ایمسٹرڈیم : بی این ایم نیدر لینڈ چیپٹر نا نیمغن بلوچستان اَٹی انسانی حقاتے نتا کیرنگا کننگ و چناوذالبُولاتے جبرھٹ بیگوا کننگ نا خلاف نیدرلینڈ نا شار ایمسٹرڈیم ڈیم اسکوائر ٹی احتجاجی و مظاہراَس اڈتننگا دا ٹی پاٹی نا کُل کارکناک شرکت کریر۔بازارٹی پمفلٹ بشخنگا واوفتے بازا جاغتے ھم خلننگا۔
مظاہرین آتن خطاب کریسا بی این ایم ہالینڈ چیپٹر نا رکن جمال بلوچ پارے مہذب دنیائے بلوچستان اَٹی انسانی حقاتا خلاف ورزی، مرد ، چنا وزالبولاتا جبرھٹ بیگواہی نا خلاف توار چست کروہی اے۔یورپی یونین نا مخلُوک تینا نمائندہ تَن سوال کِیر کہ ھو ارا حوالہ ٹی دا دہشتگرداننگا ملک اے سپوٹ کننگ ھو۔ دا وختا بلوچستان اَٹی ہردے مرد، چناوزالبُولاتے پاکستانی فورسس آک جبرھٹ بیگوا کننگ او۔نن یورپی یونین ، انسانی حقاتا ادارغاتن اپیل کینا کہ او بلوچستان اَٹی بلوچ نسل کشی نا حساب اے الیر۔
بی این ایم ہالینڈ نا ممبر اسلام مراد خطاب کریسا پارے پاکستان نا فورسس آک موست مرد آتے جبرھٹ بیگواہی نا نشانہ جوڑ کریسور ولے داسا مننہ سالن چناؤزالبُولاتے تینا جبری بیگواہی نا شکار کننگ اَٹی اے۔بلوچستان نا علاقہ ھوشاب اَٹی بلوچ زالبول نور جان اے دروغ نا کیس اَس سیہا بندی کرے۔ پاکستان نا پوج اَسے منصوبہ سیٹی بلوچ نا زالبول اے نشانہ کننگ اَٹی اے، 3 فروری ہا بلوچستان نا شار شال ھن رشیدہ زھری اے ھونا چناتون ھوار جبرھٹ بیگوا کرے ھو بغیر جرم سے ھن سینزدہ دے پاکستان نا ٹارچر سیل تیٹی بندی مَس۔ داسا پاکستان نا فورس شال ھن ماھل بلوچ اے چناتون ھوار جبرھٹ بیگوا کرے، ھوداسکان پاکستانی ٹارچر سیل تیٹی اذیت کوننگ اے انسانی حقوق نا ادارغاک بلوچستان اَٹی انسانی حقاتا خلاف ورزی نا سختو حساب اَس الیر اوڑن موست کہ باز اورے مف۔
مظاہرین تَن خطاب کریسہ بی این ایم نا ممبر نبیل بلوچ پارے نن اینو دا خاطرن داڑے اَسے جاغہ مسونن کہ دنیا بلوچستان اَٹی بلوچ نسل کشی نا زی توار چست کے۔75 سال نا سے بلوچستان ٹی پاکستان نا فورسس آک بلوچ نا نسل کشی کننگ ٹی ھو ۔ ہزارتا حساب ھٹ مرد، چناؤ زالبول جبرھٹ بیگوا کننگان ھو۔دا وختا بلوچستان اَٹی جبرھٹ بیگوا مروکا بندغاتا ہوراوالاک ہردے احتجاج کننگ ھو۔ نن خوانا عالمی برادری بلوچستان اَٹی انسانی حقاتا خلاف ورزیتا نوٹس اے الے۔بلوچستان اَٹی پاکستان نا فورسس آک ہر دے شاری یعنی شہری و کُل حقاتا خلاف ورزی اے تینا ہر دے نا کاریم جوڑ کرین اے۔ ہزاراتا حساب اَٹ بلوچاک پاکستان نا ڈکوکنگا بندی جاگہ غاک یعنی ٹارچر سیل تیٹی بند ھو اراڑے اوفتے غیر انسانی تشدد کننگ اَٹی ھو ۔ النگ نا وختا سزا تننگ ھن ہزارہا بندغاک شہید مسونو۔ ہزارہاتے “خلنگ و کسفنگ “ نا پالیسی نا نشانہ جوڑکننگان اے۔
ھو پارے نن کُل انسانی ادارغاتَن و مہذب دنیا ھن دا خواست اے کینا کہ ھو بلوچستان اَٹی مقامی اننگا باشندغاتیکن توار چست کیر۔ ننے نسل کشی ھن محفوظ کیر و ننا آجوہی اے اسوار واپس ننے الننگ کِن ننا مدت و کمک اے کیر۔
