بلوچ نیشنل موومنٹ نا بیگواہ آ مُھبر عبدالغفور بلوچ نا لمہ مُرغُن آ جتائی نا غم ئٹی (چھار شمبے 5 مارچ 2025) آ کذیت کرے۔ بی این ایم نا مسکوہی بنجاہی کمیٹی نا باسک عبدالغفور بلوچ ئے 26 دسمبر 2009 آ پاکستان نا فوج دزگیر کریسس، و او داسکان ہم بیگواہ ئے۔
بی این ایم نا جارکش تینا بیان ئٹی پارے کہ پارٹی بیگواہ مروک مھبر نا لمہ نا کذیت آ اُست ئنا کڑمبی ئٹ غم ئنا درشانی ئے کیک و او دا سخت انگا وخت آ عبدالغفور نا خاہوت نا غم ئٹی شریک ئے۔ عبدالغفور نا لمہ نا کذیت بلوچستان ئٹی ہزار آتا کچ ئٹ بیگواہ مروکا تا لمہ و باوہ آتا اسٹ انگا غم ئنا داستان ئے، ہرا تینا دوستخواہ تا کسر آ ہُرِسہ ہُرِسہ رسخت کرینو۔ عبدالغفور گدرینگوکا 15 سال آن پاکستان نا فوج ئنا وے سما مروک حالیت ئٹی زندان ئے۔
جارکش پارے کہ عبدالغفور ئے ارٹمی وار دسمبر 2009 آ زوراکی ئٹ بیگواہ کننگا و او داسکان زندان ئٹی بند ئے۔ داکان مُست ہم او زوراکی ئٹی بیگواہی نا گواچی مسونے ولہ بیدادی لٹ ءُ کُٹ آن پد یلہ مننگ آن پد او تینا جہد آن دو کشنگ آ تیار متو ۔ بی این ایم تو تفوک مننگ و قومی آزاتی نا جہد ئنا سوب اودے گدرینگوکا 16 سال آن زندان ئٹی بند کننگانے، ہندن اونا زندگی و جان جوڑی نا بارو ئٹ ہچو حال ئس رسینگپک۔
جارکش پارے کہ بی این ایم بلوچ قوم آ مروک ریاستی ظلم و بیدادی ئے پک آ دستاویز آتا ذریعت ئٹ جہانی ادارہ آتا مونا تخِسا کرو، عبدالغفور ، ڈاکٹر دین محمد ، رمضان، حاصل حسرت بی این ایم نا ہمو زندان آ مھبر آکو ہرا دھِک آتیان زوراکی ئٹ بیگواہ مروک بندغ آتیٹی اوار ءُ۔ پاکستان زوراکی ئٹ بیگواہی ئے اسہ جنگی سلاہ ئسینا وڑ ئٹ بلوچ قوم ئنا برخلاف کارمرز کننگ ئے تانکہ اودے آزاتی نا جنز آن مُر تخنگ مرے۔
