بوسان ، جنوبی کوریا بلوچ نیشنل موومنٹ ( بی این ایم ) جنوبی کوریا چیپٹر بلوچستان نا شار گوادر ئٹی باڑ خلِنگ نا خلاف بوسان اسٹیشن نا خُڑکءَ اَسے احتجاجئءُ مظاہرہ ئس اڈ تننگاءَ ۔ مظاہرین آک بینر و پلے کارڈ ھم ارفیسُر اراٹی باڑ خلِنگ اَن شاری مخلوکءِ اَسے جاگہ سیٹی بند کننگ و مخلوک نا زند و روزگار نا زی آ باز خرابءُ اثر اَس تمانءِ نوشتہ کننگاسُس۔
بی این ایم نا پارہ غان پاننگانءِ کہ جہی آ مخلوک نا کاریم روز گار و زندءِ ھم خلاسی نا خولیس ارے۔
احتجاج نا مسخت بلوچستان ئٹی جبرئٹ بیگواہی و بندغی حق آتا خلاف ورزی کننگ اَن اثر الوک انگا بندغ آتہ کُنڈا توجُو تننگاءَ ۔ھو دا اِیتءِ زور تریسہ پاریر کہ باڑ خلِنگ نا مسخت جہی آ مخلوک نا حق آتا خلاف ورزی کننگءِ و بیشن نا بروکا تاجر آتِیکن کسرتے مَلوہیءِ۔
بی این ایم نا باسک آغا فیض بلوچ خطاب کریسہ پارے کہ نن اینو بلوچ نیشنل موومنٹ نا پاننگ ئٹ پاکستانی ریاست نا پارہ غان گوادر نا شار ئٹی باڑ خلِنگ و ہوفتے پورا بند کننگ نا کوشست کننگ نا خلاف داڑے مُچ مسُونُن۔ ننا قوم بلوچءِ و نن بلوچستان نا وارث ہُون۔ پاکستان ننا زی آ قوضہ کرینءِ۔ تینا قوضہءِ مورغن کننگ کِن ہردے ننا مخلوکءِ بیگوا کننگ تون ھوار کسِیفک و جون آتہ مَش و روڈ آتیہ بِٹک۔ نن دا قوضہ گیرا اسلامی انگا ملک پاکستان نا غلامیءِ ہچُو وخت اَس منیپنءَ۔
ھو پاریر کہ گوادرءِ باڑ خلنِگ چین و پاکستان نا اقتصادی راہداری ( سی پیک ) منصوبہ نا بشخ اَسے ، ارہادے ھو اِسے نوآبادیاتیءُ منصوبہ اَس پارہ۔ ارانہ مسخت گوادرءِ چین نا دُوٹی تننگءِ۔
مظاہرہ کروک آک دا اِیتءِ دعویٰ ٹی پاریر کہ سی پیک نا شروع مننگ اَن پد جہی آ مخلوکءِ ہوفتہ جِندئنا زمین اَن کشنگ و ہوفتے بے ہورا کننگ نا خُولیس ھم ارے۔
داڑن موست گوادر پوجی چھاؤنی ، چیک پوسٹ و پوج نا کیمپ آتون الُوکءِ۔ داسہ پورا شارءِ چارمکُنڈ اَن گیڑ خلِنگ ئٹیءِ، ھو پاریر دا اقوام متحدہ نا بندغی حق آتہ پورا خلاف ورزیءِ ۔احتجاج نا وختءِ پمفلٹ بشخِنگاءَ ، ہراٹی گوادر نا جہی آ مخلوکءِ چارمکنڈ بندکننگ اَن ہوفتہ زی تموکا اثرات آک و جہی مخلوکءِ سیکیورٹی کنٹرول کننگ و خولیسءِ زیات کننگ نا بارسٹ پاننگاسُس۔
