوچ نیشنل موومنٹ نا موقف نا تائیدءِ کریسا پارینءِ کہ پاکستان مون موستی ووٹ آتا وختءِ بلوچستان ھٹی بندغی حق آتا خلاف ورزی تیٹی تیزی اَتیک و جبرھٹ بیگواہ مروکاتا بندغاتءَ خاندان و ایلو بندغاتے پاکستان تینا ووٹ تیٹی زبردستی شامل مننگ کِن استعمال کیک۔
