بلوچ نیشنل موومنٹ نا ترجمان تینا اَسے بیان سیٹی پارے لیاری ( کراچی ) گینگ وارتے پدا جوڑفِنگ نا کوشست آک مننگ ئٹیءُ دا بلوچ قوم کِن بلو تاوان اَسے پاٹی دادے بلوچ قوم نا خلاف ریاست نا سازش اَس سمجِھک انتیکہ لیاری بلوچ قومی سیاست ، علم وادب و قومی سوچ نا بیخ مسہونءِ۔ لیاری نا تباہی ، دا منشیات فروشاتءَ و گینگسٹر تا دُو ٹی اِننِگ اَن بلوچ قوم باز بَلو تاوان سِینا کونڈا اینوءِ۔لیاری ٹی پاکستانی ریاستی فورسز آک موست منشیات فروشاتءَ سرپرستیءِ کریرا دائنا امنءِ تباہ کریر و پدا بازِنگا گروپ آتے طاقتور جوڑ کریر اوفتے تینا سیاسی مکسدءَ کِن کارمرز کریر۔ پاکستان پیپلز پاٹی ھم منشیات فروشاتءَ طاقتءِ تینا اقتدار کِن کارمرز کریسہ مسہونءِ داڑن بیدس پاکستان نا خفیہ ادارغاک منشیات فروشاتءِ بلوچ قوم دوست آتا خلاف کارمرز کریرا۔ دا اِیت سافءِ پاکستان نا سیاسی جماعت آک و ریاست منشیات فروشاتءَ ختم کننگ اَن بیدس اوفتے تینا فائدہ کِن کارمرز کریسہءِ۔
ھو پارے ہراتم خاص اِنگا سیاسی مکسد آتے و کراچی ٹی پیپلز پاٹی نا طاقتءِ ایلو نیمہءِ دننگ نا ضرورت مروس اموتم کراچی ٹی اوفتءَ زی آ آپریشن کننگاکءَ ہراڑن سدآتءَ کَچ ئٹ نوجواناتءِ بغیرس عدالت سینا حکم اَن گرفتار کننگ اَن پد کسفنگاکءَ و اوفتءَ جونتءِ خسینگاکءَ۔
ترجمان پارے ریاست بلے سیاسی مکسد کِن آپریشن کرینءِ ولے پنی اِنگاءَ گینگسٹر و جرم کروکا بدنام اِنگاءَ بندغاتءَ کسفنِگ اَن لیاری و ملیر ئٹی مخلوک آرام ئٹ دم کشنگ اسُرا۔ کراچی نا بلوچ علاقہ آک تینا سیاسی ، ثقافتی لیب و گوازی و ایلو صحت مندءَ کاریم تا کنڈا بریسہ اسُرا اسیوار پدا منشیات فروش آک و گینگسٹرآک کاٹم ارفِنگ ئٹیءُ۔
ھو پارے بلوچ قومءِ کُل اَن موست تینا صفاتءِ سیدھا کرویءِ لیاری ٹی اَسے مضبوطءُ اتحاد و اَسے جاغہی اَٹ دوننگا بندغاتءَ خلاف توار چِست کرویءِ۔ لیاری نا نصیب تہاری تیٹی تُولنگ ہچ اَف ہودے قوم نا جوڑنگ تون حوار قومی ذمہ داری و دا چیلنجءِ نا خلاف ہر پُوسکُنا سازش اَن تینے بچِفویءِ۔
ترجمان پارے گیدرینگوکا ہفتہءِ پاک کالونی پرانا گولیمار ئٹی ریاست جدگال نا گروپ یاسر ، نعمان سندھی و سرتاج و جمیل چھانگہ گروپ نا محمد بخش ، ماجد و نوید عرف کپی تون سلحہ نا جنگ ئٹی کسرئٹ اِنوکا طاہر جدگال مرک نا گواچی مریک۔اسلام محلہ ، لیاری ، کلاکوٹ نا رہائشی یاسین ولد نیاز اے احسن پنیءَ منشیات فروش محلہ ٹی منشیات بہا کننگ اَن منع کِن کسِفِک۔ دا واقع آتا خلاف لیاری نا عوام کُل احتجاج کیک اوفتا توار تون نن تینا توارءِ اسِٹ کینا دا ایِت نا زیءَ زور خلینءَ کہ گینگ وار و منشیات فروشیءِ داڑے تورینگ زلوریءِ۔
ھو پارے مروکا ہرتوما واقعاتیٹی کسِفوک نا معلومءُ بندغ اَس اَف بلکہ مقامی اِنگا انتظامیہ، سرکار و پولیس دافتا بارِسٹ جوان تیائیِک۔ بلکہ دا بندغاتءِ پولیس نا سرپرستی ہم ارے اننا وجہ اَن دا بے خوف منشیات نا کاروبار کیرءَ و داسہ منشیات نا بہا ئٹی پین گینگز وار شروع مننگءِ۔ سوچنگ نا اِیت دادے کہ نوجوان نسل بے خیالی نا شکار مریسہ جرم نا دنیا ٹی انیسہءِ اننا ننا بروکا نسلءَ کِن باز بلو خطرہ اَسے۔
