شال: جمعہ نا دے بلوچ نیشنل موؤمنٹ نا نیمہ غان بلوچستان ئٹی پاکستانی ریاست نا نیمہ غان کروک آ ایٹمی تراک آتا بر خلاف پمفلٹ شینک کننگ مسک۔
پمفلٹ ئٹی نوشتہ اسک کہ بلوچستان ئٹی ایٹمی تراک آتا کننگ نا سوب بلوچستان ءِ تینا ایٹمی تراک آتا جاگہہ جوڑ کننگ و بلوچ نا راجی غلامی ءِ۔
بی این ایم نا نیمہ غان شینک مروکا پمفلٹ نا رد ئٹ کہ دنیا ٹی اراڈے ہم ایٹمی تراک آک مسونو گڑا پدا ہمو تراک آتا سوب آن پیدا مروکا اثرات آتا توننگ کن پین گامگیج ہرفینگانے ولے بلوچستان ئٹی دونو ہچو مثال ئس افک۔ دا بلکہ نیوکلئیر تجربہ اسکان محدود افک بلکہ پاکستان تینا لشکری زور ئٹ بلوچستان ئٹی تینا ایٹم بمب آتے مُچ ہم کرینے کہ ایٹم بمب آتا ریڈیئیشن نا وخت آ بلوچ اُلس بھاز نسخان مرو۔
پمفلٹ ئٹی نوشتہ اسک کہ پاکستان دنیا نا ہمو ملک آتیٹی اوار ءِ کہ اوفتے ہچو انتطامیہ اس افک۔ پاکستان نا لشکری و زری حالیت پاکستان نا مُچ کروکا ایٹمی مڈی تا زی آ ہم بھاز جُست مننگ کیک کہ اگہ دا ایٹم بمب آک مذہبی تنظیم آتا دوٹی تمار گڑا بلکہ دا ہند نہ تیوہ دنیا ءِ بھاز متاثر کرور ۔پاکستان اسہ غیر قانونی ءُ ایٹمی ملک ئسے کہ اودے ایٹمی ملک جوڑ کننگ آ امریکہ نا وڑنگ آ ملک آک ہم تُد ءُ ولے اینو پاکستان نا ایٹمی مڈی تا رکھ مفننگ نا سوب آن تیوہ دنیا پریشان ءِ کہ پاکستان نا این ٹی پی نا باسک ئسے و نا کہ پاکستان سی ٹی بی ٹی نا زی آ دستخط کرینے ۔
اینو پاکستان نا ہندا ایٹم بمب آتا سوب آن دنیا ءِ بلیک میل کننگ ءِ و دا ہیت ءِ نشان تننگ ءِ کہ اگہ پاکستان نا ایٹم بمب آک دہشتگرد آتا دوٹی تمار گڑا دنیاءِ بھس کرور۔
پمفلٹ نا رد ئٹ اسلامی ایمان نا رد ئٹ قیامت ہمو وخت آ مرو کہ فرشتہ اسرافیل صور ءِ دم خلو و دانا اولی توار ہنداخس خوفناک مرو کہ دنیا بھس مرو ولے ہندا قیامت نا دےءِ بلوچ اُلس 28 مئی 1998 آ خُڑک آن خنا کہ بلوچستان نا زی آ قوضہ کروکا ریاست پاکستان بلوچستان نا ہند چاغی ٹی پنچ ایٹمی تراک کرے اوفتا خراب انگا اثر آک چاغی و ہیب کھیب ئنا ہند آتا الُس ئنا زی آ ہم تمانے کہ اینو اسکاں چاغی و ایلو ہنداتیٹی اُلس متاثر مننگءِ۔
