ایمسٹرڈم : بلوچ نیشنل موومنٹ نیدرلینڈز نا کنڈ آن 27 مارچ آ بلوچستان آ زوراکی ئٹ کوزہ کننگ نا برخلاف سیاہ دے نا رد ئٹ نیدرلینڈز نا شار ایمسٹرڈم ٹی برانز کننگا و دپ درشانی ہم کننگا۔ دپ درشانی ٹی اوار مروکا دو تیٹ بلوچستان ٹی زوراکی نا کوزہ نا بر خلاف پلے کارڈ و بینرز ہرفیسر، ہرافتیا جتا نعرہ آک نوشتہ ئسر۔ برانز ئٹ اوار مروکا بلوچستان نا آجوئی نا حق و زوراکی نا کوزہ نا بر خلاف نعرہ خلکر۔ پمفلٹ ہم بشخار ہرافتیا ہندی مخلوق ءِ بلوچستان نا حالیت نا بارو ئٹ چاہنداری تننگا۔
برانزی تتون تران کریسہ نبیل بلوچ پارے کہ اینو 27 مارچ نا دے ءِ بلوچ قوم یوم سیاہ نا وڑ ہُرک انتئے کہ اینو آن 75 سال مُست 27 مارچ 1948 آ پاکستانی ریاست بلوچستان آ کوزہ کرے اندا سوب آن بلوچ قوم اینو نا دے ءِ سیاہ دے نا وڑ منائفک۔ دا دے آن گڈ بلوچ آتیکن ہڑدے سیاہ دے ءِ و ہمو وخت اسکان مرو ہرا وخت اسکان بلوچستان آجو متنے۔ پاکستان نا لشکر دا 75 سال ئٹی ہر وڑ ئنا چم چکاسانے ننا ایلم تے شہید کرینے ننا ورنا تے زوراکی ئٹ بیگواہ کرینے و ہر وڑ ئنا بےدادی کرینے داسا تو پاکستانی لشکر دا حد اسکان سر مسنے کہ او ننا بلوچ زالبول و چنا تے ہم زوراکی ئٹ بیگواہ کننگ ءِ۔ اینو بلوچ قوم اقوام متحدہ نا پارہ غا ہُننگ ءِ ہرا کہ بلوچستان ئٹ بندغی حق آتا لتاڑ آ تینا خن تے تر کرینت و بلوچ قوم آ پاکستان نا ظلم و زوراکی تیا چُپ تماشائی جوڑ مسنے۔ اینو نن کُل اندا سوب آن داڑے ساڑی اُن کہ پاکستانی ریاست ءِ کلہو ایتن کہ نی اخس ظلم و زوراکی کروس بلوچستان نا تحریک آزادی ہموخس زیات ترندی ئٹ مونا ہنو۔
بی این ایم نیدرلینڈز نا ممبر جمال بلوچ پارے کہ کیہی سال تیان بلوچ قوم پاکستانی لشکر نا بےدادی تا گواچی ءِ، ہزار آ بندغ آک زوراکی ئٹ بیگواہ کننگانو و کیہی تے شہید کننگانے۔ کیہی جشوک جونک خننگانو۔ یورپین ڈیہہ و اقوام متحدہ بائدے بلوچستان ئٹ بلوچ نسل کشی نا بر خلاف نوٹس ہلیر۔
بی بی بدریا بلوچ تران کریسہ پارے کہ بلوچستان ئٹ بیرہ اینو ہی ظلم وبربریت اف بلکہ دا ظلم ہمو دے بناء مس ہرا دے پاکستان بلوچستان آ زوراکی ئٹ کوزہ کرے و غٹ بندغی حق آتے لتاڑا۔ پاکستان نا لشکر بے مہذب ءِ ہرا بلوچ چنا زالبول و پیر کماچ آتیا بےدادی کیک، ہرا بندغی آ ظلم نا بد حال دروشم ءِ۔ ننا ذمہ واری ءِ کہ نن اسہ منظم و سوگو ءُ تاغت اس مریسہ پاکستان نا بر خلاف جہد ئٹ پین ترندی ہتین۔
بی این ایم نیدرلینڈز نا باسک اسلام مراد بلوچ پارے کہ 27 مارچ 1948 بلوچ تاریخ ئٹ سیاہ دے ئنا حیثیت تخک۔ 27 مارچ آ پاکستان بلوچستان آ کوزہ کرے۔ 27 مارچ 1948 آن اینو اسکان ہزار آتا کچ ئٹ بلوچ پیر و ورنا، چنا و زالبول تے شہید و بیگواہ کننگانے۔ اقوام متحدہ ءِ بلوچستان ئٹ بندغی حق آتا لتاڑ آ ایکشن ہلنگ خواہک۔ بلوچ قوم 27 مارچ ءِ سیاہ دے نا وڑ منائفسہ جہان ءِ کلہو ایتے کہ بلوچ اسہ قوم ئسے ہرا نا تینا پجار، تینا ڈغار و دود و ربیدہ ئسے۔ نن نہ مُست ریاستی غلامی ءِ قبول کرینن و نئے پین وختی کرون۔
