بی این ایم نا پمفلٹ » یانزدہ اگست: نن تینا آجوئی نا خوشی تے پدا خنِن
پُر مڑاہ آ بلوچ راج!
ہندوستان نا ونڈ مننگ آن مُست 04 اگست 1947 نا دے ہندوستان نا وائسراے لارڈ ماؤنٹ بیٹن محمد علی جناح و خان قلات احمد یار خان نا اواری ئٹ توسُر بلوچستان نا آجوئی نا زی آ اتفاق مسُر و بلوچستان نا آجوئی نا کاغذ آتا زی آ تینا دزرند (دستخط) آتے خلکُر و 11 اگست 1947 نا دے بلوچستان نا آجوئی نا دے تسلیم مس۔ ہندا معاہدہ نا رد ئٹ بلوچستان نا ہند ئٹی اسہ آجو ءُ ڈیھ ئسینا دروشُم ئٹ مونی بس ، اونا آجوئی و خواجئی ءِ زور ئٹ جوڑ مروکا ریاست پاکستان ہم منّا۔ وختس دا پڑو دہلی ریڈیو آن شنگ مس گُڑا 15 اگست 1947 جمعہ نا نماز آن پد خان احمد یار خان آجوئی نا پڑو ءِ کرے و بلوچستان نا بیرک ءِ پہر و شان ئٹ بُڑز کرے۔
11 اگست 1947 آ بلوچ سر ڈغار انگریز نا سد سالی قوضہ آن آجو مس و جتا ءُ پجار ئسینا خواجہ مسک، ہندا سوب آن دا دے بلوچ راج اکن “سوغند سرسبزی” نا دے چاننگ مریک۔ دا دے ننا پیر و کماش آک قول ءُ سوغند کریسُر کہ اوفک اسہ خوش حال او بلوچستان ئس جوڑ کرور ہرا بروک آتا زوراکی تیان آجو مرو۔ ولے دا آجوئی ہُرے اسکان برجاء متو و زوراک آ پاکستان 27 مارچ 1948 ئٹی بلوچستان ءِ قوضہ کرے اینو ہفتاد ءُ پنچ سال مریک انگہ پاکستان زوراکی ئٹ ننا زی آ ظلم و جبر و لُٹ و پُل و ننا بیگواہ کننگ کن تیار ءِ۔
بلوچ راج ئنا چُنا!
ہمو دے کہ پاکستان ننا لُمہ سرڈغار ءِ جبر ئٹ قوضہ کرے ہمو دے آن قربانی تا لڑ اسہ وڑ ئٹ برجاء ءِ ہرا ہچ کم متنے، انتئے کہ بلوچ راج سرپند ءِ کہ کنا زندگی و پگہ کنا گلزمین ءِ و گلزمین نا آجوئی و دوئی کننگ کن قربانی المی ءِ تانکہ ننا بروکا نسل آک آجو و پُر ایمن او زند ئس گدریفنگ کیر۔
پُر مڑاہ آ بلوچ راج!
زوراک آ پاکستان اینو ہم ننے ختم کننگ کن تینا قوضہ گیری نا گام آتون مونی ہننگ ءِ و ڈیہہ ئنا ہر کُبین آ مال و مڈی تے لیلام کننگٹی ءِ۔ دا لُٹ ءُ پُل آن بیدس ہڑدے ننا لج و ننگ ءِ لتاڑِسا دے ئس کوچہ سیٹی لشکر کشی کننگ ءِ تانکہ بلوچ راج تینا پجار ءِ گوہے و مُدامی کن پنجاب نا غلام مرے ولے بلوچ ورناک سماء کرینو اونا خونخوار آ لشکر تون مون پہ مون جنگ کننگ ءُ تانکہ نن تینا راجی زندمان و سرڈغار ءِ رکھنگ کین و دژمن ءِ دا سیم آن کشین۔
دا راست ئسے کہ دشمن ءِ تینا سیم آن کشنگ کن ننے تینا راجی طاقت ءِ مضبوظ کروئی ءِ تانکہ نن دژمن ءِ مات تین و تینا سرڈغار آن نرفن، ہندا سوب آن دا ذمہ واری تنیا اسہ پارٹی و تنظیم ئسینا اف بلکہ کُل بلوچ راج ئنا ذمہ واری ءِ کہ اوفک تینا طاقت و وس ئنا کچ دشمن نا برخلاف بش مریر تینا راجی تنظیم و پارٹی تیتون ہمراہ و ہمگام مریر تانکہ نن پدا تینا آجوئی و ایمنی نا خوشی تیتوں زندگی کننگ کین۔
پُر مڑاہ آ بلوچ راج!
دا جنگ ننا زندمان و روشن آ پگہ نا جنگ ءِ، دا جنگ بروکا نسل آتا خوشی و پُر ایمنی نا ءِ۔ دا راست ئسے جنگ زوال و تباہی ہتیک ولے جہان نا کُنڈ کُنڈ ئٹ اگہ اینو اسہ پُر ایمن و آجو ءُ ڈیہہ ئس خننگِک دا ہندا بہادری، جُہد و جنگ ئنا برورد ءِ کہ بہشت نا چہرہ ءِ تیرہ۔
نن ہم تینا راجی زندمان ءِ جوان کننگ کِن دا جنگ ئٹی بسُنُن و تینا بروکا دے تے پٹنگُن تانکہ دا بھلا جہان نا ہند آتیٹی نن بیگواہ مفن و بلوچ راج ئنا حیثیت ئٹ تینا جند ئنا گلزمین نا زی آ زندہ مرین، گُڑا نن کن المی ءِ کہ نن دشمن نا برخلاف جنگ کین و تینا قوضہ مروکا سرڈغار ءِ آجو کین و ہر وڑ ئنا قربانی تے تننگ آن چکّ ءُ پد مفن۔
بلوچ نیشنل موومنٹ
