شال : مبارک کازی نا بیرانی مچ راج ئے اُست ہسون کرے، مبارک کازی راجی شاعر ئس اسّ، او تینا شعر آتیٹی بلوچ راج ئنا مارِشت آتا ترجمانی ئے کرینے۔ زبان و ادب اونا کڑد و کاریم تیکن بی این ایم اودے دروت ندر کیک۔
دا ہیت ئے بی این ایم نا جارکش بلوچی زبان نا پِنی آ شاعر مبارک کازی نا بیرانی آ شنگ کروکو درشان ئسیٹی پارے۔
او پارے کہ مبارک کازی تینا شعر آتیٹی راج ئنا رھشونی ئے کرینے، اونا قلم زغم ئنا وڑ مسُنے۔ اسِہ کُنڈ آ او تینا شاعری ئٹ زوراک آ پاکستان ئے شیف خلکُنے و راجی زرمبشت نا پلہ مرزی ئے کرینے، ایلو کنڈ آ چاگڑدی خرابی و چاگڑدی سیاسی کٹ پتلی تا برخلاف راستی ئٹ نوشتہ کرینے۔
اونا شاعری نا سوب آن اونا کھسفنگ کِن اوڑا جلہو کننگا، آزار تِننگ و زندان آتیٹی بند کنگا ولے او تینا فکر آن پِزیر متو، نہ اونا طاغت ئٹ کمی بس۔
بی این ایم نا جارکش پارے کہ مبارک کازی تو وخت اسّ کہ او تینکن زر و مڈی مچ کے ولے فقیری نا زند ئے دوست کرے۔ سادَئی ئٹ زند ئے گدریفنگ ئے دوست تِخا، او تینا گلزمین تون مہر کروکو بندغ ئس اسّ۔ او تینا چاگڑد نا آشوبی آ روح اس، او دُنکہ ایلو شاعر آتان بار بیرہ جوانو شعر و شبین جوڑ کتنے داڑان بیدس او تینا مخلوق نا ترجمانی ئے گچین کرینے، و مخلوق نا بولی ئٹ شاعری کرینے۔ تینا شعر آتیٹی آشوبی رنگ و تینا زند ئٹی بلوچستان ئٹی پِنی اس۔ ہندا خاطر آن اونا کزیت آن چنا، ورنا و پیر انگاک است ہسون ءُ۔
بی این ایم نا جارکش پارے کہ ننے سما ئے کہ نن اسِہ عہد ئسے ایسر مننگا خنانن، ولے مبارک کازی تینا کڑد، ازم، لیکہ و درشان نا دروشم ئٹ بروکا نسل آتے اسکان ننا رہشونی ئے کرو۔
جارکش آخر ئٹ پارے کہ اونا راجدوستی و لیکہ آتا پد ئٹ اونا مار قمبر کازی بلوچ آجوئی جہد ئنا سرمچار آتا بشخ مسّ ولے اودے دشمن نا ڈھکوکا ادارہ آک شہید کریر۔ خواجہ مبارک کازی دا بھلا ٹپ ئے آجوئی نا جنگ ئٹی اسِہ قربانی ئس پوہ مس و تینا مار آ مدام فخر کریکہ۔
