مونسٹر،جرمنی: بلوچ راجی زرمبشت (بی این ایم) نا نیمہ غان اسہ مظاہرہ سے ٹی برانز کروکا خواست کرینو کہ جہانی برادری بلوچستان نا زی آ پاکستانی زوراکی تا نوٹس ہلیر انتئے کہ بلوچ آتا حق آک ہم اسہ لس ءُ بندغ ئسے نا بریبر ءُ۔
شمبے نا دے جرمنی نا شار مونسٹر ئٹی بے دادی نا گواچی مروکا بندغ آتا حمایت نا جہانی دے و منشیات نا برخلاف جہانی دے آ برانز کننگا ہرا ٹی بی این ایم و بی آر پی نا سنگت آک اوار مسُر۔ برانز ئٹی انگریزی و جرمن زبان ئٹی پمفلٹ ونڈ کننگا ہراٹی ہمو جاگہ نا لس مخلوق ءِ بلوچستان نا زی آ ہڑدے نا جبر و زوراکی تا بابت ئٹ مہذب جہان و جرمنی نا بندغ آتے چاہنداری تننگا۔ برانز ئٹی زوراکی نا بیگواہی تا برخلاف نعرہ خلنگا و جہانی بندغی حق آتا ادارہ آتیان خواست کننگا کہ بلوچستان ئٹی پاکستان نا نیمہ غان بے بندغی روشت نا برخلاف نوٹس ہلنگ مرے و بلوچ آتے بندغی حق تننگ مرے۔
برانز ئٹی جرمن چیپٹر نا صدر اصغر علی پارے کہ پاکستان نا ریاست بلوچستان آ ظلم و زوراکی نا پوسکنو کسہ لکھنگ ءِ۔ داسا حالیت آک دا جاگہ غا سر مسونو کہ زوراکی ئٹ بیگواہ مروک آتا خاہوت آتیا ہم بےدادی کننگ ءُ دانا مثیال داسا بیگواہ آ ڈاکٹر دین محمد نا مسڑ و ایلو خاہوت آ تتون سندھ پولیس زوراکی کریسہ تینا لاری تیٹ شاغا و تھانہ غا درے۔ پاکستان دے پہ دے بلوچ آتا زی آ زیات بےدادی کننگ ءِ۔
اصغر علی مُستی پارے کہ تدوکا بیست سال آن ہزار آتا کچ ئٹ بلوچ سیاسی، چاگڑدی و زند ئنا ایلو فکر ئنا بندغ آتے زوراکی ئٹ بیگواہ کننگ ءِ و اوفک سال آتا سال پاکستانی زندان آ تیٹی غیر انسانی بےدادی سگنگ ءُ۔ اینو ڈاکٹر دین محمد ءِ سینزدہ سال مریک اود بیگواہ ءِ اودے اونا ڈیوٹی نا ہند ھورناچ خضدار آن پاکستان نا ایجنسیک بیگواہ کریر و اونا مسڑک تدوکا سینزدہ سال آن تینا باوہ کن پاکستان نا ہرچ کسر تیا سلوک زوراکی سگنگ ءُ ولے اوفتے مایوسی آن ابید ہچ اس دو بتنے۔
بلوچ راجی زرمبشت جرمنی نا نائب صدر سمُل جہانی منشیات نا دے ئنا رد ئٹ پارے کہ تیوہ غا جہان ئٹی منشیات سر کننگ ئٹ پاکستان و اونا لشکر نا بلو دو اس ارے و پاکستان منشیات رسیفنگ کن بلوچستان نا کسر تن کارمرز کیک۔ بلوچستان نا ہند آواران ئٹی ڈرگز مافیا تے پاکستانی لشکر نا دو کاٹم آ ٹے۔
بلوچستان نا ہرچ ہند ئٹ بندغ آک نشہ نا آماچ ءُ و نشہ نا سوب آن ڈپریشن نا نفسیاتی مریض ءُ ہندا سوب آن بے روزگاری ہم ودانے۔
ورناک ہرچ راج ئنا جوڑ کروکاک ءُ ولے بلوچستان ئٹی ہرچ چُنا نشہ نا آماچ ءِ۔ پاکستان نا ریاست تینا کالونیل پالیسی تے زیات کننگ کن منشیات نا بے قانودی کاروباربءِ گیش کریسہ بلوچستان نا مسقبل ءِ مفلوج جوڑ کننگ ءِ کہ پاکستان نا قوضہ ءِ بلوچستان نا زی آ برجاء تخے۔ بلوچستان نا باتیک مُست ہم جبر ئنا بر خلاف زیات قربانی تننگ ءُ ولے پاکستان منشیات ءِ زیات کریسہ بلوچ راج ءِ تباہی نا نیمہ غا دننگ ءِ۔
بی این ایم جرمنی چیپٹر نا جوائنٹ سیکریٹری شار حسن پارے کہ پاکستان تینا جبر ئنا ایسری حد اسکان سر مسونے۔ بلوچ نیاڑی تن زورانسری ئٹ بیگواہ کننگ اوفتیا بےدادی کننگ اسہ غیر انسانی ظلم ئسے۔ جہان بائدے دا بابت آ ہیت کریسہ پاکستان ءِ بلوچ کشی نا زی آ جوابدہ کے۔
بی این ایم نا باسک صادق سعید پارے کہ بلوچستان ئٹی 40 ہزار آن زیات بلوچ آتے زوراکی نا نشانہ کننگ مسونے۔ہزارا بلوچ آتا جشوک جونک ویرانہ تیٹی بٹینو و دا چرجوئی انگا برجاءِ ءِ ہرافتیٹی بلوچ خوانندہ، ورنا و نیاڑی تے زوراکی نا نشانہ کننگ مسونے۔ ہرچ ہند، جاگہ، کسر و خواننگ جاہ تیٹی پاکستانی لشکر بندغ آتے بےسوب آن تننط کیک۔ اوفک ایسر ئٹ بندغی حق آتا ادارہ تیان خواست کریر کہ بلوچستان ئٹی زوراکی تا نوٹس ہلنگ مرے و جبر ئٹ بیگواہ مروک آتے آجو کننگے و جبر ئٹ بیگواہ کننگ نا لڑ ءِ توننگ ئٹی تینا کڑدار ءِ ایسر کیر۔
بی آر پی نا رہشون خلیل پارے کہ اینو دا پروگرام نا مسخت بلوچستان ئٹی پاکستان نا نیمہ غان غیر انسانی تشدد ءِ جہان نا مونا نشان تننگ ءِ۔ نن بلوچستان ئٹی جبرئٹ بیگواہی نا بر خلاف توار بُرز کننگ اُن۔ نن کُل جہانی بندغ آتیان خواست کینا کہ بلوچستان ئٹی بیگواہی تا برخلاف ننا توار جوڑ مریر۔
