شال: بلوچ نیشنل موومنٹ نا ترجمان اسہ بیان اسیٹ پارے کہ کُل مظلوم و پد تموک قومم آتا دڑد اسٹ ءِ۔ نن پشتونخوا ٹی ریاستی زوراکی و گلگت بلتستان ئٹ ہندی مخلوق نا ڈغار تیا زوراکی ئٹ کوزہ نا مذمت ءِ کینہ۔ گلگت بلتستان و پشتونخوا نا الس ئنا کنڈ آن مزاحمت پاش کرینے کہ پاکستان ئٹ ہچو قوم اس پنجاپ نا بالادستی و تینا قومی چاہنداری آن دوکشنگ کن تیار اف۔ پد تموک قوام آتا ڈغار و وسائل آتیا زوراکی و تاغت آن بیدس پاکستان اسہ دے ہم تینا کوزہ ءِ توننگ کپک۔
اینو بلوچ، پشتون، سندھی، کشمیری، گلگت بلتستان و سرائیکی وسیب ئنا کروڑ آ بندغ آک پنجاب نا حکمرانی آن جغر چٹ ءُ۔ داڑان پاکستان نا وجود نا جواز ایسر مسنے۔ ہر قوم ءِ تینا ڈغار آ غیرمشروط مکمل اختیار و آجوئی مروئی ءِ۔ غلامی نا زند آن علاقہ ٹی رہینگوکا قوم آتا قومی سلامتی خطرہ ٹی ءِ۔ گلگت بلتستان نا الس و پشتون قوم ءِ ہر محاذ آ مزاحمت بناء کروئی ءِ۔
بی این ایم نا ترجمان پارے کہ پد تموک قوم آتے تینا چنکا چنکا آسراتی تا گڑدلیک ئٹ دو بفروک جہد کننگ نا جاگہ غا تینا آجوئی کن کوزہ گیر پاکستان نا برخلاف اسٹ مریسہ جہد کروئی ءِ۔
او پارے کہ پاکستانی فوج گلگت بلتستان ئٹ ہندی بندغ آتا ڈغار تیا کوزہ کریسہ اوفتا قومی چاہنداری ءِ ڈھرفِنگ خواہک و دا نا برخلاف مزاحمت کننگ آ تاغت نا زور آ السی توار ءِ لتاڑنگ ءُ۔ پاکستان بلوچ آتے تینا جند ئنا سرزمین آ اقلیت ئٹ بدل کننگ کن ہم اندا چم آن بناء کرے۔ گوادر تون اوار جتا علاقہ آتیٹ بندغ آتا ڈغار تیا کوزہ کریسہ بےجاگہی بندغ آتے آباد کننگ نا پالیسی ءِ کارمرز کننگا۔
پاکستانی فوج گلگت بلتستان ئٹ ہندی بندغ آتا ڈغار تیا کوزہ کریسہ اوفتا قومی چاہنداری ءِ ڈھرفِنگ خواہک و دا نا برخلاف مزاحمت کننگ آ تاغت نا زور آ السی توار ءِ لتاڑنگ ءُ۔
جار کش بی این ایم
ترجمان پارے کہ ڈغار تیا کوزہ نا برخلاف گلگت بلتستان نا الس تدوکا کیہئ دے آن برانز کننگ ءِ ولے کس بِنوکو اف۔ پاکستانی ریاست نا ستون بیرہ پنجاب ئٹ انصاف و آسراتی تننگ ءِ و ایلو قوام آتون غلام آتا ڈول روشت تخنگ مننگ ءِ۔ انداڑان دا قوم آتے غلامی نا مارشت مسنے و او دا نا برخلاف جہد کننگ ءُ۔
داسا دوارہ امریکہ و ایلو ڈیہہ تیان ڈالر ہلنگ کن پشتون قوم آ اسہ پوسکنو جنگ اس چٹی کننگ نا تیاری برجاء ءِ۔
جارکش
او پارے کہ پشتونخوا ٹی ریاست پاکستان دوارہ لشکر کشی نا تیاری کننگ ءِ۔ ہنوکا وخت ئٹ ہم سلاء بند تنظیم آتا برخلاف آپریشن نا پنا السی املاک ءِ نسخان تننگا۔ ہزار آ بے ڈوہ بندغ آک خون کننگار، لکھ آتا کچ بندغ آتا اُرا و کاروبار تے بھس کریسہ اوفتے ہمپنگ کن بےوس کننگاذ داسا دوارہ امریکہ و ایلو ڈیہہ تیان ڈالر ہلنگ کن پشتون قوم آ اسہ پوسکنو جنگ اس چٹی کننگ نا تیاری برجاء ءِ۔
ترجمان پارے کہ پشتون و بلوچ فطری سیوتی ءُ و ہڑتوما قوم آتا سوار آک اسٹ ایلو تون تفوک ءُ دہشت گردی نا برخلاف بیرہ پن ئنا جنگ ئنا زہم آتیان بلوچستان ہم زیمی مسنے۔ دا جنگ ئنا ہن آ ریاست پاکستان قومی سوج ءِ توننگ خواہک ہرادے ایسر کننگ آن بیدس امن و ایمنی مننگ کپک۔
