بی این ایم نا پمفلٹ : پاکستان نا بے مستحکم آ جوھری حیثیت علاقہ نا پائیدار آ امن کِن بھلُو خطرہ ئسے
‘بلوچستان نا آجوئی آن بیدس دا خطہ ٹی پائیدار ءُ امن مننگ کپک ، ننا تحریک نا حمایت امن و انسانیت نا حمایت کننگ ئے’
28 مئی 1998ء نا سہب اَسہ تارمہ ءُ سُہب ئس اس۔بلوچستان نا ساحل آن ہلیس کوہ سلیمان نا علاقہ اسکان بلوچ مخلوک پین وڑ ءُ پریشانی سے ٹی اس و خن تا عجیبو بیماری سے ئٹ بش مسُر۔ پاکستان نا ریاست اینواسکان میڈیا آ بلو اثر ئس تخِک و بلوچستان ئٹی میڈیا بلیک ہول نا وڑ کُڑمبی ٹی ئے ہندا وڑ تعلیم و آگائی نا حوالہ ئٹ باز پسماندہ ئے ، کمیونیکیشن ئٹی ہچو جوانو وڑ ئس خننگپک۔ اَسٹ ئس ھم دا ہیت ئے غور کتنے کہ راسکوہ پاکستان نا کروکا ایٹمی تجربہ غاتان ودی مروکا تابکاری نا اثرات آک راسکوہ و اونا داپار ہیپار نا ماحول ئے اخسو بھلو تبائی سیٹی بدل کرینے۔ داسہ ہم بلوچستان ئٹی باز انگا جاگہ تیٹی کینسر و سِل ئنا بیماریک تالان مسنو ، ہمو ایٹمی تجربہ نا وجہ آن پیدا مسُنو ۔ پاکستان نا میڈیا غلط بیانی ئٹ راسکو ئے اَسے غیر آباد ءُ علاقہ ئس پاننگے ولے راسکوہ چارمَہ کُنڈ اَسہ بھلو آبادی والا علاقہ ئس چاننگِک، داڑان بیدس راسکوہ نا مش تا آبادی بندغاک ایلو جانداراک ، دِیر ئنا نالہ و چشمہ و درخت آتون اوار ئے۔ ایٹمی دھماکہ نا وجہ آن مش ئنا اَسہ بھلو حصہ ئس پیہُن مسُنے۔
ہمو وخت پاکستان مسلم لیگ ن ئنا حکومت اسک، بھلُو مینڈیٹ ئسے تون بروکا وزیر اعظم نوازشریف تینٹ اَسِہ طاقتور ءُ حکمران ئس چاننگاکہ ،عطاءاللہ مینگل نا پارٹی بی این پی نا بلوچستان ئٹی کٹھ پتلی ءُ حکومت ئس کننگ ئٹی اَس و عطاء اللہ مینگل نا مار اختر مینگل اونا وزیر اعلی اس۔ او ایٹمی دھماکہ نا جاگہ اسکان نواز شریف نا گاڑی نا ڈرائیونگ ئے ہم کرے۔ بلوچستان ئٹی قومی تحریک او وخت آ پس منظر ئٹی اس ہندا وجہ آن اِرا مظبوط ءُ اتحادی ایٹمی تجربہ غان ماحول آ تموکا تابکاری نا اثرات آتے سیاسی نعرہ بازی ئٹ دبائفنگ نا کوشست کریسا اسُرہ۔
ولے، 28 مئی 1998ء آن پد دنیا بدل مسوُسُس۔پاکستان ءِ ایٹمی طاقت جوڑ کروکا اولیکو صف والاک ذوالفقار علی بھٹو آن ہلیس نواز شریف و ایٹمی سائنسدان عبدالقدیر اِسکان پاکستان نا فوج ئنا دُو آن ذلیل کننگار۔ او وختا اختر مینگل بلوچستان نا وزیر اعلی اس، اقتدار آن برطرف کننگا و اوڑتون باز ذلت آمیز وڑ ئٹ پیش بننگا۔ ولے بدقسمتی ٹی اینو اسکان اختر مینگل تینا کروکا کاریم تان معافی ہلک و نہ کہ پاکستان نا سیاسی قیادت ایٹمی تجربہ غاتا منفی انگا اثرات آتے توجہ تسُر ۔ دا تجربہ نا سیاسی اثراتاک ہم علاقہ و جہان نا مونا پاش ءُ ۔ پاکستان نا فوج ، حکومت و ایٹمی سائنسدان ، عبدالقدیر خان ، کھل دنیا ٹی ایٹمی آ سلاہ تے شینگ کننگ ئٹ بدنام مَس۔ اخس سال اسکان پاکستان ایٹمی سلاہ تے جوڑ کننگ آن فائدہ ہرفنگ ئٹ اَسے آلہ سے نا وڑ استعمال کرے۔کُھل اسلامی ملک آتے ہندا یقین تننگا کہ پاکستان نا ایٹم بمب پُورو جہان ئٹ اسلام نا حفاظت کِن جوڑ کننگانے۔
جہان ئٹی ہندُنو ملک ئسَے تون ایٹم ، بم ارے اوڑے مذہبی طاقت آک سماج ئٹی شیف روتہ خلکنو و فوج ئٹی ہم مذھب نا شدت پسندی بھلو وڑ ئسیٹی پترینگانے۔ داڑے نہ کہ جمیت علمائے اسلام و جماعت اسلامی نا وڑو بنیات پرست اسلامی جماعت آک طاقتور جوڑ مسُنو داڑان بیدس تحریک طالبان پاکستان ، دولت اسلامیہ (داعش)، تحریک جہاد پاکستان نا وڑ ءُ جہادی تنظیم آتے ہم متحرک کننگانے و اقتدار نا زی آ قوضہ کننگ کِن ریاست تون اوار مسلح جنگ کننگ ءُ ۔
مُست ئنا تُو آ ، پاکستان تحریک انصاف نا سروک عمران خان نا گرفتاری آن پد پاکستان ئٹی احتجاج آتان ہمو حالیت ودی مَس دا پاکستان نا وڑو بے بنیاد ءُ ملک ئسے تون ایٹم بم نا مننگ آن اخہ سال مُست ختم مروکا سوال آک واپس کاٹم ہرفیر۔ پاکستان باز انگا حوالہ تیٹی دا قابل اف کہ بُلو وڑ ئسیٹی تباہی کروکا ہتیھار تے اونا کنٹرول ئٹ تننگانے۔ پاکستان ریاست نا مکمل کنٹرول ہرا طاقت تُون ءِ او پاکستان نا فوج ءِ ، ہمو دنیا نا کُھل آن زیات بے مہذب و کرپٹ ءُ فوج اَسے ۔ فوج پاکستان نا آئین و قانون ءِ تینا بُوٹ آتا کیرغ آن تخیک۔ چُنکا بَھلا سیاسی آ معاملات آتا زی آ فوج زوت تینے اوار شاغِک سماج نا باز انگا کاریم تے خراب کرینے۔ تعلیمی ادارہ غاتے فوج ئنا قوضہ مخلُوک نا شعورءِ تباہ کرینے ، پاکستان نا معاشرہ ءِ فوج چاننگ آن پد پسماندہ تخِک دا خاطر آن فوج تینا کرپٹ آ ٹولہ تون ریاست نا زی آن مُر مفک۔
پاکستان ہندُنو ملک ئسے ہراڑے اَسہ وخت ئس ہم جمہوریت متنے۔ فوج کرپٹ انگا بندغ آتا اَسہ گروپ ئسے زور ئٹ ریاست نا ادارہ غاتا قوضہ کرینے۔ فوج تبلیغی جماعت آن ہلیس سیاسی آ جماعت آتون اوار ءِ ۔ مُست زمانہ ٹی پاکستان تحریک انصاف ( پی ٹی آئی) نا زی آ دا الزام اس کہ او فوج ئنا بی ٹیم ئنا کردار ءِ ادا کریسا ءِ ولے داسہ پی ڈی ایم ( پاکستان ڈیموکریٹک فرنٹ : مسلم لیگ نون ، پیپلز پارٹی ، جمیت علمائے اسلام ، بلوچستان نیشنل پارٹی و ایلو جماعت آتا اتحاد ) نا حکومت ہرا کہ پی ٹی آئی حکومت نا خلاف تحریک آن پد اقتدار ئٹی بسُر، مُست ہندا تینٹ پاکستان نا فوج آ تنقید کریرہ مولانا فضل الرحمن ، نواز شریف پاکستان نا فوج آ تنقید کریرہ کہ او سیاسی معاملہ غاتیٹی اوار مفس ولے فوج ئنا مرضی و کمک آن کہ دافتا ٹولی ءِ اقتدار ئٹی اوار کننگا دا پاکستانی فوج ئنا حمایت ئٹ بندغی حق آتا خلاف ورزی نا ریکارڈ ءِ پرغنگ ئٹی ءُ ۔ ساف خننگِک کہ پاکستان نا فوج شطرنج نا ہڑتوما کنڈ آ تینٹ گوازی کریسا ءِ و ہر گڑا و کُھل مہرہ غاتے تینا دُو ٹی کرینے ۔
پی ٹی آئی کہ ہودے پاکستان نا پوج تینا پورا منوکنگا جماعت نا وڑ ڈیزائن کریسوس ، پاکستان نا پوج ھٹی اموڑے پین پین خیال نا سیاسی ھو کلباک کاریم کننگ او ہودے دا جماعت بلو بشخ و بانڈ نا شکار مسون اے۔ پاکستان نا پوج ، عدلیہ و سول اسٹبلشمنٹ ھٹی اَسے بلو تعداد اَس عمران خان نا حمایت اے کیک ، اننا وجہ ھن پنجاب ھٹی خانہ جنگی نا وڑو حالیت اَس جوڑ مسون اے۔پنجاب اموکہ پاکستان نا کُلا اقتدار اے قوضہ کرین اے۔عمران خان نا گرفتاری نا بدل ھٹ پی ٹی آئی نا کارکناک دُونکہ پوجی مکانتے حملہ کریر انونکہ حکومت و پوجی اسٹبلشمنٹ بندغی حقاتا و قانون نا خلاف ورزی اے کریر۔ دا جہان نا حوالہ ھٹ اَسے پریشانی اَس مروی اَس۔
اسِے ریاست سیٹی اگہ قانون و بندغی حقاتا احترام مف اودے مخلوک نا بغاوت دے نہ دے اَس بلُو پرشت و پروش اَس اتیرا۔دا مخلوک نا غصہ عمران خان نا حق ھٹی مرے یا کہ تحریک لبیک پاکستان ( ٹی ایل پی ) نا وڑو مذھبی جماعت نا جذباتی ہا احتجاجاتا شگل ھٹی ھم مریک ، دا نا وجہ مخلوک تون مروکا منفی انگا سلوک اے ۔اگہ مخلوک نا راست انگا ایت اے پابندی لگِک اوفتا کسرتے بند کننگِک اوفتے طاقت ھٹ تورنگِک۔مذھبی انگا و جنگی انگا تنظیماک بندغاتے تنا کُنڈا چِکرا و تینا کاریم تیٹ خلیرا۔دا حالیت ھن پیشن مننگ نا اَسے کسر اَس سلیسون اے نہ تو دا خطہء نا جنجالاتن مچا جہان تباہی نا کنڈا دننگِک۔
اینو بلوچستان ھٹی ایٹمی تجربہ غاتے 25 سال گدرینگان اے ، پاکستان داخہ سالاتا تیٹی بلوچستان ھٹی تینا ظلم و زوراکیتے ودیفین اے ۔ اننا ظلماتا وجہ ھن ہزارہا بندغاک جبرھٹ بیگوا کننگان ھو ، کسیفنگان ھو و جبرھٹ جلا وطن کننگ اے مجبور کننگان او۔ ایران و افغانستان ھٹی بلوچ مہاجرین آک بدحالی و بے محفوظ ھو زند اَس گدریفسہ ھو اودے اوفتے تعلیم ، صحت و روزگار نا ہچوو وسیلہ اَس اف۔
بلوچ نیشنل موومنٹ (بی این ایم ) جہانی ادارغاتے دا کنڈ اے تَوجو تننگ خوائک کہ ھو پاکستان اے اَسے بے مستحکمو ایٹمی طاقت و بلوچستان تون ھوار ایلو قوماتا زی قوضہ اے سمجھ ایِر داڑن بیدس ھو دا حالیت ھن پیشن مننگ کِن بلوچات تون ہر وڑ نا مدت و کمک کیر۔جہان نا طاقتاک پاکستان نا ایٹمی سلہ آتن بلیک میل مننگ ھن بیدس داڑیے سنجیدگی ھٹ سوچ خلوی اے انافتن پاکستان دنیائے بلیک میل کریسا اے۔ پاکستان ھٹی پُوسکنا مروکا واقعاتاک محکومنگا قوماتا و پنجاب نا نیاما بلو دراڑ اَس شاغان او۔ داسا مُچ محکومننگا قوماک سنجیدگی ھٹ ‘اسلام آباد’ تون تینا ‘ حاکم و محکوم ‘ انگا وڑھٹ سوچ خلیسا او ۔ پاکستان نا ایٹمی جاگہ غاتے جہان نا ادارغاتا کنٹرول ، پاکستان نا خلاسی و قومی انگا ریاستاتے جوڑکننگ پاکستان نا ‘شیطانی آ بم ‘ ھن خلاسی کِن دا قدمتے ارفوی تمیک۔ نن اسیوار واپس پانا کہ بلوچستان نا آجوہی ھن بیدس دا خطہ ٹی امن ہچ وڑسیٹی بفک ، ننا تحریک امن و انسانیت اے ہر وخت مننِک و ہوفتا حمایت کِن مدام اولیکو صف ھٹی سلہوک مروے۔
