نیدر لینڈ نا شار دی ہیگ ئٹی بلوچ نیشنل موومنٹ نا پارہ غان 28 مئی 1998 آ بلوچستان نا علاقہ چاغی ٹی کننگوک ایٹمی تراک آتا برخلاف اسہ برانزی ریلی ئس کشنگا و پاکستانی سفارتخانہ نا مونا برانز کننگا۔
برانز کروکا تا دو تیٹی پلے کارڈ اسک و اوفک بینر ہرفیسُر، ہرافتے آ بلوچستان ئٹی ایٹمی چکاس، زوراکی ئٹ کوزہ و بندغی حق آتا لتاڑنگ نا برخلاف نعرہ نوشتہ کروک اسک۔ ساڑی مروک آک چاغی ٹی کننگوک ایٹمی تراک، بلوچستان نا زوراکی ئٹ اوار کننگ و آجوئی نا جنر ئنا حق ئٹی نعرہ خلکُر۔
برانز آن بی این ایم نیدر لینڈ چیپٹر نا صدر عبدالرحیم، ڈاکٹر لطیف بلوچ، واحد بلوچ، عصا بجار، زہرہ بلوچ و پشتون تحفظ موومنٹ نا باسک زر خان تران کریر۔
ہندی آ آبادی اینو اسکان تابکاری نا زیم آتے آن زیمی ءِ۔ تران کروک آک
تران کروک آک پاریر کہ چاغی نا مشی آ علاقہ ٹی کننگوک تراک آتے آن پد زمین، دیر و فضا ٹی تابکاری نا کچ بھلو کچ ئسے اسکان ودھانے۔ اوفتا رد ئٹ ہندی آ آبادی اینو ہم زیم آتے آن زیمی مننگ ئٹی ءِ، ہراڑے سِل ئنا ناجوڑی، دم ئنا تکلیف، نظر نا کمزوری و کینسر آن بارنگا ناجوڑی تیٹی بھلو کچ ئسے ئٹ ودُکی خننگ مسنے۔
او پاریر کہ زیمی مروک دیہات نا ہندی تے نہ تو تراک آتان مُست حال تننگا و نئے کہ تراک آتے آن پد اوفتا جانجوڑی کن عملی او گام ئس ہرفنگا۔ کیہی خاہوت آک تابکاری نا زیم آتا خُلیس آن علاقہ ئے النگ آ بیوس مسر۔ تران کروک آک دا ہیت آ اوسوز نا درشانی ئے کریر کہ اینو اسکان ہچو جہانی ادارہ یا بندغی حق آتا تنظیم ئس دا تراک آتا آزات سائنسی و غیر جانبدار پٹ ئہ پول ئے کتنے۔
دنیا پاکستان نا جوہری کاریم تے بیرہ ہُرِسٹ کرے۔ تران کروکا تا تنقید
تران کروک آک گیشتر پاریر کہ دنیا نا ایلو ڈیھ تیٹی اگہ ایٹمی تراک کننگا تو اوڑے رکھنگ نا گامگیج ہرفنگا و نج پٹ ئہ پول کننگا، ولہ بلوچستان ئٹی نہ بیرہ ایٹمی تراک کننگا بلکن کیہی رپورٹ آتا رد ئٹ پاکستان تینا ایٹمی سلاہ تے ہم بلوچستان ئٹی جاگہی کرینے۔ اگہ ہمرو ہم وخت ئسیٹی تابکاری نا اخراج مسک تو دانا نسخان کھل آن گیشتر بلوچ الس ئے مرو، ہرا مھالو آن معاشی سیاسی و بندغی بحران نا گواچی ءِ۔
او جہانی ادارہ بھازیکا اقوام متحدہ و انٹرنیشنل اٹامک انرجی آ تنقید کرسہ پاریر کہ او پاکستان نا دا جوہری کاریم تے آ بیرہ بے توار مرسہ ہُرار، نہ کہ اوفتے توریر و نہ کہ داسکان پاکستان آن سوج کننگا۔
