بانک کریمہ دیر اسّک ؟
بانُک کریمہ بلوچ ، دبی ، متحدہ امارات ئٹی 8 مارچ 1983 ٹی جمیلہ و محراب نا اُرا ٹی ودی مسّک۔ کریمہ محراب بلوچستان نا پنی آ قوم دوست رہشون استاد واحد قمبر نا ایلم نا مسڑ اسک۔ اونا کاکا شہید ڈاکٹر خالد بلوچ بلوچستان نا آزاتی نا جنز ئنا پنی او شخصیت ئس اسّک۔
او بی این ایم نا رہشون حمل حیدر نا زائیفہ اسک۔ اودے 20 دسمبر 2020 آ کینیڈا نا شار ٹورنٹو ٹی پاکستان نا ڈھکوک ادارہ تا کارندہ غاک شہید کریر۔ او تینا باوہ پیرَئی آ خلق تمپ ئٹی گُلزمین نا باہوٹ ءِ۔
او بلوچستان نا آزاتی نا جنز ئنا پنی آ رہشون اسک۔
او انت خواہاکہ ؟
بلوچستان نا آزاتی۔ بانک کریمہ بی ایس او نا تلّہ غان بلوچستان نا آزاتی کن جہد کرے۔ بلوچستان نا کنڈ کنڈ ئٹی بلوچ خوانندہ غاتے بلوچستان نا آزاتی نا ترغیب تِسّک۔
او جہانی پڑ آ ہر پلیٹ فارم آ بلوچ آتیا مروکا ہر زوراکی ئے شیف خلک۔ جہان نا مونا دا راستی ئے ہیسک کہ بلوچستان اسہ کوزہ مروکو ملک ئسے۔ مھالو پاکستان نا بشخ متَنے و نئے کہ داسہ بلوچ آک پنجابی نا غلامی ٹی رہینگنگ خواہِرہ۔
دیہاڑ اودے امر یاد کیک ؟
سال 2015 ٹی او بی ایس او نا دیہاڑ نا اولیکو زالبول چیئرپرسن گچین کننگا۔ سال 2016 ٹی اودے برٹش براڈکاسٹنگ کارپوریشن (بی بی سی) دنیا نا صَد پنی آ زالبول تا لڑ ئٹ اوار کرے۔ انتئے کہ او بہادری ئٹ بلوچ قوم ئنا آسودہ انگا بروکا دے تیکن جہد کرے۔
او جلاوطن انتئے مسّک ؟
اونا سیاست و راج دوستی کن کروک کاریم تا بنیات آ پاکستان نا حکومت بھاز وار اوڑا جلہو کرے۔ اونا اُرا غا سمکاری کننگا و راکٹ لانچر نا گولہ خلنگ مسّک۔ خُلیس اسک کہ پاکستانی لشکر اودے زوراکی ئٹ بیگواہ کرو ہندا سوب آن سال 2015 ٹی او بلوچستان ئے اِلّنگ آ بیوس مسّ و کینیڈا ٹی باہوٹ مسّک۔
جلاوطنی ٹی اونا کڑد انت مسُنے ؟
او بی ایس او نا چیئرپرسن نا حیثیت ئٹ تینا تنظیم نا پروگرام آتے مونا دننگ کن کاریم کرے۔ بلوچستان نا حالیت آتا جہانی تلّہ غا ہیت کرے۔ ہندا خاطر آن او پیشن نا ملک ئٹی ہم پاکستانی حکومت نا نظر ئٹ بسّک۔ بی ایس او آن پد او بی این ایم ئٹی اوار مسّک۔
او امر کذیت کرے ؟
20 دسمبر 2020 ئٹی شہید بانُک کریمہ ئے کینیڈا نا شار ٹورنٹو ٹی پاکستان نا ڈھکوک ادارہ تا کارندہ غاک اونٹاریو پنی او کَل ئسیٹی خسّار۔ انتئے کہ دا وڑ ئٹ کھسفنگ ئٹ کھسفنگ نا نشانی و ثبوت آک گوئنگرہ۔ بانک کریمہ آن مھالو سویڈن ئٹی پنی آ ادیب و صحافی ساجد حسین ہرا کہ شہید غلام محمد بلوچ نا ایڑ ئنا مار اسک۔ ئے ہم ہندا وڑ ئٹ 2 مارچ 2020 آ اوپسالا سویڈن ئٹ فیری جَھل ئٹ خسِّسہ کھسفنگاسس۔ کھسفنگ آن مھالو بانک کریمہ نا فون آ اسہ پیغام ئس بسسّ کہ ’’ نے نا کروکا عمل تا بدلہ ٹی کرسمس نا ٹیکی رسینگو ‘‘
بانک کریمہ نا کڑد ئے امر یاد کننگو ؟
بانک کریمہ بلوچ جنز ئنا نشانی ءِ، کُھل آن زیات او زالبول تیکن چیدہ ئسے کہ امر او زندگی و سماج نا ہر بشخ ئٹی ہمرو ہم مشکل او کاریم ئس مرے، تینا حصہ ئے شاغِنگ کیرہ۔ زالبول آک تینا لائخی و زانت ئٹی کس آن کم افس ۔ اگہ اسہ زالبول ئسیٹی لائخی و زانت مرے تو او قوم ئسینا سربر و رہشون مننگ کیک، ہمر کہ بانک کریمہ ئے بی ایس او تینا چیئرپرسن گچین کرے۔
بی این ایم بانک کریمہ ئے ’’ بلوچستان نا روشنائی ‘‘ نا پن ئے تسّک۔ و بلوچ قوم اودے لمہ کریمہ نا پن ئٹ یاد کیک۔
