تربت : 13 نومبر 1839ء تاریخ نا امو واقعءِ کہ دا دےءِ انگریز سامراج بلوچ سر زمینءِ حملہ کرے۔ داڑن موست بلوچستان آزات اَس و بلوچ قوم خودمختار اَس۔
ریفرنس ئٹی بی این ایم تربت نا بازنگاءَ یونٹ آتا ممبرآک ہم بشخ الکور۔ بی این ایم نا ممبرآک شہیدآتے خراجءِ عقیدت پیش کریسا ہوفتا کرداراتءِ بلوچ قومی تحریک آکِن باز زیات گچین پاریر۔
پروگرام ئٹی 13 نومبر نا تاریخی انگاءَ واقعءِ اِیت کریسا ھو پاریر کہ انگریزآتا بلوچ سرزمینءِ قوضہ اَن پد بلو کچ سیا اثرآت آک تمانءُ۔ ھو پاریر انگریز سامراج بلوچ سر زمین نا زی آ قوضہ کننگ خؤآتوکءَ۔ دا ہوفتا مفادئٹی اللوکہ کہ ھو بلوچستان نا زی آ قوضہ کیر بلکِن ہوفتا پوجی مفادآک بلوچ سر زمین تون تفوک اسہورا ۔ اننا خاطِر اَن ھو خان بلوچ اَن خواست کریر کہ ھو انگریزاتءِ بولان پاس اَن کَسر ایتءِ تنکہ ھو داکاءَ حفاظت ئٹی گدرینگءِ و افغانستان نا زی آ حملہ کننگ کے۔ ولے مزاحمت نا چیدگ خان بلوچ دا اِیتءِ منیتہو کہ انگریزآک بلوچ سر زمینءِ ہوفتا ہمسایہ آتا خلاف کارمرز کیر۔ تینا قومی خود مختار و وقار نا خاطر کِن خان بلوچ انگریزآتون مون پہ مون جنگ کننگ کِن تیار مَس و تینا سنگت آتون دا جنگ ئٹی تینا کاٹمءِ ندر کرے۔
ھو پاریر کہ بلوچ آک ہر دور ئٹی سامراجی انگاءَ طاقت آتون مزاحمت کرینءُ و اینو اِسکان ہوفتا مفادآتا مونءِ رکاوٹ مسہونءُ۔ انگریزآتا زمانہ اَن الیس پاکستان نا وڑو آرٹیفیشلءُ ریاست سینا قوضہ کننگ اِسکان بلوچ آک تینا بقاء و قومی خودمختاریءِ اللنگ کِن مزاحمت کننگ ئٹیءُ۔ باعزت و باوقارءُ زندگی اَس گدریفِنگ کِن بلو کچءَ سیٹی بلوچ آک تینا جان نا قربانیءِ تسہونءُ۔دا دے تنیا بلوچ شہیدآتے یات کننگ نا دے اَف بلکِن ہوفتا نظریہ ، مسکد و پکرءِ مونی دننگ کِن وعدہ اَس کننگ نا دےءِ۔ دا دے بلوچ نا چُناتے قومی وقارو شان آکِن مزاحمت کننگ نا سبق اَس اِیتِک۔ دا دے آزاتی اللنگ کِن مزاحمت نا کَسرءِ نشان اِیتِک۔ اینو اگہ بلوچ قومی تحریک زندہءِ دانا بلا وجہ بلوچ شہید آتا دِتر تننگ و باوقار انگا کاٹم آتے ندر کننگ آک مسہونءُ۔ انون بلوچ آتا عظیم انگا شاعر قاضی مبارک پائیک ؛ ہراتم دِتر نا جُو وہیک تینتون پلیتءُ گندگیتءِ ہم دیک۔
